افغانستان میں متعین نیٹو کے آئی سیف دستوں کے عملی تعاون کے ساتھ افغان فوج نے پاکستانی سرحد کے قریب عسکریت پسندوں کے خلاف ایک بڑی کارروائی کی ہے، جس کے نتیجے میں کم از کم 60 عسکریت پسندوں کو ہلاک کرنے کا دعویٰ کیا گیا ہے۔ ہلاک شدگان میں کئی غیر ملکی جنگجو بھی شامل ہیں۔ اِس کارروائی سے بظاہر ایسا دکھائی دیتا ہے کہ حقانی گروپ کے خلاف امریکا نے اپنی مہم کو تقویت دے دی ہے۔ مبصرین کے مطابق رواں برس کے اختتام پر فوجی انخلا سے قبل امریکا حقانی گروپ پر کاری ضرب لگانے کی کوششوں میں ہے۔

یہ فوجی کارروائی طالبان سے قریبی تعلق رکھنے والے حقانی گروپ کے عسکریت پسندوں کے خلاف کی گئی ۔ پاکستانی سرحد سے جڑے افغان صوبے پکتیکا کے مقام زیرُوک پر حقانی گروپ کے تین سو عسکریت پسندوں کو افغان فوج کی جانب سے بھاری فائرنگ اور گولہ باری کا سامنا کرنا پڑا۔ یہ عسکریت پسند زیرُوک میں واقع افغان فوجی اڈے پر حملہ آور ہونے کی کوشش میں تھے۔ اِس کارروائی کی تصدیق افغان حکومت کے نیشنل ڈائریکٹوریٹ برائے سکیورٹی نے کی ہے۔ پکتیکا صوبے کی سرحد کی نگرانی کرنا ایک مشکل کام ہے اور دونوں جانب سے مسلح گروپ کے اراکین بڑے آرام سے سرحدی مقامات عبور کر سکتے ہیں۔

حقانی نیٹ ورک کھلے عام افغان طالبان کے لیڈر ملا عمر کی حمایت کا اعلان کرتا ہے۔ افغانستان میں جاری جنگ میں کئی خوفناک حملوں میں اسی نیٹ ورک کا نام لیا جاتا ہے۔ اسی گروپ نے کابل کے کئی مقبول ہوٹلوں پر حملوں کی ذمہ داری قبول کر رکھی ہے۔ افغان دارالحکومت کابل میں بھارتی سفارتخانے کی عمارت پر سن 2011 میں کیے جانے والے حملے میں بھی اسی گروپ کو ملوث خیال کیا جاتا ہے۔

امریکا نے حقانی نیٹ ورک کو ایک دہشت گرد گروپ خیال کرتے ہوئے سن 2012 میں اِس کو بلیک لسٹ قرار دے دیا تھا۔ کابل اور واشنگٹن میں ایسا تاثر بھی پایا جاتا ہے کہ حقانی نیٹ ورک کو پاکستان کی طاقتور خفیہ ایجنسی کی حمایت بھی حاصل ہے۔