ایرانی صدر حسن روحانی نے اقوام متحدہ کی جنرل اسمبلی کے سالانہ اجلاس میں شرکت کے لیے امریکا روانہ ہونے سے قبل اس امید کا اظہار کیا تھا کہ وہ واشنگٹن کے ساتھ مذاکرات کا ایک نیا دور شروع کرنا چاہتے ہیں۔ تاہم جب وہ ہفتے کے دن وطن واپس لوٹے تو ان کے اس دورے سے جتنی توقعات وابستہ کی گئی تھیں، ان سے کہیں زیادہ توقعات پوری ہوتی نظر آ رہی ہیں۔

ناقدین کے بقول ایرانی صدر حسن روحانی کے لیے بڑا چیلج یہ ہے کہ وہ واشنگٹن کے ساتھ مذاکرات کامیاب بنانے کے لیے اعتماد سازی کی فضا میں کس طرح بہتری پیدا کرتے ہیں۔ روحانی کے قریبی ساتھیوں میں مغربی ممالک سے تعلیم یافتہ شخصیات بھی شامل ہیں، جو مغربی ممالک کے ساتھ تہران حکومت کے مذاکرات میں بہتری پیدا کرنے کا باعث بن سکتے ہیں۔

نیوز ایجنسی اے پی نے مبصرین کے حوالے سے بتایا ہے کہ امریکا کے کامیاب دورے کے بعد اب روحانی انتظامیہ کو نئے سفارتی روابط کو فعال بنانے کے لیے ملکی سطح پر سیاسی عمل کو تیز تر کرنا ہو گا۔ تاہم اس حوالے سے ایران کے طاقتور پاسداران انقلاب کے اعلیٰ رہنماؤں کو ایک رکاوٹ کے طور پر بھی دیکھا جا رہا ہے، جو ایران کے جوہری پروگرام کے حوالے سے غیر لچکدار مؤقف کے حامل تصور کیے جاتے ہیں۔ تاہم ایرانی صدر نے کہا ہے کہ ایٹمی پروگرام سے متعلق امن مذاکرات کے لیے سپریم لیڈرآیت اللہ علی خامنہ ای نے انہیں اختیارات دے رکھے ہیں۔

حسن روحانی جب ہفتے کے دن تہران کے مہر آباد ہوائی اڈے پر پہنچے تو ان کے حامیوں کی ایک بڑی تعداد ان کے استقبال کے لیے وہاں موجود تھی، جنہوں نے روحانی کے لیے ’امن کے رہنما‘ کے نعرے بلند کیے۔ ان اصلاح پسندوں نے امن کے لیے روحانی کو کوششوں کو بھی سراہا۔ تاہم دوسری طرف کٹر نظریات کے حامل قریب سو افراد بھی وہاں موجود تھے، جنہوں نے نہ صرف ’امریکا مردہ باد‘ کے نعرے لگائے بلکہ ساتھ ہی روحانی کی گاڑی پر ایک جوتا بھی دے مارا تاہم اے ایف پی نے بتایا ہے کہ یہ جوتا ان کی گاڑی کو نہیں لگا۔

اس بات میں کوئی شک نہیں ہے کہ جب تک روحانی کو سپریم لیڈر کی حمایت حاصل ہے، انہیں ایران کے جوہری پروگرام بلکہ دیگر خارجہ امور پر بھی مذاکرات کرنے کی کھلی اجازت ہو گی۔ لیکن ایسے امکانات بہر حال موجود ہیں کہ پاسداران انقلاب اور دیگر کٹر نظریات کے حامل دھڑے سپریم لیڈر کی توجہ حاصل کرنے میں کامیاب ہو جائیں۔ ابھی ایسے عناصر کو روحانی اور اوباما کی اس ٹیلی فونک گفتگو کو بھی ہضم کرنا ہے، جو دونوں ممالک کے صدور کے مابین قریب 35 برس بعد ہونے والا پہلا براہ راست رابطہ ہے۔

یہ امر اہم ہے کہ پاسداران انقلاب کے کمانڈوز نے گزشتہ ہفتے ہی روحانی کو خبردار کیا تھا کہ اقوام متحدہ کی سالانہ جنرل اسمبلی کے اجلاس کے موقع پر امریکی صدر کے ساتھ ہاتھ ملانے کا یہ مناسب موقع نہیں ہے۔

ایران کے متنازعہ جوہری پروگرام کی وجہ سے تہران حکومت پر اقوام متحدہ، امریکا اور یورپی یونین کی طرف سے جو پابندیاں عائد کی گئی ہیں، اُن کے نتیجے میں اس اسلامی ملک کی اقتصادیات کو شدید نقصان پہنچا ہے۔ حالیہ عرصے میں ایران میں نہ صرف بے روزگاری کی شرح میں اضافہ ہوا ہے بلکہ ساتھ ہی افراط زر کی شرح بھی انتہائی زیادہ ہو چکی ہے۔ کچھ مبصرین کے بقول ملک کی موجودہ اقتصادی صورتحال کے تناطر میں شاید سپریم لیڈر نے روحانی کو عالمی طاقتوں کے ساتھ امن مذاکرات کے لیے ہری جھنڈی دکھائی ہے۔

امریکا اور اسرائیل اور متعدد یورپی ممالک کو خدشہ ہے کہ ایران اپنے جوہری پروگرام کے تحت ایٹمی ہتھیار حاصل کرنے کی کوشش میں ہے تاہم تہران حکومت ہمیشہ ہی کہتی آئی ہے کہ اس کا جوہری پروگرام پر امن مقاصد کے لیے ہے۔ ایک تازہ پیشرفت میں روحانی نے یہ بھی کہا ہے کہ جوہری ہتھیاراس اسلامی ملک کی اقدار کے منافی ہیں۔