پاکستان ميں قدرتی آفات سے نمٹنے والے سرکاری ادارے نيشنل ڈيزاسٹر مينجمنٹ اتھارٹی نے آج بروز پير ملک کے مختلف حصوں ميں مزيد بارشوں کی پيشگوئی کی ہے اور متنبہ کيا ہے کہ ان بارشوں کے سبب چند مقامات پر سيلابی ريلے آنے کا بھی امکان ہے۔ نيشنل ڈيزاسٹر مينجمنٹ اتھارٹی کی جانب سے کل اتوار کے روز يہ بيان جاری کيا گيا تھا۔

واضح رہے کہ پاکستان ميں ہفتہ تين اگست کے روز ہونے والی مون سون بارشوں کے سبب شمال مغربی صوبے خيبر پختونخوا ميں بيس، جنوب مغربی صوبے بلوچستان ميں چھ اور جنوب ميں واقع ساحلی شہر کراچی ميں اب تک انيس افراد کی ہلاکت کی تصديق کی جا چکی ہے۔ ہسپتال ذرائع کے مطابق کراچی ميں ہونے والی زيادہ تر اموات بجلی کا جھٹکا لگنے کے باعث ہوئيں۔

کراچی کاروباری لحاظ سے پاکستان کی شہ رگ مانا جاتا ہے ليکن حاليہ بارشوں نے اس شہر ميں نظام زندگی مفلوج کر کے رکھ ديا۔ اتوار کے روز فوج کے اہلکاروں نے شہر ميں بحالی اور امدادی کاموں ميں حصہ ليا اور سڑکوں وغيرہ کی صفائی اور ان کو دوبارہ فعال بنانے ميں مدد کرائی۔ شہری انتظاميہ کے مطابق بارشوں کی وجہ سے پھيلنے والی گندگی کو صاف کرنے اور سڑکوں پر کھڑے پانی کی نکاسی کے ليے کم از کم دو دن درکار ہوں گے۔

سيلاب سے متاثر ہونے والے علاقوں اور نقصانات کا جائزہ لينے کے ليے وزير اعظم نواز شريف نے وفاقی کابينہ کے تين وزراء کو متاثرہ علاقوں کا دورہ کرنے کے ليے روانہ کر ديا ہے۔

افغانستان ميں ہلاک شدگان کی تعداد اٹھاون

دريں اثناء پاکستان کے شمال مغربی اور جنوبی حصے کو اپنی لپيٹ ميں لينے والی ان بارشوں نے پڑوسی ملک افغانستان کے مشرقی حصے ميں واقع پانچ صوبوں ميں بھی تباہی مچا ڈالی ہے۔ وہاں بھی ہفتے کے روز ہی شدید بارشيں ہوئيں، جن کے نتيجے ميں نيوز ايجنسی ايسوسی ايٹڈ پريس کے مطابق اب تک اٹھاون افراد ہلاک ہو چکے ہيں جبکہ تيس سے زائد ابھی تک لاپتہ ہيں۔ اسی دوران ان علاقوں ميں کئی سو مکانات اور ديگر اثاثوں کو بھی شديد نقصان پہنچا ہے۔