جونسن اور کوربن کا ٹی وی مباحثہ: بریگزٹ کا معاملہ چھایا رہا
20 نومبر 2019
برطانیہ میں رواں برس بارہ دسمبر کو پارلیمانی انتخابات کا انعقاد ہو رہا ہے۔ ان انتخابات کے سلسلے میں وزیراعظم بورس جونسن اور اپوزیشن لیڈر جیریمی کوربن کے درمیان ٹی وی مباحثے میں بریگزٹ کا موضوع چھایا رہا۔
تصویر: picture-alliance/AP/Itv
اشتہار
کنزرویٹو پارٹی کے لیڈر اور وزیراعظم بورس جانسن کو بریگزٹ کے معاملے پر اپوزیشن کی سیاسی جماعت لیبر پارٹی کے رہنما جیریمی کوربن کے تلخ جملوں کا بھی سامنا کرنا پڑا۔ منگل انیس نومبر کی شام کو یہ مباحثہ ٹیلی وژن پر پیش کیا گیا۔ یہ انتخابات سے قبل کا پہلا مباحثہ تھا۔
مباحثے میں بورس جانسن نے اس عزم کا اظہار کیا کہ وہ اگلے برس اکتیس جنوری کو یورپی یونین کو خیرباد کہہ دیں گے اور یونین کے ساتھ تجارتی سمجھوتے کو بھی سن 2020 کے ختم ہونے سے قبل طے کر لیں گے۔ اس کے جواب میں لیبر پارٹی کے لیڈر نے واضح کیا کہ اُن کی جماعت برسراقتدار آئی تو بریگزٹ معاملے پر ڈیل طے کرنے کے مذاکرات دوبارہ کیے جائیں گے۔
جیریمی کوربن نے یہ بھی واضح کیا کہ حکومت سنبھالنے کے تین ماہ کے دوران بریگزٹ پر ایک مرتبہ پھر عوامی رائے کے حصول کا ریفرنڈم کرایا جائے گا اور اس میں برطانوی عوام کو یہ ایک آپشن بھی دیا جائے گا کہ کیا آیا یونین سے نکلنے کے چھ ماہ کے بعد یونین میں دوبارہ شمولیت اختیار کی جائے۔
منگل انیس نومبر کی شام کوربن اور جونسن کے درمیان یہ مباحثہ ٹیلی وژن پر پیش کیا گیاتصویر: picture-alliance/dpa/AP/Itv
مباحثے کے دوران ایک موقع پر بورس جونسن نے اپنے حریف لیڈر سے پوچھا کہ وہ یونین میں رہنے کو ترجیح دیں گے یا چھوڑنا اُن کے نزدیک اہم ہے۔ اس کی وضاحت میں کوربن کوئی واضح موقف اختیار کرنے سے قاصر رہے۔ انہوں نے اصرار کیا کہ وہ دوسرے ریفرنڈم میں سامنے آنے والی عوامی رائے کا احترام کریں گے۔
بریگزٹ معاملے پر بورس جونسن اور جیریمی کوربن کے درمیان انتہائی گرما گرم بحث دیکھنے میں آئی۔ لیبر پارٹی کے لیڈر نے یورپی یونین کو چھوڑنے کے لیے وزیراعظم کے مقرر کردہ نظام الاوقات کو لغو اور احمقانہ قرار دیا۔ اس کے جواب میں جونسن نے لیبر پارٹی پر الزام لگایا کہ وہ تاخیری حربوں سے بریگزٹ کی راہ میں رکاوٹیں کھڑی کرنے کی کوششوں میں ہے۔
اس مباحثے میں دونوں لیڈروں نے ہیلتھ سروس کے ساتھ ساتھ چند اور موضوعات پر بھی گفتگو کی۔ مباحثے کے حوالے سے فوری طور مرتب کیے گئے رائے عامے کے جائزے کے مطابق انیس نومبر کا مباحثہ بورس جونسن نے جیت لیا ہے اور ان کے حق میں اکاون فیصد ووٹ پڑے جب کہ اپوزیشن لیڈر کی معروضات کو انچاس فیصد لوگوں نے پسند کیا۔
کنزرویٹو پارٹی نے اپنی انتخابی مہم کا آغاز قدرے سست روی اور کنفیوژن سے کیا ہے لیکن اب اِس کی مہم مضبوط بنیادوں پر استوار ہو چکی ہے۔ اس وقت رائے عامہ کے جائزوں کے مطابق کنزرویٹو پارٹی کو اپنی حریف جماعت لیبر پارٹی پر مناسب سبقت حاصل ہے۔ اس وقت دونوں جماعتیں کسی فیصلے کے بغیر ووٹرز پر توجہ مرکوز کیے ہوئے ہیں۔
ع ح ⁄ م م (ڈی پی اے، روئٹرز)
لندن جانے کی دس وجوہات
بریگزٹ کے معاملے پر برطانوی پارلیمان میں رائے شماری پر پوری دنیا کی نگاہیں ہیں۔ مگر لندن کے مرکزِ نگاہ ہونے کی اور بھی وجوہات ہیں۔ یہ یورپ میں سیر کے لیے جانے والوں کا سب سے بڑا مرکز ہے، مگر کیوں؟
تصویر: picture-alliance/Daniel Kalker
دریائے ٹیمز
لندن میں سیاحت کے لیے سب سے زیادہ مشہور جگہیں دریائے ٹیمز کے کنارے ہیں۔ لندن میں اس دریا کے جنوبی کنارے پر ’لندن آئی‘، برطانوی پارلیمان کا حامل ویسٹ منسٹر محل اور مشہورِ زمانہ بگ بین ٹاور دیکھے جا سکتے ہیں۔
تصویر: picture-alliance/robertharding/M. Simoni
پُل
دریائے ٹیمز پر کئی پل ہیں، مگر ٹاور برج جیسی شہرت کسی دوسرے پل کی نہیں۔ سیاح اس پل کے انجن روم میں جا سکتے ہیں، جہاں کوئلے کے اصل برنر اور بھاپ کے انجن موجود ہیں، جو کسی دور میں کشتیوں کے گزرنے کے لیے پل کو اوپر اٹھانے کا کام سرانجام دیتے تھے۔ وہ افراد جو اونچائی سے ڈرتے نہیں، وہ اس پل پر شیشے کی بنی 42 میٹر اونچی ’اسکائی واک‘ پر چل سکتے ہیں۔
تصویر: picture-alliance/robertharding/A. Copson
عجائب گھر
لندن میں وکٹوریہ اور البرٹ میوزم اور برٹش میوزم کو دنیا بھر میں بہترین عجائب گھر قرار دیا جاتا ہے۔ ٹیٹ ماڈرن میوزم میں جدید فنی تخلیقات موجود ہیں، جب کہ یہ ماضی میں ایک بجلی گھر ہوا کرتا تھا۔ بہت سے دیگر عجائب گھروں کی طرح اس میوزم میں داخلے کی بھی کوئی فیس نہیں۔
تصویر: Switch House, Tate Modern/Iwan Baan
موسیقی
کانسرٹس، کانسرٹس اور کانسرٹس۔ موسیقی کے دل دادہ افراد کو لندن ضرور جانا چاہیے۔ اس شہر میں کسی چھوٹے سے پب سے لے کر موسیقی کی بڑی تقریبات تک، ہر جگہ موسیقی کی بہار ہے۔ خصوصاﹰ موسم گرما میں ہائیڈ پارک لندن میں تو جیسے میلہ لگا ہوتا ہے۔
تصویر: picture-alliance7Photoshot/PYMCA
محلات
بکنگھم پیلس ملکہ برطانیہ کی سرکاری رہائش گاہ ہے۔ اس محل کے متعدد کمرے جولائی تا اکتوبر عام افراد کے دیکھنے کے لیے کھول دیے جاتے ہیں، کیوں کہ اس وقت ملکہ اسکاٹ لینڈ میں ہوتی ہیں۔ اور صرف یہی نہیں بلکہ شاہی خاندان کے دیگر بہت سے محل بھی آپ دیکھ سکتے ہیں۔
تصویر: picture-alliance/DPA/M. Skolimowska
پارک
لندن میں بہت سے قابل دید پارک، باغات اور باغیچے ہیں۔ دنیا کے کسی بھی دوسرے بڑے شہر کے مقابلے میں سب سے زیادہ سبزہ لندن کا خاصا ہے۔ لندن کے ریجنٹ پارک کی پریمروز پہاڑی سے پورا شہر آپ کی نگاہوں کے سامنے ہوتا ہے۔
تصویر: picture-alliance/Design Pics/Axiom
دکانیں
لندن میں ہر طرح کے بجٹ کے لیے اور ہر دلچسپی کا سامان موجود ہے۔ چھوٹے بوتیک سے لے کر بڑے بڑے ڈیپارٹمنٹل اسٹورز تک، حتیٰ کہ سیکنڈ ہینڈ سامان کی دکانیں بھی۔ اختتام ہفتہ پر لندن میں جگہ جگہ مارکیٹیں لگی نظر آتی ہیں۔ اس تصویر میں کیمڈن مارکیٹ کا منظر ہے۔ یہ مارکیٹ نوجوانوں میں بے حد مقبول ہے۔
تصویر: picture-alliance/Eibner
گرجا گھر
ویسٹ منسٹر ایبے کے ساتھ سینٹ پال کا کیتھیڈرل لندن کا مشہور زمانہ گرجا گھر ہے، مگر لندن میں بہت سے دیگر کیتھیڈرلز بھی ہیں، جو سیاحوں کو اپنی جانب کھینچتے ہیں۔ ویسٹ منسٹر ایبے سن 1066ء سے شاہی خاندان کے انتقال کر جانے والے افراد کی آخری آرام گاہ ہے۔ اس میں مشہور زمانہ سائنس دانوں کی قبریں بھی ہیں، جن میں ڈارون اور جے جے تھامسن سے لے کر اسٹیفن ہاکنگ تک کئی شخصیات شامل ہیں۔
دریائے ٹیمز کے جنوبی کنارے پر ’شارڈ‘ سے لندن شہر پر ایک طائرانہ نگاہ۔ 244 میٹر اونچائی سے جیسے کوئی پورا شہر آپ کے سامنے رکھ دے۔ شیشے اور اسٹیل سے بنی یہ عمارت مغربی یورپ کی سب سے بلند عمارت ہے، اسے اسٹار آرکیٹکٹ رینزو پیانو نے ڈیزائن کیا تھا۔
تصویر: picture-alliance/robertharding/M. Ertman
مے خانے
لندن کی تاریخ ہی مکمل نہیں ہوتی اگر اس شہر سے یہ مے خانے نکال دیے جائیں۔ مقامی طور پر انہیں ’پب‘ کہا جاتا ہے اور یہاں آپ کو ہر طرح کی بیئر اور الکوحل والے دیگر مشروبات کی بہتات ملتی ہے۔ اس کے علاوہ یہاں لوگ گپ شپ بھی کرتے ہیں اور کھاتے پیتے شامیں گزارتے ہیں۔