جنوبی سوڈان، تنازعے کے فریقین کو امریکی دھمکی
6 مئی 2014![](https://static.dw.com/image/17613811_800.webp)
امریکی وزیر خارجہ جان کیری نے خبردار کیا ہے کہ اگر جنوبی سوڈان کے باغی رہنما رک مچار نے امن مذاکرات میں شرکت کرنے سے انکار کیا تو ان کے خلاف پابندیاں عائد کی جا سکتی ہیں اور انہیں سنگین نتائج کا سامنا بھی کرنا پڑ سکتا ہے۔ یہ مذاکرات گزشتہ چار ماہ سے ملک میں جاری خانہ جنگی پر قابو پانے کے لیے کیے جانے ہیں۔ ایک سفارتی بیان کے مطابق ان پابندیوں کی زد میں تنازعے کا کوئی بھی فریق آ سکتا ہے۔
اس سے قبل جمعے کے روز کیری جنوبی سوڈان گئے اور وہاں صدر سلوا کیر نے حامی بھری کہ وہ اپنے حریف رک مچار سے ملاقات کرنے پر راضی ہیں۔ تاہم جب کیری نے ٹیلی فون کے ذریعے رک مچار سے بھی ایسی ہی یقین دہانی چاہی تو انہوں نے انکار کر دیا۔ اس حوالے سے کیری نے انگولا کے دارالحکومت لوآنڈا میں کہا ہے کہ ’’ انہیں ایک بنیادی فیصلہ کرنا ہے۔ اگر ان کا فیصلہ نہیں ہے یا وہ اسے ٹالنے کی کوشش کریں گے تو ہمارے پاس بہت سے مختلف امکانات موجود ہیں۔ میں ایک مرتبہ پھر واضح کرنا چاہتا ہوں کہ اگر کسی بھی فریق نے انکار کیا تو اس کے خلاف نا صرف پابندیاں عائد کی جا سکتی ہیں بلکہ سنگین نتائج کا سامنا بھی کرنا پڑ سکتا ہے‘‘۔
انگولا امریکی وزیر خارجہ کے افریقی ممالک کے ایک ہفتے کے دورے کی آخری منزل ہے۔ جنوبی سوڈان کی فوجوں اور مچار کے حامی باغیوں کے مابین ملک کے شمالی حصے میں شدید لڑائی جاری ہے۔ بینتوکا یہ علاقہ تیل کی دولت سے مالا مال ہے۔ جان کیری نے جنوبی سوڈان کی افواج کی جانب سے اس کارروائی کی شدید الفاظ میں مذمت کی ہے۔ انہوں نے کہا کہ اس طرح 23 جنوری کو طے پانے والے امن معاہدے کی خلاف ورزی ہوئی ہے اور ساتھ ہی حال ہی میں سلوا کیر کی جانب سے کرائی جانے والی یقین دہانیاں بھی غلط ثابت ہوئی ہیں۔’’ ہمارا تنازعے کے فریقین سے مطالبہ ہے کہ وہ امن معاہدے پر دوبارہ سے عمل کرنے کی کوشش کریں اور صرف بیان بازی سے نہیں بلکہ عملی طور پر ۔ ساتھ ہی تمام عسکری سرگرمیوں فوری طور پر بند کی جائیں۔‘‘
جنوبی سوڈان دنیا کے نقشے پر ابھرنے والا سب سے نیا ملک ہے۔ 2011ء میں اس نے سوڈان سے آزادی کا اعلان کیا تھا۔تاہم اس نئی ریاست کے لیے عالمی برادری کے خیر سگالی کا جذبہ اس وقت مایوسی میں تبدیل ہوا جب گزشتہ برس دسمبر سے اس ملک میں خانہ جنگی شروع ہوئی۔ صدر سلوا کیر اور ان کے حریف رک مچار کے مابین جاری اس لڑائی کی وجہ سے اب تک دس لاکھ سے زائد افراد اپنے گھر بار چھوڑنے پر مجبور ہو چکے ہیں۔