اسرائیلی وزیر اعظم نیفتالی بینٹ کا یہ بیان حالیہ برسوں کے دوران اسرائیل اور حزب اللہ کے درمیان ہونے والے انتہائی پرتشدد حملوں میں سے ایک کے بعد آیا ہے۔ اسرائیل نے کہا ہے کہ اگر راکٹ حملوں کا سلسلہ جاری رہا تو وہ اپنی جوابی کارروائی تیز کر سکتا ہے۔

بینیٹ نے اپنی کابینہ سے خطاب کرتے ہوئے کہا،”لبنان کی سرزمین سے جو کچھ ہو رہا ہے اس کے لیے لبنان حکومت اور لبنان آرمی کو ذمہ داری لینی ہوگی۔"

جنگجووں نے لبنان سے گزشتہ ہفتے کئی دنوں تک اسرائیل پر راکٹ داغے تھے جس کے بعد اسرائیلی جنگی طیاروں نے لبنان پر فضائی حملے کیے۔ جمعہ کے روز حزب اللہ نے اسرائیلی کی جانب متعدد راکٹ داغے اور اسرائیلی نے بھی جوابی کارروائی کرتے ہوئے زبردست گولہ باری کی۔

بینیٹ نے کہا،”ہمارے لیے یہ کوئی زیادہ اہمیت کی بات نہیں ہے کہ آیا کسی فلسطینی تنظیم نے حملہ کیا ہے یا آزادانہ طورپر سرگرم باغیوں نے۔ اسرائیل اپنی زمین پر کسی بھی طرح کے حملے کو قبول نہیں کر ے گا۔"

اسرائیلی وزیر اعظم کا یہ بیان جنگجو تنظیم حزب اللہ کے رہنما حسن نصراللہ کے اس بیان کے ایک دن بعد آیا ہے جس میں انہوں نے کہا تھا کہ اگر اسرائیل نے لبنان پر فضائی حملے کیے تو وہ جوابی کارروائی کریں گے اور یہ سوچنا غلط ہوگا کہ حزب اللہ لبنان میں داخلی تقسیم یا ملک کے اقتصادی بحران کو وجہ سے مستقبل میں اسرائیل کے فضائی حملوں کا جواب نہیں دے گا۔

حسن نصراللہ کا کہنا تھا،”کوئی اس غلط فہمی میں نہ رہے کہ حزب اللہ لبنان کے مسائل سے پریشان ہے۔" ا نہوں نے مزید کہا،”راکٹ داغ کر ہم نے واضح پیغام دے دیا ہے۔“

اسرائیل اور حزب اللہ ایک دوسرے کے کٹر دشمن ہیں اور دونوں کے درمیان سن 2006 میں ایک ماہ تک زبردست جنگ ہوئی تھی۔

اقوام متحدہ کے سکریٹری جنرل انٹونیو گوٹیریس نے اتوار کے روز ایک بیان میں کہا،”تمام فریقین کو پورے تحمل سے کام لینا چاہیے۔ تمام فریقین کے لیے یہ ضروری ہے کہ وہ ایسے کسی بھی اقدام سے گریز کریں جس کے نتیجے میں کشیدگی میں اضافہ ہو یا غلط فہمی پیدا ہو۔"

لبنا ن ا ن دنوں شدید اقتصادی اور مالی بحران سے دوچار ہے۔ عالمی بینک کا کہنا ہے کہ اٹھارہویں صدی کے وسط کے بعد سے یہ اب تک کا شدید بحران ہے۔

اسرائیل کا کہنا ہے کہ حزب اللہ کے پاس تقریباً ایک لاکھ تیس ہزار راکٹ اور میزائل ہیں جو ملک میں کہیں بھی نشانہ بنانے کی صلاحیت رکھتے ہیں۔

ج ا/ ص ز (اے پی)