گھر بار سے محروم ہونے والوں کی تعداد کا نیا ریکارڈ
20 جون 2021
اقوام متحدہ نے کووڈ وبائی مرض کے باوجود تنازعات اور ظلم و جبر کا شکار ہو کر گھر بار چھوڑنے پر مجبور انسانوں کی تعداد میں گزشتہ دہائی میں ہونے والے دو گنا اضافے کا نوٹس لینے پر زور دیا ہے۔
تصویر: Getty Images/AFP/F. Senna
اشتہار
اقوام متحدہ کے ہائی کمشنر برائے مہاجرین 'یو این ایچ سی آر‘ کی عالمی رجحانات پر مشتمل رپورٹ کے مطابق تشدد، تنازعات، ظلم و جبر اور انسانی حقوق کی خلاف ورزیوں کے سبب اپنے گھر بار چھوڑ نے پر مجبور انسانوں کی تعداد بڑھ کر 82.4 ملین ہو چُکی ہے۔
جمعہ 18 جون کو جینیوا سے شائع ہونے والی اس رپورٹ کہا گیا ہے کہ تشدد اور ظلم و ستم کی وجہ سے، جو گزشتہ ایک دہائی سے جاری ہے، نقل مکانی اور فرار کے 'گلوبل ٹرنڈ‘ یا عالمی رجحان میں غیر معمولی اضافہ ہوا ہے۔ 2019 ء کے اواخر میں لگائے جانے والے ایسے ہی اندازوں میں ایسے انسانوں کی تعداد 79.5 تھی جس کے مقابلے میں اس بار اس رجحان میں 4 فیصد کا اضافہ ریکارڈ کیا گیا ہے۔لاکھوں مہاجرین کی آمد کے پانچ سال بعد جرمنی آج کہاں کھڑا ہے؟
دنیا بھر میں ایسے پناہ گزینوں کی اکثریت کی میزبانی ایسے ممالک کر رہے ہیں جو سرحدی بحران والے علاقوں میں واقع ہیں جبکہ ان ممالک کا شمار پست یا متوسط آمدنی والے ممالک میں ہوتا ہے۔ حیران کن بات یہ کہ دنیا کے سب سے کم ترقی یافتہ ممالک دنیا کے 27 فیصد مہاجرین کی میزبانی کر رہے ہیں۔
'یو این ایچ سی آر‘ کے مینڈیٹ میں شامل 20.7 ملین مہاجرین میں فلسطینی پناہ گزینوں کی تعداد 5.7 ملین اور وینیزویلا کے پناہ گزینوں کی تعداد 3.9 ملین تھی۔ مزید برآں 48 ملین افراد خود اپنے ہی ملک میں بے گھر ہو چکے ہیں۔4.1 افراد سیاسی پناہ کی تلاش میں سرگرداں ہیں۔
شمالی موزمبیق سے فرار ہونے والے سات لاکھ افراد پناہ کی تلاش میں۔تصویر: Roberto Paquete/DW
کورونا بحران اور لاک ڈاؤن
اقوام متحدہ کے ہائی کمشنر برائے مہاجرین فلیپو گرانڈی نے اس تازہ ترین رپورٹ کے شائع ہونے سے پہلے ہی ایک انٹرویو میں کہا تھا،'' ہم بات کر رہے ہیں ایک ایسے سال کی جس میں ہم سب مکمل طور پر لاک ڈاؤن میں تھے۔ اپنے اپنے گھروں، برادریوں اور اپنے ممالک میں بند تھے۔‘‘ گرانڈی کے مطابق کورونا کی وبا بھی بے گھر ہونے والے اور اپنی بقا کے لیے فرار پر مجبورانسانوں کی نقل مکانی یا ہجرت کے سیلاب کو نہ روک سکی۔ انہوں نے بتایا کہ قریب 3 ملین افراد سب کچھ پیچھے چھوڑ کر پناہ کی تلاش میں نکلنے پر مجبور تھے۔
فلیپو گرانڈی نے کہا کہ تنازعات اور موسمیاتی تبدیلی کے شکار ملک موزمبیق ، ایتھوپیا کے علاقے ٹیگرے اور افریقہ کی نیم صحرائی پٹی 'ساحل‘ میں 2020 ء میں داخلی طور پر بے گھر ہو نے والے افراد کی سب سے زیادہ تعداد پناہ کی تلاش میں رہے۔
یو این ایچ سی آر کے مطابق2020 ء مسلسل نواں سال تھا جس میں حالات سے مجبور ہو کر انسانوں کو جبری نقل مکانی کرنا پڑی۔
ایتھوپیا کے اندرون ملک بے گھر ہونے والے خاندانوں کے بے یار و مددگار بچے۔تصویر: Tizalegn Tesfaye
سب سے زیادہ پناہ گزین ترقی پذیر ممالک میں
اقوام متحدہ کے ہائی کمشنر برائے مہاجرین 'یو این ایچ سی آر‘ کے ترجمان کرس ملسر نے ڈوئچے ویلے کو بتایا کہ 86 فیصد مہاجرین ترقی پذیر ممالک پہنچے ہیں۔ ان کا کہنا تھا،'' یہ زیادہ تر وہ ممالک ہیں جو خود غذائی قلت اور دیگر مشکلات سے دو چار ہیں۔‘‘
کرس ملسر نے پناہ گزینوں کے ساتھ اپنے ذاتی تجربات کے حوالے سے کہا،'' میں نے بہت سے پناہ گزینوں کو یہ کہتے سنا کہ ہماری نسل تو تباہ ہو چُکی ہے، ہمیں ہمارے حال پر چھوڑ دیں لیکن خُدارا ہماری اگلی نسل، ہمارے بچوں کے لیے کُچھ کریں۔ انہیں موقع دیں اپنا مستقبل سنوارنے کا۔‘‘ کرس ملسر کا کہنا ہے کہ ان تباہ حال مہاجرین کے مستقبل کا دار ومدار تعیلم پر ہے۔
یواین ایچ سی آر کی اس رپورٹ کے مطابق دنیا بھر میں اس وقت مہاجرین کے طور پر باضابطہ تسلیم شدہ افراد کی دو تہائی کا تعلق صرف 5 ممالک شام، وینیزویلا، افغانستان، جنوبی سوڈان اور میانمار سے ہے۔یونانی جزیرے پر مہاجر کیمپ میں نوجوان افغان خاتون جل کر ہلاک
میانمار کا شمار ان پانچ ممالک میں ہوتا ہے جہاں سے سب سے زیادہ مہاجرین پناہ کی تلاش میں سر گرداں ہیں۔ تصویر: picture-alliance/dpa/epa/N. Win
پناہ کے متلاشی افراد کے میزبان ممالک
تازہ ترین اعداد و شمار سے یہ انکشاف ہوا ہے کہ لگاتار چوتھے سال بھی جرمنی میں پناہ کے متلاشی افراد کی درخواستوں کی تعداد کم ہو کر قریب ڈیڑھ ملین رہی۔ یورپ اور ایشیا کے سنگم پر واقع ملک ترکی 3.7 ملین پناہ گزینوں کا بوجھ اُٹھاتے ہوئے میزبان ممالک کی فہرست میں اول نمبر پر رہا۔ اس کے بعد 1.7 ملین پناہ گزینوں، جن میں وینیزویلا کے بیرون ملک بے گھر افراد بھی شامل ہیں کے ساتھ کولمبیا دوسرے نمبر پر اور جرمنی ڈیڑھ ملین پناہ گزینوں کے ساتھ تیسرے نمبر پر رہا۔
راکھین سے کوکس بازار تک کا سفر، روہنگیا مہاجرین کی کہانیاں
روہنگیا مسلمانوں کا بحران دن بدن شدت اختیار کرتا جا رہا ہے۔ اب تک قریب تین لاکھ ستر ہزارروہنگیا مسلمان میانمار سے فرار ہو کر بنگلہ دیش پہنچ چکے ہیں۔ ڈی ڈبلیو نے روہنگیا اقلیت کے ہجرت کے اس سفر کی تصویری کہانی مرتب کی ہے۔
تصویر: DW/M.M. Rahman
طویل مسافت
میانمار میں راکھین صوبے سے ہزارہا روہنگیا مہاجرین ایک طویل مسافت طے کر کے بنگلہ دیش پہنچ چکے ہیں۔ چھوٹے بچوں کو گود میں لاد کر دلدلی راستوں پر پیدل سفر آسان نہیں۔ یہ تصویر بنگلہ دیش میں ٹیکناف کے لمبر بل علاقے کی ہے۔
تصویر: DW/M.M. Rahman
کیچڑ بھرا راستہ
اس تصویر میں عورتوں اور بچوں کو کیچڑ سے بھرے پیروں کے ساتھ کچے راستے پر چلتے دیکھا جا سکتا ہے۔
تصویر: DW/M.M. Rahman
بیمار بھی تو اپنے ہیں
اپنا گھر چھوڑنے کی تکلیف اپنی جگہ لیکن گھر کے بزرگوں اور بیمار افراد کو چھوڑنا ممکن نہیں۔ یہ دو روہنگیا افراد اپنے گھر کی ایک معذور خاتون کو اٹھا کر لے جا رہے ہیں۔
تصویر: DW/M.M. Rahman
کریک ڈاؤن کے بعد
میانمار کی فوج کے کریک ڈاؤن سے شروع ہونے والے تنازعے میں خواتین اور بچے سب سے زیادہ متاثر ہوئے ہیں۔ نقل مکانی کرنے والے روہنگیا افراد میں زیادہ تعداد بھی عورتوں اور بچوں ہی کی ہے۔
تصویر: DW/M.M. Rahman
منظم حملے
پچیس اگست کو میانمار میں روہنگیا جنگجوؤں نے پولیس تھانوں پر منظم حملے کیے تھے، جس کے بعد سکیورٹی فورسز نے جوابی کارروائی شروع کر دی تھی۔ جنگجوؤں اور سیکورٹی فورسز کے مابین شروع ہونے والی ان جھڑپوں کے باعث زیادہ تر نقصان روہنگیا باشندوں کو ہی اٹھانا پڑا ہے۔
تصویر: DW/M.M. Rahman
کئی سو ہلاکتیں
محتاط اندازوں کے مطابق اس تشدد کے نتیجے میں کم از کم چار سو افراد ہلاک ہو چکے ہیں، جن میں سے اکثریت روہنگیا کی ہے۔
تصویر: DW/M.M. Rahman
نف دریا
میانمار سے بنگلہ دیش کی سرحد عبور کرنے کے لیے دریا بھی پار کرنا پڑتا ہے۔ درمیان میں ’نف‘ نامی دریا پڑتا ہے، جسے کشتی کے ذریعے عبور کیا جاتا ہے۔
تصویر: DW/M.M. Rahman
الزام مسترد
میانمار کی حکومت ایسے الزامات مسترد کرتی ہے کہ روہنگیا مسلمانوں کے خلاف کریک ڈاؤن جاری ہے اور انہیں ہلاک یا ملک بدر کرنے کی کوشش کی جا رہی ہے۔
تصویر: DW/M.M. Rahman
سرحدی راستے
بنگلہ دیش پہنچنے کے لیے میانمار سے روہنگیا مسلمان مختلف سرحدی راستے اپناتے ہیں۔ زیادہ تر ٹیکناف اور نیخن گھڑی کی طرف سے آتے ہیں۔
تصویر: DW/M.M. Rahman
گھروں کے جلنے کا دھواں
روہنگیا کمیونٹی کے گھروں کے جلنے کا دھواں بنگلہ دیش کے ٹیکناف ریجن سے گزرنے والے دریائے نف کے اس پار سے دیکھا جا سکتا ہے۔
تصویر: DW/M.M. Rahman
چھبیس سو مکانات نذر آتش
دو ستمبر کو میانمار کی حکومت کی جانب سے بتایا گیا تھا کہ شمال مغربی ریاست راکھین میں کئی دہائیوں کے دوران پیش آنے والے ان بدترین واقعات میں 2600 مکانات نذر آتش کیے جا چکے ہیں۔ تاہم حکومت کا الزام تھا کہ گھروں کو آگ لگانے کے ان واقعات میں روہنگیا ہی ملوث ہیں۔
تصویر: DW/M.M. Rahman
جانور بھی ساتھ
بنگلہ دیش میں نقل مکانی کر کے آنے والے بعض روہنگیا افراد اپنے جانوروں کو ساتھ لانا نہیں بھولے۔ ایسی صورت میں یہ مہاجرین نف دریا کا راستہ اختیار کرتے ہیں۔
تصویر: DW/M.M. Rahman
کوکس بازار
مہاجرین کی کچھ تعداد اب تک بنگلہ دیش کے کوکس بازار ضلع میں قائم عارضی کیمپوں میں جگہ ملنے سے محروم ہے۔ اس تصویر میں چند مہاجرین کوکس بازار کے قریب ٹیکناف ہائی وے پر کھڑے جگہ ملنے کے منتظر ہیں۔
تصویر: DW/M.M. Rahman
سڑک کنارے بسیرا
جن لوگوں کو کیمپوں میں جگہ نہیں ملتی وہ سڑک کے کنارے ہی کہیں بسیرا کر لیتے ہیں۔ اس روہنگیا خاتون کو بھی چھوٹے بچوں کے ساتھ کھلے آسمان تلے رات گزارنی پڑ رہی ہے۔
تصویر: DW/M.M. Rahman
زیادہ بڑے شیلٹر
ٹیکناف کے علاقے میں بنگلہ دیشی حکومت روہنگیا پناہ گزینوں کے لیے زیادہ بڑے شیلٹر بنا رہی ہے تاکہ جگہ کی کمی کو پورا کیا جا سکے۔
تصویر: DW/M.M. Rahman
دو لاکھ سے زیادہ بچے
میانمار کے روہنگیا مہاجرین میں دو لاکھ سے زیادہ بچے ہیں جو ان پناہ گزینوں کا ساٹھ فیصد ہیں۔
میانمار سے ان مہاجرین کی زیادہ تعداد جنوب مشرقی بنگلہ دیش کے ضلعے کاکس بازار پہنچتی ہے، کیونکہ یہی بنگلہ دیشی ضلع جغرافیائی طور پر میانمار کی ریاست راکھین سے جڑا ہوا ہے، جہاں سے یہ اقلیتی باشندے اپنی جانیں بچا کر فرار ہو رہے ہیں۔
تصویر: DW/M.M. Rahman
مہاجرین کی کہانیاں
بنگلہ دیش پہنچنے والے ہزارہا مہاجرین نے بتایا ہے کہ راکھین میں سکیورٹی دستے نہ صرف عام روہنگیا باشندوں پر حملوں اور ان کے قتل کے واقعات میں ملوث ہیں بلکہ فوجیوں نے ان کے گھر تک بھی جلا دیے تاکہ عشروں سے راکھین میں مقیم ان باشندوں کو وہاں سے مکمل طور پر نکال دیا جائے۔
تصویر: DW/M.M. Rahman
اقوام متحدہ کا مطالبہ
اقوام متحدہ کی سلامتی کونسل نے حال ہی میں میانمار سے مطالبہ کیا ہے کہ راکھین میں حالات کو قابو میں لانے کے لیے فوری اقدامات کیے جائیں۔ روہنگیا مسلمانوں کو میانمار میں کئی دہائیوں سے امتیازی سلوک کا سامنا ہے۔ ان کے پاس کسی بھی ملک کی شہریت نہیں ہے اور ینگون حکومت انہیں غیر قانونی تارکین وطن قرار دیتی ہے۔
تصویر: DW/M.M. Rahman
بیس ہزار مہاجرین روزانہ
رواں ہفتے عالمی ادارہ برائے مہاجرت نے کہا تھا کہ روزانہ کی بنیادوں پر اوسطا بیس ہزار روہنگیا بنگلہ دیش پہنچ رہے ہیں۔ اس ادارے نے عالمی برداری سے ان مہاجرین کو فوری مدد پہنچانے کے لیے 26.1 ملین ڈالر کی رقوم کا بندوبست کرنے کی اپیل بھی کی تھی۔
تصویر: DW/M.M. Rahman
تین لاکھ ستر ہزار پناہ گزین
اقوام متحدہ کے اعداد و شمار کے مطابق اب تک تین لاکھ ستر ہزار روہنگیا مہاجرین بنگلہ دیش پہنچے ہیں۔ ان افراد کو بنگلہ دیشی علاقے کوکس بازار میں بنائے گئے عارضی کیمپوں میں رکھا جا رہا ہے۔
تصویر: DW/M.M. Rahman
خوراک کی قلت
عالمی ادارہ مہاجرت کے مطابق بنگلہ دیش میں روہنگیا مہاجرین کی صورتحال انتہائی ابتر ہے۔ انہیں بنیادی ضروریات زندگی کی اشیا بھی دستیاب نہیں اور خوراک کی قلت کا بھی سامنا ہے۔