محمد حفیظ نے سیریز میں اپنی دوسری سنچری بناتے ہوئے 140 رنز ناٹ آؤٹ کی شاندار اننگز کھیلی۔ اس فتح کے بعد پاکستان نے سیریز میں دو ایک سے برتری حاصل کر لی ہے۔ حفیظ نے اپنی اس اننگز میں 11 چوکے اور تین چھکے لگائے اور 136 گیندوں کا سامنا کرتے ہوئے 140 رنز اسکور کیے۔ ایک وقفے کے بعد میدان میں اترنے والے عمر گل نے 19 رنز کے عوض سری لنکا کے تین بلے بازوں کو پویلین کی راہ دکھا کر اپنی ٹیم کی فتح کو یقینی بنایا۔

پاکستان کی جانب سے سری لنکا کے خلاف پہلے بیٹنگ کرتے ہوئے مقررہ پچاس اوورز میں پانچ وکٹوں کے نقصان پر 326 رنز بنائے گئے تھے تاہم سری لنکا کی ٹیم 44.4 اوورز میں 213 رنز پر آؤٹ ہو گئی۔

میچ کے بعد اپنے انٹرویو میں کپتان مصباح الحق نے کہا، ’’مجھے خوشی ہے کہ ہم نے پہلے بیٹنگ کی۔۔۔ حفیظ اور احمد نے اچھا پلیٹ فارم مہیا کیا اور ہم آخر تک اچھی کارکردگی دکھانے میں کامیاب ہوئے۔‘‘

مصباح الحق کا مزید کہنا تھا، ’’عمر گل جس طرح آئے اور جس طرح انہوں نے وکٹیں لیں، اس سے بھی میچ کی ٹون سیٹ ہو گئی کیوں کہ ہم نئی بال سے وکٹیں نہیں لے پا رہے تھے۔ میں کھیل میں اپنے اسپنرز کے کھیل سے بھی بہت خوش ہوں۔‘‘

سری لنکا کی ٹیم نے 26 کے اسکور پر حفیظ کا کیچ چھوڑا، جس کا خمیازہ اسے بھگتنا پڑا اور وہ احمد شہزاد کے ساتھ 160 رنز کی پارٹنر شپ بنانے میں کامیاب ہو گئے۔ احمد شہزاد نے اس میچ میں 81 رنز بنائے۔

خیال رہے کہ آسٹریلیا میں اپنے گھٹنے کی تکلیف کا علاج کرانے کے بعد عمر گل ہفتے ہی کے روز شارجہ پہنچے تھے، جہاں انہوں نے اتوار کے روز اس سیریز میں اپنا پہلا میچ کھیلا۔ گُل رواں برس کے آغاز سے زخمی ہونے کی وجہ سے ٹیم کو دستیاب نہیں تھے۔ سری لنکا کی جانب سے سب سے ٹاپ اسکورر تلکا رتنے دلشان رہے، جنہوں نے دس چوکوں کی مدد سے 59 رنز بنائے۔ میچ میں حفیظ نے 35 اور سعید اجمل نے 37 رنز کے عوض دو دو کھلاڑیوں کو آؤٹ کیا۔