جنگی جرائم کے الزام میں اسرائیل کو عالمی عدالت لے جانے کی کوشش
افسر اعوان5 اگست 2014
فلسطینی اتھارٹی کے وزیر خارجہ ریاض المالکی آج منگل کے روز ہالینڈ کے شہر دی ہیگ میں قائم عالمی فوجداری عدالت جا رہے ہیں جہاں وہ اسرائیل کے خلاف جنگی جرائم کا مقدمہ قائم کرنے کی کوششوں میں ہیں۔
تصویر: dapd
اشتہار
اسرائیل کی جانب سے غزہ پٹی کے علاقے میں جاری فوجی کارروائی میں خواتین اور بچوں کی ایک بڑی تعداد سمیت 1800 سے زائد فلسطینی ہلاک ہو چکے ہیں۔
فلسطینی اتھارٹی کے وزیر خارجہ ریاض المالکی کا عالمی فوجداری عدالت یا آئی سی سی کا یہ دورہ اسرائیل اور حماس کے درمیان طے پانے والے تین روزہ جنگ بندی معاہدے کے فوری بعد کیا جا رہا ہے۔ مصر، اقوام متحدہ اور امریکی کوششوں کے نتیجے میں طے پانے والے اس عارضی سیز فائر کا مقصد مستقل جنگ بندی معاہدے کی راہ ہموار کرنا ہے۔
غزہ کے شہریوں پر ٹوٹتی قیامت
اسرائیل کی جانب سے غزہ پٹی میں حماس کے جنگجوؤں کے خلاف دو ہفتے سے جاری کارروائی میں اب تک بڑی تعداد میں بچوں اور خواتین سمیت سینکڑوں فلسطینی مارے جا چکے ہیں۔
تصویر: DW/Shawgy el Farra
غزہ کے شہریوں کی بے بسی
مسلسل حملوں کے نتیجے میں غزہ کے اندر پورا نظام درہم برہم ہو چکا ہے۔ غزہ کا ستر فیصد علاقہ بجلی سے محروم ہے جبکہ صاف پانی کی فراہمی کا مسئلہ بھی سنگین شکل اختیار کرتا جا رہا ہے۔ غزہ کے بے بس باسیوں کے پاس سوائے اپنے عزیزوں کی موت پر رونے کے اور کوئی چارہ نہیں ہے۔
تصویر: DW/Shawgy el Farra
اپنے پیاروں کی موت پر نوحہ کناں
غزہ پٹی کے جنوبی علاقے رفاہ میں اسرائیلی شیلنگ میں مارے جانے افراد کے قریبی عزیز اُن کی موت پر آنسو بہا رہے ہیں۔ اسرائیلی ٹینکوں کی گولہ باری کے ساتھ ساتھ اسرائیلی فضائیہ کی جانب سے بھی حماس کے ٹھکانوں پر بمباری جاری ہے۔
تصویر: Reuters
اپنے وطن میں در بدر
اسرائیلی آپریشن کے نتیجے میں غزہ کے شمالی حصے سے ہزارہا فلسطینی شہریوں کو اپنا گھر بار چھوڑنا پڑا ہے۔ بچوں اور خواتین کی بڑی تعداد نے مختلف اسکولوں اور اقوام متحدہ کی جانب سے فراہم کیے گئے مراکز میں پناہ لے رکھی ہے۔
تصویر: DW/Shawgy el Farra
معصوم آنکھوں میں لرزتا خوف
ایک فلسطینی لڑکا اپنے گھر کا کچھ بچا کھچا سامان لیے ایک ایسے گھر کے پاس سے گزر رہا ہے، جو پولیس کے مطابق اسرائیل کی جانب سے کیے جانے والے ایک فضائی حملے میں تباہ ہو گیا تھا۔ عالی سطح پر فائر بندی کی اپیلوں کے باوجود فلسطینی ہلاکتوں کا سلسلہ جاری ہے اور مرنے والوں کی تعداد پانچ سو سے بھی تجاوز کر گئی ہے۔
تصویر: Reuters
آگ اگلتی اسرائیلی توپیں
غزہ پٹی کے ساتھ ملنے والی اسرائیلی سرحد کے قریب ایک اسرائیلی توپ خانے سے 155 ملی میٹر کے گولے غزہ میں عسکریت پسندوں کے مبینہ ٹھکانوں کی جانب پھینکے جا رہے ہیں۔ اسرائیل کا موقف ہے کہ شہریوں کو پہلے سے مطلع کر دیا گیا تھا کہ وہ غزہ کے شمالی علاقے خالی کر دیں جبکہ فلسطینیوں کا کہنا ہے کہ غزہ پٹی کا کوئی بھی مقام اسرائیلی حملوں سے محفوظ نہیں ہے۔
تصویر: J.Guez/AFP/Getty Images
زیر زمین سرنگوں کے خلاف زمینی آپریشن
اسرائیلی ٹینک غزہ پٹی کے شمالی حصے میں سرگرم عمل نظر آ رہے ہیں۔ غزہ کے خلاف زمینی آپریشن شروع کرنے والے اسرائیل کا کہنا ہے کہ وہ خاص طور پر ایسی زیر زمین سرنگوں کو نشانہ بنا رہا ہے، جو حماس کے جنگجوؤں نے بنا رکھی ہیں اور جن کے راستے یہ جنگجو زمین کے اندر سے سرحد پار کر کے اسرائیلی سرزمین تک بھی جا سکتے ہیں۔
تصویر: Reuters
’کس سے منصفی چاہیں‘
ایک فلسطینی خاتون اپنے قریبی عزیزوں کے ایک گھر کے ملبے کے پاس بیٹھی بین کر رہی ہے۔ پولیس کا کہنا ہے کہ خان یونس مہاجر کیمپ کے قریب واقع یہ مکان اسرائیلی گولہ باری کے نتیجے میں تباہ ہو گیا تھا۔
تصویر: Reuters
’کریدتے ہو جو اب راکھ، جستجو کیا ہے؟‘
ایک فلسطینی شہری اپنے تباہ شُدہ مکان کے ملبے میں سے ایک میٹریس نکال کر باہر لا رہا ہے۔ یہ مکان غزہ پٹی کے جنوبی حصے کے علاقے خان یونس میں واقع تھا۔ دو ہفتوں سے جاری اسرائیلی حملوں کی شدت میں سرِ دست کسی کمی کے آثار نظر نہیں آ رہے ہیں۔
تصویر: Reuters
پناہ کی تلاش میں
غزہ کے مشرقی علاقے شجائیہ کے باسیوں کے لیے اتوار بیس جولائی کا دن انتہائی خونریز ثابت ہوا۔ اُس روز اسرائیل کی جانب سے اس علاقے پر شدید گولہ باری کے بعد سڑکوں پر لاشیں ہی لاشیں نظر آ رہی تھیں۔ اس کے بعد وہاں کے رہائشی افراتفری میں اپنے بچوں کو لے کر محفوظ مقامات کی طرف دوڑ پڑے۔ شدید گولہ باری کی وجہ سے ایمبولینسیں بھی سرحد کے قریب واقع مقامات پر پھنسے ہوئے لوگوں کی مدد کے لیے نہ جا سکیں۔
تصویر: M.Abed/AFP/Getty Images
کھنڈرات کے بیچوں بیچ
دو ہفتوں سے جاری اسرائیلی آپریشن نے غزہ پٹی کے کئی مقامات کو کھنڈرات میں تبدیل کر دیا ہے۔ اس آپریشن کے نتیجے میں سب سے زیادہ جانی و مالی نقصان کا سامنا عام شہریوں کو کرنا پڑا ہے تاہم اسرائیل کا الزام ہے کہ حماس اور دیگر جہادی گروپ ان فلسطینی شہریوں کو انسانی ڈھال کے طور پر استعمال کرتے رہے اور یہ کہ ان شہریوں کو اسلحے کے زور پر جنگجوؤں کے ٹھکانوں اور عسکری مراکز کے قریب پکڑ کر رکھا گیا۔
تصویر: DW/Shawgy el Farra
10 تصاویر1 | 10
مالکی نے گزشہ ہفتے اقوام متحدہ سے مطالبہ کیا گیا تھا کہ وہ غزہ پٹی پر کیے جانے والے فضائی حملوں اور زمینی کارروائی کے دوران اسرائیل کی طرف سے انسانی حقوق کی خلاف ورزیوں اور جنگی جرائم کے واقعات کی تحقیقات کرائے۔
یاد رہے کہ اسرائیل کی طرف سے غزہ پٹی میں ملٹری آپریشن کے دوران اس فلسطینی علاقے میں قائم اقوام متحدہ کے اسکولوں کو بھی متعدد بار نشانہ بنایا گیا ہے۔ اسرائیلی فضائی حملوں سے بچنے کے لیے فلسطینیوں کی ایک بڑی تعداد نے اقوام متحدہ کے زیر انتظام چلنے والے ان اسکولوں میں پناہ لے رکھی ہے۔
خبر رساں ادارے روئٹرز کے مطابق اسرائیل آئی سی سی کا رکن ملک نہیں ہے لہذا بین الاقوامی عدالت اس ملک کے اندر کسی معاملے کی تحقیقات نہیں کر سکتی۔ تاہم اگر اقوام متحدہ کی سلامتی کونسل اپنی قرار داد کے ذریعے آئی سی سی کو مینڈیڈیٹ دیتی ہے تو پھر یہ عدالت اسرائیل کے خلاف جنگی جرائم کے الزامات کی تحقیقات کر سکتی ہے۔ تاہم ایسی صورت میں اسرائیل کے طاقتور اتحادی امریکا کی طرف سے ایسی کسی کوشش کو ویٹو کرنے کا راستہ موجود ہے۔
غزہ حکام کے مطابق اسرائیل کی طرف سے غزہ پٹی کے علاقے میں فضائی بمباری اور زمینی کارروائی کے نتیجے میں 1867 فلسطینی ہلاک ہوئے، جن میں سے اکثریت سویلین کی تھی۔ تاہم اسرائیل کا مؤقف ہے کہ ہلاک ہونے والوں کی قریب نصف تعداد عسکریت پسندوں کی تھی۔
دوسری طرف اسرائیل کا کہنا ہے کہ آٹھ جولائی سے شروع ہونے والی لڑائی سے اب تک اس کے 64 فوجی جبکہ تین سویلین ہلاک ہوئے ہیں۔ اسرائیل سویلین ہلاکتیں غزہ پٹی کی جانب سے فائر کیے جانے والوں راکٹوں کے باعث ہوئیں جبکہ اسرائیل کی تمام تر فوجی ہلاکتیں 17 جولائی سے غزہ پٹی میں شروع ہونے والی زمینی کارروائی کے بعد ہوئیں۔
دی ہیگ میں موجود فلسطینی وفد کی طرف سے روئٹرز کو بتایا گیا کہ فلسطینی اتھارٹی کے وزیر خارجہ ریاض المالکی ہالینڈ کے وزیر خارجہ فرانس ٹیمرمنز Frans Timmermans سے بھی ملاقات کریں گے۔