جنوبی کوریا کی وزارت انصاف نے 12 اگست جمعے کے روز اعلان کیا کہ ٹیکنالوجی کی معروف عالمی کمپنی سام سنگ کے وارث لی جے یونگ کو صدارتی معافی مل گئی ہے۔ گزشتہ برس لی کو غبن اور رشوت خوری کے الزامات میں سزا سنائی گئی تھی۔

انہیں اگست 2021 میں ہی پرول پر رہا کر دیا گیا تھا اور جس کا مطلب یہ ہوا کہ صدر کی جانب سے یہ معافی بڑی حد تک علامتی ہے۔ پرول پر رہا ہونے سے پہلے لی نے 18 ماہ جیل میں گزارے تھے، جو ان کی اصل مقررہ سزا کی نصف سے کچھ زیادہ تھی۔
 
وزارت انصاف نے ایک بیان میں کہا، ''عالمی اقتصادی بحران کی وجہ سے، قومی معیشت کی نمو اور اس کی رفتار خراب ہو گئی ہے، اور اقتصادی بحران کے طول پکڑنے کا خدشہ لاحق ہے۔'' 

جنوبی کوریا کی یونہاپ نیوز ایجنسی کی اطلاعات کے مطابق، اسمارٹ فون بنانے والی دنیا کی سب سے بڑی کمپنی سام سنگ الیکٹرانکس کے وائس چیئرمین لی نے قومی معیشت میں جان ڈالنے کے لیے سخت محنت کرنے کا عزم کیا ہے۔

سام سنگ گروپ کا مجموعی کاروبار جنوبی کوریا کی مجموعی گھریلو پیداوار کے تقریباً پانچویں حصے کے برابر ہے۔

لی کے ساتھ ہی دیگر کاروباریوں کو بھی معافی

جنوبی کوریا کی وزارت انصاف نے اپنے بیان میں مزید کہا ہے کہ لی اور اس حوالے سے بعض دیگر کاروباری شخصیات کو بھی معاف کر دیا گیا ہے تاکہ وہ، ''ٹیکنالوجی اور روزگار کی تخلیق میں فعال سرمایہ کاری کے ذریعے ملک کی ترقی کے انجن کی مسلسل رہنمائی کرتے رہیں۔'' 

جمعے کے روز ملنے والی معافی لی جے یونگ کو مکمل طور پر کام پر واپس آنے کی اجازت دیتی ہے، کیونکہ انہیں جب پرول پر رہا کیا گیا تھا، تو اس وقت ان پر ملازمت یا کسی بھی طرح کے کام کرنے پر پابندی عائد کر دی گئی تھی۔

54 سالہ لی کے ساتھ ہی جمعے کو تین دیگر تاجروں کو بھی معافی مل گئی، جس میں جنوبی کوریا کے پانچویں سب سے بڑے ادارے لوٹے گروپ کے چیئرمین شن ڈونگ بن بھی شامل ہیں۔

سن 2016 کے دوران شن ڈونگ بن کا مقدمہ ایک ایسی عدالتی کارروائی تھی، جس نے قوم کو اپنی گرفت میں لے لیا تھا اور بالآخر سابق صدر پارک گیون ہائے کی حکومت کا خاتمہ ہو گیا تھا۔

لی پوری طرح سے آزاد

لی کو پہلی بار سن 2017 میں صدر پارک کے مواخذے کے بعد اس وقت جیل بھیجا گیا تھا، جب انہیں صدر سے کاروباری فائدہ حاصل کرنے کے بدلے میں لاکھوں ڈالر کی رشوت کی پیشکش کا قصوروار پا یا گیا تھا۔ تاہم سن 2018 میں ایک اپیل کورٹ نے رشوت کے معاملے میں ان کی سزا کوکالعدم کر دیا تھا اور اس طرح وہ رہا ہو گئے تھے۔

سن 2019 میں جنوبی کوریا کی سپریم کورٹ نے لی کو دوبارہ مقدمے کا سامنا کرنے کا حکم دیا اور اس طرح انہیں 2021 میں رشوت خوری اور غبن کے الزام میں ڈھائی برس قید کی سزا سنائی گئی۔

کورونا کی وبا کے ساتھ ہی سیاسی اشرافیہ اور بہت سے با اثر کاروباری حلقوں کی جانب سے ان کی رہائی کے مطالبات بڑھتے جا رہے تھے، کیونکہ بہت سی کاروباری سرگرمیاں متاثر ہو رہی تھیں۔ 

لی جنوبی کوریا میں بدعنوانی کے الزامات کا سامنا کرنے والے پہلی کاروباری شخصیت نہیں تھے، جہاں عام طور پر کاروبار کرنے والوں اور حکومت کے درمیان خوشگوار تعلقات رہتے ہیں۔ تاہم سلسلہ وار بدعنوانی کے واقعات کے سبب یہ تعلقات اب تنقید کی زد میں بھی ہیں۔

ص ز/ ج ا (روئٹرز، اے ایف پی)