خدا انتہائی برے انسان سے بھی محبت کرتا ہے، پوپ فرانسس
25 دسمبر 2019
کیتھولک مسیحیوں کے روحانی پیشوا پوپ فرانسس نے کرسمس کے موقع پر اپنے روایتی پیغام میں کہا ہے کہ خدا سب انسانوں سے محبت کرتا ہے، خواہ کوئی شخص کتنا ہی برا کیوں نہ ہو۔
تصویر: AFP/A. Pizzoli
اشتہار
پوپ فرانسس کا یہ بیان اس لحاظ سے کافی اہم ہے کہ حالیہ عرصے میں چرچ سے متعلق کئی اسکینڈلز سامنے آئے ہیں جن میں جنسی زیادتیوں کے الزامات بھی شامل ہیں۔ پوپ نے اپنی تقریر میں تاہم ایسے واقعات کا براہ راست کوئی ذکر نہیں کیا۔
دنیا میں مقیم 1.3بلین رومن کیتھولک مسیحیوں کے روحانی پیشوا پو پ فرانسس کرسمس سے قبل منگل کی رات کو ویٹیکن سٹی کے سینٹ پیٹرز بسیلیکا میں منعقد ہونے والی روایتی تقریب سے خطاب کر رہے تھے۔ اس موقع پر ہزاروں افراد موجود تھے جب کہ لوگوں کی سہولت کے لیے چرچ کے باہر بڑے اسکرین بھی لگائے گئے تھے۔
پوپ فرانسس نے اپنے خطاب میں کہا، ”کرسمس ہمیں اس بات کی یاد دہانی کراتا ہے کہ خواہ ہم کتنے بھی برے ہوں، لیکن پھر بھی خدا ہم سب سے محبت کرتا ہے۔"
رومن کیتھولک مسیحیوں کے روحانی رہنما نے مزید کہا، ”ہو سکتا ہے کہ آپ کے خیالات میں غلطی ہو، ہو سکتا ہے کہ آپ نے معاملات کو بالکل خراب کر دیا ہو، لیکن خدا پھر بھی آپ سے محبت کرتا رہا ہے۔ آپ کئی بار سوچتے ہوں گے کہ اگر ہم اچھا کام کریں گے تو خدا بھی ہمارے ساتھ اچھا کرے گا اور اگر ہم برا کام کریں گے تو خدا ہمیں سز ا دے گا۔ لیکن ایسا نہیں ہے۔ وہ آپ سے ہمیشہ محبت کرتا ہے۔"
بون کی کرسمس مارکیٹ اور کمشیری شالیں
01:56
This browser does not support the video element.
ماضی میں دنیا بھر میں پادریوں کے جنسی زیادتی کا مرتک ہونے کی ہزاروں رپورٹیں سامنے آتی رہی ہیں، چرچ پر یہ الزامات بھی ہیں کہ اعلٰی مذہبی پیشواؤں کی جانب سے ان واقعات پر پردہ ڈالا گیا۔
پوپ فرانسس نے گزشتہ ہفتے کیتھولک چرچ کی معلومات خفیہ رکھنے سے متعلق ان قواعد کو ختم کرتے ہوئے کئی اہم تبدیلیاں متعارف کرائیں، جن قوانین کی وجہ سے مسیحی مذہبی پیشواؤں کی طرف سے بچوں کے ساتھ جنسی استحصال کے واقعات سامنے نہیں آتے تھے۔
نئی اصلاحات کے بعد اب پولیس کے لیے مذہبی پیشواؤں کے خلاف جرائم کی تفتیش کی راہ میں حائل ایک بڑی رکاوٹ دور ہوگئی ہے۔ ویٹیکن کو مالی بدعنوانیوں کے الزامات کا بھی سامنا کرنا پڑ رہا ہے۔
کیتھولک مسیحیوں کے 266ویں روحانی پیشوا نے اپنے خطاب میں مزید کہا، ”آئیے ہم بچوں کے بارے میں غور کریں اور خود کو ان کی محبت میں فنا کردیں۔ اس کے بعد ہمیں یہ شکایت نہیں رہے گی کہ وہ ہم سے محبت نہیں کرتے ہیں۔"
83 سالہ پوپ فرانسس کا کہنا تھا، ”مت سوچیں کہ انسانیت سے محبت وقت کا ضیاع ہے، ہمت باندھیں، اعتماد مت کھوئیں اور امید کا دامن مت چھوڑیں۔ دوسروں کے لیے تحفہ بنیں، یہ عمل زندگی کو مقصد دیتا ہے۔ دوسروں کی مدد کرنے سے پہلے دوسروں سے احترام نہ چاہیں، ہمسائے سے اچھے برتاؤ کے لیے اس کے اچھے ہونے کا انتظار نہ کریں۔"
ج ا /ش ح (ڈی پی اے، اے ایف پی، اے پی)
یورپ کی خوبصورت ترین کرسمس مارکیٹیں
یورپ بھر میں رنگ برنگے اسٹالز پر مشتمل کرسمس مارکیٹوں کو عوام کے لیے کھول دیا گیا ہے۔ یورپ کی خوبصورت ترین کرسمس مارکیٹوں کا تصویری سفر کیجیے۔
تصویر: Stadt Nürnberg/B. Fuder
کولون، جرمنی
کولون کے مشہور زمانہ کیتھیڈرل کے سامنے لگنے والی اس کرسمس مارکیٹ میں ہر سال کم از کم چالیس لاکھ افراد شرکت کرتے ہیں۔ اس کا شمار جرمنی کی پسندیدہ ترین کرسمس مارکیٹوں میں ہوتا ہے۔ خریداری اور کھانے پینے کے اسٹالز کے علاوہ ایک سو سے زائد اسٹیج تقریبات کا انعقاد بھی کیا جاتا ہے۔
تصویر: imago
کراکوف، پولینڈ
یہ کرسمس مارکیٹ پولستانی شہر کراکوف کے پرانے حصے (اولڈ سٹی) میں لگائی جاتی ہے۔ اگر کسی کا دل وہاں کے رومانوی ماحول سے گرم نہیں ہوتا تو وہ پولش ووڈکا سے مدد لیتا ہے۔ اس مارکیٹ میں کرسمس کی کہانی 1937ء سے چھوٹے چھوٹے مجسموں کے ذریعے بیان کی جاتی ہے۔
تصویر: picture-alliance/dpa/J. Dabrowski
ویانا، آسٹریا
یہ کرسمس مارکیٹ ویانا کے تاریخی کلیسا کے ارد گرد سجتی ہے۔ چھیالیس میٹر طویل اسٹیج پر کرسمس کہانی مجسموں اور لکڑی کے بنے چھوٹے چھوٹے گھروں کے ذریعے بیان کی جاتی ہے۔ یہاں دستکاری کے اعلیٰ نمونے دیکھنے کو ملتے ہیں۔
تصویر: picture-alliance/dpa
بازل، سوئٹزرلینڈ
بازل کی کرسمس مارکیٹ سوئٹزرلینڈ کی سب سے بڑی کرسمس مارکیٹ ہوتی ہے۔ اس کے علاوہ روشنیوں کی مدد سے سجائی جانے والی یورپ کی طویل ترین سڑک بھی اسی مارکیٹ کا حصہ بنتی ہے۔
تصویر: Basel Tourismus
سٹراسبرگ، فرانس
رواں برس اس یورپی شہر کی کرسمس مارکیٹ 446 ویں مرتبہ سجائی گئی ہے۔ اسے فرانس کی قدیم ترین کرسمس مارکیٹ قرار دیا جاتا ہے۔ سٹراسبرگ کے تاریخی گرجا گھر کے اردگرد لکڑی سے بنے اسٹالز لگائے جاتے ہیں لیکن بھیڑ کی وجہ سے یہ اسٹال شہر کے دیگر حصوں تک پھیل جاتے ہیں۔
تصویر: Sebastan Hengy
بروگے، بلیجیم
جب بروگے کو کرسمس کی روشنیوں سے سجایا جاتا ہے تو ایسے لگتا ہے جیسے آپ قرون وسطیٰ میں واپس چلے گئے ہوں۔ کرسمس مارکیٹ کے ارد گرد پرانی طرز کی بگھیاں کھڑی ہوتی ہیں، جن میں بیٹھ کر شہر کی سیر کی جا سکتی ہے۔
تصویر: picture-alliance/dpa/F.P.Tschauner
میڈرڈ، اسپین
میڈرڈ کی کرسمس مارکیٹ ’پلازہ میئر‘ کے مقام پر سجتی ہے اور یورپ کی دیگر مارکیٹوں کے برعکس یہ چھ جنوری کو اپنے جوبن پر ہوتی ہے۔ ہر سال ہزاروں سیاح یہ عوامی تہوار دیکھنے کے لیے آتے ہیں اور اس موقع پر ہونے والی پریڈ ٹیلی وژن پر لائیو دکھائی جاتی ہے۔
تصویر: picture-alliance/dpa/H.C. Hidalgo
لندن، برطانیہ
کہا جاتا ہے کہ جرمن کرسمس مارکیٹ کی نقل دیکھنی ہو تو لندن کی کرسمس مارکیٹ کو دیکھا جائے اور لندن کے ہائیڈ پارک میں ’وِنٹر وَنڈر لینڈ‘ اس کا بہترین ثبوت ہے۔ اس مارکیٹ میں وہ تمام لوازمات موجود ہوتے ہیں، جو جرمنی میں کرسمس مارکیٹوں کا حصہ ہیں۔
تصویر: picture-alliance/dpa/Kerimokten
گوتھن برگ، سویڈن
گوتھن برگ کی مارکیٹ سویڈن کی سب سے بڑی کرسمس مارکیٹ ہے اور اسے ’جادوئی‘ بھی سمجھا جاتا ہے۔ اس کرسمس مارکیٹ کو سجانے کے لیے پچاس لاکھ روشنیوں کا استعمال کیا جاتا ہے۔
تصویر: Gören Assner
نیورمبرگ، جرمنی
نیورمبرگ کی کرسمس مارکیٹ کا شمار دنیا کی قدیم ترین کرسمس مارکیٹوں میں ہوتا ہے۔ تاریخی شواہد کے مطابق یہ مارکیٹ چار صدیوں سے بھی زائد عرصہ قبل 1610ء میں بھی لگائی جاتی تھی۔
