اس تصویر میں درمیان والی خاتون اس گروپ کی سربراہ چُن چُن ہیں۔ یہ تینوں ٹوکیو میں شمالی کوریائی ثقافت کے مداحوں کی ایک محفل میں اپنی کارکردگی کا مظاہرہ کر رہی ہیں۔ یہ گروپ متنازعہ بھی ہے۔ چُن چُن کے بقول انہیں شمالی کوریائی رہنما کم جونگ اُن کا جاسوس کہتے ہوئے سماجی ویب سائٹس کے ذریعے دھمکیاں بھی دی جاتی ہیں۔

چُن چُن اپنے گروپ پر عائد کیے جانے تمام الزامات کو مسترد کرتی ہیں۔ ملٹری فرسٹ گرلز شمالی کوریائی رہنما کم جونگ اُن اور ان کے طرز سیاست کی شدید مخالف ہیں۔ یہ خواتین صرف شمالی کوریائی ثفاقت میں دلچسپی رکھتی ہیں۔

کم جون اُن نے 2012ء میں’’مورانبونگ گرل بینڈ‘‘ بنایا تھا۔ یہ گروپ شمالی کوریا میں بہت مشہور ہے۔ یہ خواتین وردی پہن کر، مختصر اور چمکیلے کپڑے اور اونچی ایڑی والے جوتے پہن کر کلاسیکی، لوک موسیقی، 1980ء کی دہائی اور راک میوزک کے امتزاج پر پرفارم کرتی ہیں۔ ان میں سے زیادہ تر گانوں کا سیاست اور فوج سے کوئی نہ کوئی تعلق ہوتا ہے۔

’ملٹری فرسٹ گرلز‘ کی کوشش ہوتی ہے کہ ٹوکیو میں بھی بالکل شمالی کوریا کے طرز کا ماحول پیش کیا جائے۔ اسی وجہ سے چُن چُن اور ان کے گروپ کی دیگر لڑکیاں شمالی کوریا کا میک اپ ہی استعمال کرتی ہیں۔ یہ میک اپ چین اور شمالی کوریا کی سرحد پر واقع دکانوں سے خریدا جاتا ہے۔

’’مورانبونگ گرل بینڈ‘‘ زیادہ تر شمالی کوریا پر برسر اقتدار جماعت اور فوجیوں کی محفلوں میں اپنی پرفارمنس پیش کرتی ہیں۔ اسی طرح ٹوکیو میں شو کے دوران مداح بھی خوب تیاری کر کے آتے ہیں۔ مثال کے طور پر شمالی کوریائی فوج کا یونیفارم پہننا پسند کیا جاتا ہے۔

کسی بھی پرفارمنس کے موقع پر شمالی کوریا کے بانی کم اِل سُنگ اور ان کے صاحبزادے کم جونگ اِل کو کیسے بھولا جا سکتا ہے۔ جاپان میں شمالی کوریا فین کلب میں ان دونوں کے تصاویر والے کلپ بھی کپڑوں پر لگائے جاتے ہیں۔

’ملٹری فرسٹ گرلز‘ کی سربراہ چُن چُن کے مطابق کھانوں میں بھی شمالی کوریا سے محبت جھلکتی ہے۔ ان کے بقول کسی بھی محفل کے موقع پر صرف شمالی کوریائی طعام رکھے جاتے ہیں۔ یہاں تک کے خلال کے لیے رکھے جانے والے ٹوتھ پِکس پر شمالی کوریائی پرچم لگایا جاتا ہے۔

رواں برس اگست سے لے کر اب تک شمالی کوریا نے دو مرتبہ ایسے میزائل داغے، جنہوں نے جاپان کی فضائی حدود سے گزرنے کے بعد اپنے ہدف کو نشانہ بنایا۔ ستمبر میں پیونگ یانگ نے چھٹا جوہری تجربہ کیا۔ اس وجہ سے خطے میں پیدا کشیدگی کو نظر انداز کرتے ہوئے ملٹری فرسٹ گرلز اپنی سرگرمیاں جاری رکھے ہوئے ہیں۔

چھ اگست 1945ء کو امریکی جہاز Enola Gay نے ہیروشیما پر پہلا ایٹم بم گرایا تھا۔ اس بم کو’لٹل بوائے‘ کا بے ضرر سا نام دیا گیا تھا۔ اُس وقت اس شہر کی آبادی ساڑھے تین لاکھ تھی اور حملے کے فوری بعد ستر ہزار لوگ ہلاک ہو گئے تھے۔ چند دنوں کے دوران مرنے والوں کی تعداد دگنی ہو گئی تھی۔

منصوبے کے مطابق ہیروشیما پر یکم اگست 1945ء کو حملہ کیا جانا تھا تاہم خراب موسم کی وجہ سے امریکیوں کو اسے ملتوی کرنا پڑا۔ پانچ روز بعد بمبار جہاز ’انولا گے‘ تیرہ رکنی عملے کے ساتھ اپنا مشن پورا کرنے کے لیے روانہ ہوا۔ اس ٹیم کو راستے میں معلوم ہوا کہ وہ ایٹم بم گرانے جا رہی ہے۔

ہیروشیما پر حملے کے تین روز بعد امریکیوں نے ناگاساکی پر دوسرا ایٹم بم گرایا۔ منصوبے کے مطابق دوسرا ایٹم بم کیوٹو پر گرایا جانا تھا۔ امریکی وزارت دفاع کی مخالفت کے بعد یہ ہدف تبدیل کر دیا گیا۔ ’فیٹ مین‘ نامی یہ بم 22 ٹن وزنی تھا۔ اس جوہری بم نے بھی قریب ستر ہزار افراد کی جان لی تھی۔

1945ء میں ناگاساکی میں اسلحہ ساز کمپنی مٹسوبیشی کی مرکزی دفتر قائم تھا۔ وہاں بحری اڈہ بھی موجود تھا۔ اس شہر میں وہ تارپیڈو بھی تیار کیے گئے تھے، جوجاپان نے پرل ہاربر پر حملے کے لیے استعمال کیے تھے۔ ناگاساکی میں بہت کم ہی جاپانی فوجی تعینات تھے۔ تاہم خراب موسم کی وجہ سے شپ یارڈ کو نشانہ نہ بنایا جا سکا۔

حملوں کے بعد بھی کئی ماہ تک تابکاری اثرات ہزاروں افراد کی موت کا باعث بنتے رہے۔ صرف ہیروشیما میں 1945ء کے اختتام تک ہلاک ہونے والے شہریوں کی تعداد میں ساٹھ ہزار کا اضافہ ہو چکا تھا۔ ہلاکتوں میں اضافہ تابکاری، بری طرح جھلس جانے اور دیگر زخموں کی وجہ سے ہوا۔ بعد ازاں لگائے گئے اندازوں کے مطابق دوہرے جوہری حملوں میں مرنے والوں کی تعداد دو لاکھ تیس ہزار تک رہی تھی۔

ہیروشیما اور ناگاساکی پر حملوں کے بعد بھی متعدد جاپانی شہریوں کو خدشہ تھا کہ تیسرا ایٹمی بم ٹوکیو پر گرایا جائے گا۔ جاپان نے ہتیھار پھینکنے کا اعلان کیا اور اس طرح ایشیا میں دوسری عالمی جنگ کا اختتام ہوا۔ امریکی صدر ہیری ٹرومین نے جوہری حملوں کے احکامات دیے تھے۔ کئی مؤرخین ان حملوں کو جنگی جرائم قرار دیتے ہیں۔

ہیروشیما کے تباہ شدہ شہر کو مکمل طور پر دوبارہ تعمیر کیا گیا ہے۔ صرف دریائے اوٹا پر واقع ایک جزیرے پر امن پارک پہلے ہی طرح قائم ہے۔ یہاں پر ایک یادگاری شمع بھی روشن کی گئی ہے۔ یہ شمع اس وقت بجھائی جائے گی، جب دنیا سے آخری ایٹم بم کا خاتمہ ہو جائے گا۔

ناگاساکی میں 1955ء سے جوہری بم حملوں کے حوالے سے ایک عجائب گھر اور ان حملوں کے نتیجے میں ہلاک ہونے والے افراد کی یاد میں ایک امن پارک قائم ہے۔ جاپان میں 1945ء کے ان واقعات میں ہلاک ہونے والوں کی یاد کو بہت اہمیت دی جاتی ہے۔ دنیا بھر میں ہیروشیما اور ناگاساکی کو ایٹمی ہتھیاروں کی تباہ کاریوں کی علامت کے طور پر دیکھا جاتا ہے۔

اگست 1945ء کے ان حملوں میں ہلاک ہونے والوں کی یاد میں دنیا بھر میں تقریبات منعقد کی جاتی ہیں۔ ہیروشیما میں منقعد ہونے والی سالانہ تقریب میں حملوں میں بچ جانے والے، ہلاک ہونے والوں کے لواحقین، شہری اور سیاستدان شرکت کرتے ہیں اور اس دوران ایک منٹ کے لیے خاموشی اختیار کی جاتی ہے۔

پیروشیما میں امن یادگاری پارک میں ایک تقریب سے خطاب کرتے ہوئے جاپانی وزیراعظم شینزو آبے نے کہا کہ جاپان دنیا بھر سے جوہری ہتھیاروں کے خاتمے کے لیے آواز اٹھاتا رہے گا۔