خیبر پختونخوا گزشتہ قریب ایک دہائی سے دہشت گردی کے نشانے پر ہے۔ اس عرصے میں ملک بھر میں شدت پسندوں کے جانب سے بم دھماکوں میں ہزارہا عام شہری اور ہزاروں سکیورٹی اہلکار بھی ہلاک ہو چکے ہیں، جن میں سے کئی اہلکار تو بموں کو ناکارہ بناتے ہوئے ہلاک ہوئے۔

شدت پسندوں کے حملے روکنے اور دھماکہ خیز مواد کو ناکارہ بنانے کے لیے خیبر پختونخوا پولیس نے صوبے میں پولیس اسکول آف ایکسپلوسیو ہینڈلنگ (Police School of Explosive Handling) کے نام سے ایک ادارہ بنا رکھا ہے، جہاں سکیورٹی اہلکاروں کو بارودی مواد کو ناکارہ بنانے کی تربیت دی جاتی ہے۔

اس اسکول میں جدید آلات اور مشینری کے استعمال کی تربیت بھی دی جاتی ہے تاکہ کسی بھی قسم کے ناخوشگوار حالات میں انسانی جانوں کے ضیاع سے بچا جا سکے۔ نامناسب ٹریننگ کے باوجود سال 2009ء سے اب تک خیبر پختونخوا پولیس قریب چھ ہزار بم ڈی فیوز کر چکی ہے۔

انسپکٹر ضمیر خان خودکش جیکٹ کو ناکارہ بنانے کی تربیت دے رہے ہیں۔ وہ کہتے ہیں کہ اس قسم کے حالات میں کافی محتاط رہنے کی ضرورت ہوتی ہے۔ ان کے بقول خودکش جیکٹ میں کافی مقدار میں بیرنگ بالز کا استعمال کیا جاتا ہے، جس سے شدید تباہی ہوتی ہے۔

ٹریننگ اسکول میں جہاں ایک طرف جدید قسم کے تباہ کن مواد کو ڈی فیوز کرنے کی تربیت دی جاتی ہے، وہیں اس سکول میں دیسی ساخت کے بارودی اور دھماکہ خیز مواد کو ناکارہ بنانے کی تربیت بھی دی جاتی ہے۔

ایکسپلوسیو ہینڈلنگ اسکول میں صوبے بھر سے منتخب پولیس اہلکاروں کو بم ناکارہ بنانے والے روبوٹس استعمال کرنے کے علاوہ تربیت یافتہ کتوں کے ذریعے بارودی مواد کی نشاندہی کی تربیت بھی دی جاتی ہے۔

ایک پریکٹیکل ٹریننگ سیشن کے دوران ماسٹر ٹرینر بم ڈسپوزل اسکواڈ کے جوانوں کو روبوٹ کے درست استعمال کی تربیت دیتے ہوئے۔ اس قسم کے روبوٹ کو دور بیٹھ کر ریموٹ کنٹرول کے ذریعے استعمال کیا جاتا ہے۔ شفیق خان کے بقول خیبر پختونخوا پولیس کے پاس اس قسم کے چار جدید روبوٹس موجود ہیں، جن کا محتلف مواقع پر استعمال کیا جاتا ہے۔

سہولیات کے فقدان کی وجہ سے گزشتہ برسوں کے دوران صوبے کے محتلف اضلاع میں بم ناکارہ بناتے ہوئے کئی صوبائی پولیس اہلکار ہلاک ہو چکے ہیں۔ ان میں کچھ ایسے اعلیٰ عہدیدار بھی شامل تھے، جو شہریوں کو بچاتے ہوئے اپنی جانیں قربان کر گئے۔ اس اسکول میں ان شہداء کی ایک یادگار بھی ہے۔

پولیس اسکول آف ایکسپلوسیو ہینڈلنگ صوبے بھر میں وہ واحد ادارہ ہے، جہاں بم ڈسپوزل اسکواڈ کے ارکان اور دیگر پولیس اہلکاروں کو بارودی مواد ناکارہ بنانے کی تربیت دی جاتی ہے۔ صوبے کے ضلع نوشہرہ میں یہ اسکول اس سال فروری میں قائم کیا گیا تھا، جہاں سے اب تک بیسیوں اہلکار پاس آؤٹ کر چکے ہیں۔

وادی سوات میں روزانہ کی اُجرت پر کام کرنے والے مزدوروں کو کئی ہفتوں تک کام نہیں ملتا اور وہ سارا دن کسی مسیحا کے منتظر رہتے ہیں۔ مینگورہ کے رہائشی مزدور نور زمان نے ڈی ڈبلیو کو بتایا کہ یہ دوسرا ہفتہ ہے کہ انہیں کوئی کام نہیں ملا جس کے باعث انہیں شدید مشکلات کا سامنا ہے اور گھر کے اخراجات پورے کرنا مشکل ہوگیا ہے۔ نور زمان کے مطابق لوگوں سے اُدھار لے کر گھر کا چولہا چل رہا ہے۔

دہشت گردی، فوجی آپریشن اور قدرتی آفات کی وجہ سے تباہ حال وادی سوات کی معیشت تاحال اپنے پیروں پر کھڑی نہیں ہوسکی جس کے باعث کاروبارِ زندگی مفلوج اور مزدور فاقوں پر مجبور ہو گئے ہیں۔

مینگورہ کے ایک اور مزدور عطاءالرحمن نے بتایا کہ روزانہ کی بنیاد پر بڑی مشکل سے تین چار سو روپے کی دہاڑی لگ جاتی ہے، ’’ان پیسوں سے گھر کا کرایہ ادا کریں یا بجلی کا بل؟ گھریلوں اخراجات پوری کریں یا بچوں کی اسکول کی فیس کچھ سمجھ نہیں آتا۔‘‘

روزانہ کی اجرت پر کام کرنے والے مزدوروں کو یہ بھی علم نہیں ہوتا کہ آج پوری دنیا میں اُن کے نام پر چھٹی منائی جا رہی ہے۔ حسین علی نے ڈی ڈبلیو کو بتایا کہ اُنہیں علم نہیں کہ آج کس بات کی چھٹی منائی جارہی ہے، ’’ہم تو اپنے بچوں کی دو وقت کی روٹی کے لیے سرگرداں ہیں۔‘‘

کامران خان چائے کے ہوٹل میں روزانہ کی اجرت پر کام کرتا ہے اور گھر کے دیگر بارہ افراد کے لیے روزی روٹی کا بندوبست کرتا ہے۔ کامران کے مطابق روزانہ پانچ سو روپے ملتے ہیں جس سے گھر کے اخراجات بمشکل پورے ہوتے ہیں، ’’مہنگائی میں روزبروز اضافے اور کم اجرت سے زندگی جینا مشکل ہوگیا ہے۔‘‘

ملک بھر کی طرح وادی سوات کے مزدوروں کے استحصال میں دن بدن اضافہ ہوتا جا رہا ہے۔ تجزیہ کاروں کےمطابق مؤثر قانون سازی نہ ہونے اور حکومتی عدم توجہی کے باعث مزدور طبقہ غربت کی چکی میں پستا چلا جا رہا ہے۔ اگر مؤثر قانونی سازی کی جائے اور اس پر فوری عمل کیا جائے تو اس طبقے کی محرومیاں دور ہو سکتی ہے۔

وادی سوات میں اس وقت معاشی حالات ابتر ہیں جس کے باعث مزدوروں کی زندگیاں بھی متاثر ہو رہی ہے، مینگورہ کے ایک کاروباری شخص اکرام اللہ نے بتایا کہ جب حالات بہتر تھے تو کاروبار بھی منافع بخش تھا مگر اب ہم اپنا خرچہ برداشت نہیں کرپاتے تومزدوروں کو کہاں سے دیں۔

سوات میں ریاستی دور سے بہت سے کارخانے اور فیکٹریاں چل رہی تھیں جن میں سلک اور کاسمیٹک انڈسٹریز نمایاں تھیں، اب وہ کارخانے بھی زیادہ تر بند ہیں اور اس میں کام کرنے والے سیکڑوں مزدور بے روزگار ہیں۔