لندن سے جمعرات 12 مارچ کو موصولہ رپورٹوں کے مطابق توقع ہے کہ برٹش فارن سیکرٹری کوپر اپنے اس دورے کے دوران خطے میں برطانیہ کے پارٹنر ممالک کے ساتھ اپنی بات چیت میں دوطرفہ تعاون سے متعلق مشاورت کریں گی، تاکہ ''آبنائے ہرمز کے سمندری علاقے میں بحری جہازوں پر کیے جانے والے حملوں کے باوجود عالمی منڈیوں کو خام تیل کی ترسیل کے تسلسل کو یقینی بنایا جا سکے۔‘‘

نئے ایرانی سپریم لیڈر کا پہلا بیان، بدلے کے عزم کا اظہار

لندن میں برطانوی دفتر خارجہ کے جاری کردہ ایک بیان کے مطابق اپنے اس دورے سے قبل ایویٹ کوپر نے خلیج کی علاقائی طاقت اور قدامت پسند بادشاہت سعودی عرب کو ''خلیج فارس کے علاقے میں برطانیہ کا لازمی پارٹنر ملک‘‘ قرار دیا، جو خطے میں موجودہ جنگ کے آغاز کے بعد سے ''ایرانی حکومت کے اندھا دھند حملوں کا ہدف‘‘ بن رہا ہے۔

مشرق وسطیٰ میں دو فریقوں کے طور پر ایران اور امریکہ اور اسرائیل کے مابین موجودہ تنازعے سے متعلق برطانیہ کا ابتدائی ردعمل ایسا تھا، جس پر امریکی صدر ڈونلڈ ٹرمپ اور قبرص کی حکومت نے باقاعدہ تنقید کی تھی۔

ایران کا خطے میں اقتصادی مراکز اور بینکوں کو ہدف بنانے کا اعلان

'آپ تو ایسے نا تھے!‘، ٹرمپ کا اسٹارمر سے شکوہ

تب 28 فروری کو ایران جنگ شروع ہونے کے ایک دن بعد یکم مارچ کو ایک ایرانی ساختہ ڈرون سے جنوبی قبرص میں ایک برطانوی فضائی اڈے کے رن وے پر حملہ کیا گیا تھا، لیکن اس کے بعد برطانوی وزیر اعظم کیئر اسٹارمر نے ابتدائی طور پر کہا تھا کہ لندن اس تنازعے میں کوئی بھی کردارا دا نہیں کرنا چاہتا۔

تاہم اس کے بعد سے برطانوی حکومت امریکہ کو یہ اجازت دے چکی ہے کہ وہ دو برطانوی فضائی اڈوں کو ''ایران کے خلاف مخصوص دفاعی عسکری آپریشنز‘‘ کے لیے اس مقصد کے تحت استعمال کر سکتا ہے کہ ایرانی ''میزائل پروگرام کو اس کی بنیادوں پر حملہ کر کے تباہ‘‘ کر دیا جائے۔

ٹرمپ برطانوی فضائی اڈوں کے استعمال کی اجازت نہ دینے پر اسٹارمر سے 'بہت مایوس‘

گزشتہ منگل کے روز ایک برطانوی جنگی بحری جہاز بھی اس لیے جنوبی انگلستان سے مشرقی بحیرہ روم کی طرف روانہ ہو گیا تھا کہ خطے میں ''برطانوی دفاعی صلاحیتوں میں اضافہ‘‘ کیا جا سکے۔

ادارت: جاوید اختر