افغانستان کے چوٹی کے علماء کے پینل کے ایک رکن نے کہا ہے کہ وہ بغلان صوبے کے 80 ہزار نفوس پر مشتمل شہر دہ صالح کے علماء کی جانب سے جاری کیے گئے اس فتوے میں کوئی مداخلت نہیں کریں گے۔ خبر رساں ادارے روئٹرز کے ایک جائزے کے مطابق یہ 2014ء میں نیٹو دستوں کے انخلاء کے بعد ملک میں قدامت پسندی کی واپسی کی ایک اور علامت ہے۔ واضح رہے کہ ابھی چند روز پہلے امریکا کی جانب سے معاشرے میں افغان خواتین کے کردار کو مزید مستحکم کرنے کے لیے 200 ملین ڈالر کی مدد سے ایک نیا پروگرام جاری کیا گیا ہے۔

2001ء میں امریکی سرکردگی میں اقتدار سے طالبان کی معزولی سے پہلے پنج شیر کے قریب واقع دہ صالح طالبان مخالف جذبات کا گڑھ ہوا کرتا تھا۔ تاہم جون کے اواخر میں یہاں کے علماء نے آٹھ شقوں پر مشتمل ایک فتویٰ جاری کیا، جس میں یہ بھی کہا گیا کہ خواتین اپنے کسی مرد رشتے دار کے بغیر گھروں سے باہر نہیں جائیں گی۔ ساتھ ہی کاسمیٹکس کی تمام دکانوں کو یہ کہہ کر بند کر دیا گیا کہ وہ جسم فروشی کے لیے استعمال ہو رہی ہیں تاہم پولیس اور مقامی آبادی ان الزامات کو رَد کرتی ہے۔

جمعہ 19 جولائی کو صدر کرزئی کے مذہبی مشیروں میں سے ایک اور علماء کونسل کے ایک رکن عنایت اللہ بالغ نے کہا، ’ان دکانوں کے کھلا رہنے کا کوئی جواز نہیں تھا۔ دکانیں کاروبار کے لیے ہوتی ہیں، بدکاری کے لیے نہیں‘۔ اگرچہ فتویٰ صادر کرنے کا اختیار صرف کابل میں موجود سرکردہ علماء کے پاس ہی ہے تاہم دہ صالح کے رہائشی اپنے علماء کے جاری کردہ اس فرمان کو فتویٰ ہی قرار دے رہے ہیں۔

ایک دکان کے نو عمر مالک نے اس فتوے پر زبردستی عمل کروانے کی کوشش کرنے والے ایک میئر کو گولی مار کر ہلاک کر دیا تھا۔ اس فتوے میں خواتین کے محرم کے بغیر کلینک میں جانے پر بھی پابندی عائد کی گئی ہے اور انتباہ کیا گیا ہے کہ اگر حکام نے ان مطالبات پر کوئی مخالفانہ ردعمل ظاہر کیا تو اُن کے خلاف جہاد شروع کر دیا جائے گا۔ پولیس کے مطابق فائرنگ سے ہلاک ہونے والا میئر بھی اسی جہاد کے خوف سے اس فتوے پر عملدرآمد کروانے کی کوشش کر رہا تھا۔

خبر رساں ادارے روئٹرز سے باتیں کرتے ہوئے ایک مقامی ڈاکٹر شاہ آغا اندرابی اور ایک پولیس کمانڈر کرنل عبدالاحد نبی زادہ نے کاسمیٹکس کی دکانوں کے خلاف لگائے گئے الزامات کو بے بنیاد قرار دیا اور کہا کہ خواتین بغیر کسی رکاوٹ کے گھریلو ضروریات کی چیزیں خریدنے بازاروں میں آ رہی تھیں تاہم قدامت پسند حلقے اس کی مخالفت کرتے ہیں۔ افغانستان کے حقوقِ انسانی کے علمبردار حلقے خواتین کے تحفظ کی ناکافی کوششوں کے لیے کرزئی حکومت کو کڑی تنقید کا نشانہ بنا رہے ہیں۔

اسی دوران خبر رساں ادارے اے ایف پی نے ہفتہ 20 جولائی کو اپنی ایک رپورٹ میں بتایا ہے کہ جمعے کو صوبے خیبر پختونخوا کے ضلع کرک میں قبائلی رہنماؤں اور علماء نے بھی کسی محرم کے بغیر خواتین کے بازاروں میں نکلنے پر پابندی عائد کر دی ہے۔ اے ایف پی سے باتیں کرتے ہوئے عالم اور قبائلی رہنما مولانا مرزاقیم نے ٹیلیفون پر بتایا:’’(اکیلے باہر نکلنے والی) خواتین فحاشی پھیلاتی ہیں اور رمضان کے مہینے میں مردوں کے روزے خراب کرتی ہیں، اس لیے یہ پابندی لگائی گئی ہے اور اس کی خلاف ورزی کرنے والی خواتین کو پولیس کے حوالے کر دیا جائے گا۔‘‘