جہادی خواتین کی ’ الخنساء بریگیڈ‘ کا منشور
5 فروری 2015![](https://static.dw.com/image/18236498_800.webp)
اس منشور میں معاشرے میں عورت کے مقام اور اُس کی زندگی کے مقاصد کے بارے میں نہایت دلچسپ مگر بنیاد پرستی سے بھرپور تصورات شامل ہیں۔
اسلامک اسٹیٹ یا آئی ایس کے خواتین پر مشتمل دھڑے ’الخنساء بریگیڈ‘ نے یہ منشور تیار کیا ہے۔ اس کے مطابق، ’’لڑکیوں کی 9 سال کی عمر میں شادی ہو سکتی ہے تاہم شادی کے لیے لڑکی کی بہترین عمر 16 سے 17 سال ہے۔ ماں بننا ہر عورت کے لیے اُس کے وجود کا مقصد ہونا چاہیے۔ خواتین کو مکمل پردے میں اور چھُپے رہنا چاہیے۔ تمام عورتوں کو گھر پر رہنا چاہیے اور انہیں فیشن بُوتیکس یا فینسی ملبوسات اور دیگر اشیاء کی فروخت کی جگہوں سے پرہیز کرنا چاہیے کیونکہ یہ شیطانی عمل ہیں۔‘‘
’ کیولیم فاؤنڈیشن‘ کا جس نے اس متن کا انگریزی زبان میں ترجمہ شائع کیا ہے، کہنا ہے کہ ’الخنساء بریگیڈ‘ کے منشور میں مسلم خواتین کی جو تصویر پیش کی گئی ہے وہ اُس سے کہیں زیادہ سادہ اور متین ہے جو مغربی جہادی خواتین پیش کرتی ہیں۔ فاؤنڈیشن کے مطابق مغربی ممالک سے اسلامک اسٹیٹ میں شمولیت اختیار کرنے والی جہادی عورتوں نے سوشل میڈیا میں اپنے کردار کے بارے میں جو تصویر کشی کی ہے وہ مبالغے سے بھرپور ہے۔ مغربی جہادی خواتین نے اسلامک اسٹیٹ کی قائم کردہ نام نہاد خلافت میں رہنے والی خواتین کو جنسی حوالے سے بڑھا چڑھا کر پیش کیا ہے جبکہ یہ منشور عورت کے اس تصور سے پردہ ہٹاتا ہے۔
فاؤنڈیشن کے اس متن میں ابھرنے والے تصور کے مطابق ’’خواتین کا بنیادی کردار گھر بنانے والی کا اور ایک ماں کا ہے۔‘‘ یہ جملہ فاؤنڈیشن نے اپنے ترجمے کے اختتامی کلمات کے طور پر درج کیا ہے۔ مزید یہ بھی کہا گیا ہے کہ اسلامک اسٹیٹ میں شامل ہونے والی مغربی جہادی خواتین، زیادہ سے زیادہ مغربی نوجوان لڑکیوں کو آئی ایس میں بھرتی کرنے کی غرض سے خواتین کی زندگی کو ضرورت سے زیادہ جان جوکھوں میں ڈالنے والی اور جوش و ولولے سے عبارت پیش کرتی ہیں جو کہ دراصل مردوں کے دائرہ اثر کی نشاندہی کرتا ہے۔
دہشت گرد تنظیم اسلامک اسٹیٹ نے گزشتہ برس موسم گرما میں شام اورعراق کے چند علاقوں میں خلافت قائم کرنے کا اعلان کیا تھا۔ اقوام متحدہ کے مطابق اس دہشت گرد کے عسکریت پسند گروپ نے اب تک ہزاروں افراد کی جان لی ہے۔
’ الخنساء بریگیڈ‘ کا یہ منشور گزشتہ ماہ پہلی بار عربی زبان میں شائع ہوا تھا۔ اس میں دراصل خواتین کی تعلیم اور کام کے بارے میں جائز اور ناجائز کا تعین کیا گیا ہے۔