چینی جسم کے اندر داخل ہوتے ہی دو سے پانچ گنا تیزی سے پہلے سے موجود چربی کا حصہ بن جاتی ہے۔ اس کا مطلب یہ کہ چینی کے ذریعے ہم چربی والے خلیات کو براہ راست غذا فراہم کرتے ہیں۔ اس کے علاوہ چینی جگر کو بھی متاثر کرتی ہے اور اس کی زیادتی سے کوئی بھی شخص ذیابیطس ٹائپ ٹو کا مریض بھی بن سکتا ہے۔

فربہ افراد کے دماغ پر بھی چینی بالکل الکوحل یا دیگر نشہ آور اشیاء کی طرح اثر انداز ہوتی ہے اور اس سے ڈوپامِین زیادہ مقدار میں خارج ہونے لگتا ہے۔ اگر آپ دس دن تک ایسے مشروبات اور کھانوں سے پرہیز کرنے کی کوشش کریں، جن میں چینی کی وافر مقدار شامل ہوتی ہے تو دو دن بعد ہی آپ کا سر درد کرنا شروع کر دے یا آپ چڑچڑے ہو جائیں یا پھر آپ کا دل میٹھا کھانے کو چاہے تو سمجھ لیجیے کہ آپ کو چینی کی لت پڑ چکی ہے۔

انسانی نظام ہضم میں پائے جانے والے صحت مند بیکٹیریا نہ صرف خوراک ہضم کرنے میں مدد دیتے ہیں بلکہ وہ معدے اور آنتوں کو ان پر حملہ کرنے والے جرثوموں سے بھی بچاتے ہیں۔ نظام ہضم میں جتنی زیادہ شکر موجود ہو گی، اتنا ہی زیادہ مختلف بیماریوں کا سبب بننے والے بیکٹیریا کو افزائش کا موقع ملے گا۔ جسم میں طفیلی جرثوموں کو میٹھا بہت راس آتا ہے۔ ریح، قبض اور اسہال کی ایک بڑی وجہ یہی بہت زیادہ چینی بنتی ہے۔

چینی کا بہت زیادہ استعمال جسم کے مدافعتی نظام کو کمزور کر دیتا ہے۔ چینی کھاتے ہی مدافعتی نظام کی کارکردگی چالیس فیصد تک کم ہو جاتی ہے۔ اس کے علاوہ چینی وٹامن سی کی دشمن ہے اور خون کے سفید خلیوں کو بیکٹیریا اور وائرس کے خلاف لڑنے کے لیے اسی وٹامن سی کی ضرورت ہوتی ہے۔

سرطان کے خلیات کو پروان چڑھنے کے لیے بہت زیادہ چینی کی ضرورت ہوتی ہے۔ اس سلسلے میں بائیو کیمسٹری کے ماہرین کا خیال ہے کہ چینی کی بہت زیادہ مقدار سرطان کا باعث بن سکتی ہے۔ اس بارے میں ہارورڈ یونیورسٹی کی بھی ایک طبی تحقیق موجود ہے۔

بہت زیادہ میٹھا کھانے سے زیادہ تر انسانوں میں بڑھاپے کی تیز رفتار آمد کا سبب وہ عمل بنتا ہے، جسے گلائیکیشن کہتے ہیں۔ اس سے مراد جلد کے خلیات میں بہت زیادہ میٹھے کا جمع ہونا ہے۔ اس طرح جلد کے نیچے شکر کے سالموں کے جمع ہونے سے جلد سخت ہو جاتی ہے اور اس طرح جلد کے خلیات میں سے نقصان دہ مادے بھی خارج نہیں ہو پاتے اور جلد تیزی سے بوڑھا ہونا شروع ہو جاتی ہے۔

چینی کے شوقین افراد میں جارحانہ رویہ یا جلد غصہ آ جانے کے امکانات بھی زیادہ ہوتے ہیں۔ یہ بات ثابت ہو چکی ہے کہ چینی توجہ کی کمی کی وجہ سے بچوں میں پیدا ہونے والے مرض Attention deficit hyperactivity disorder کا سبب بھی بنتی ہے۔ چینی کی بہت زیادہ مقدار کی بناء پر بچے کسی بھی کام پر مکمل توجہ نہیں دے پاتے اور پریشان اور بے چپن بھی رہتے ہیں۔

متعدد جائزوں کے مطابق چینی کا زیادہ استعمال یادداشت کی کمزوری کا سبب بھی بنتا ہے۔ خون میں شکر کی زیادہ مقدارکا ذہنی امراض سے بھی براہ راست تعلق ہے۔