خبر رساں ادارے اے ایف پی نے سڈنی سے موصولہ اطلاعات کے حوالے سے بتایا ہے کہ آسٹریلوی وزیر خارجہ جولی بشپ نے خبردار کیا ہے کہ شام و عراق میں فعال سنی انتہا پسند گروہ ’اسلامک اسٹیٹ‘ یا داعش کیمیکل ہتھیاروں کا استعمال کر سکتی ہے۔

جمعے کی رات ایک انٹرنیشنل فورم سے خطاب میں انہوں نے اس یقین کا اظہار بھی کیا کہ شام میں گزشتہ چار سالوں سے جاری خانہ جنگی کے دوران دمشق حکومت سارِن اور کلورین جیسی مہلک زہریلی گیسیں استعمال کر چکی ہے۔

جولی بشپ نے کہا کہ داعش کی طرف سے بھی ایسے ہتھیاروں کے استعمال کی اِکا دُکا کوششوں کے تناظر میں کہا جا سکتا ہے کہ یہ گروہ کیمیکل ہتھیاروں کی تیاری کی ایک بڑی خواہش رکھتا ہے۔ پرتھ میں ایک اجتماع سے خطاب کرتے ہوئے انہوں نے مزید کہا، ’’داعش کی طرف سے کلورین گیس کے استعمال اور مغرب سمیت دیگر علاقوں سے اعلیٰ ٹیکنیکل ماہرین کی بھرتیوں سے اندازہ ہوتا ہے کہ یہ انتہائی سنجیدگی کے ساتھ کیمیکل ہتھیاروں کی تیاریوں میں مصروف ہے۔‘‘

آسٹریلوی وزیر خارجہ جولی بشپ کے مطابق ایسا ممکن ہے کہ داعش کے ہزاروں انتہائی تربیت یافتہ رکن کیمیکل ہتھیار بنانے کی اہلیت رکھتے ہوں۔ انہوں نے زور دیا کہ زہریلے کیمیاوی مواد کے پھیلاؤ کے سدباب کے لیے عالمی ایکشن کی ضرورت ہے۔

شام میں کیمیاوی ہتھیاروں کے استعمال پر تبصرہ کرتے ہوئے ان کا یہ بھی کہنا تھا کہ یہ ایک ایسی حقیقت ہے جو بار بار اس امر کی طرف توجہ مبذول کراتی ہے کہ عالمی برادری کو کیمیاوی اور حیاتیاتی ہتھیاروں کے خطرات سے چوکنا رہنا ہو گا۔

جولی بشپ نے کہا کہ اسلامک اسٹیٹ سمیت عالمی دہشت گردوں کے دیگر گروہ دنیا بھر کی سلامتی کے لیے سب سے بڑا خطرہ بن چکے ہیں۔ قبل ازیں اس خاتون سیاستدان نے یہ بھی کہا تھا کہ غیر ممالک جا کر ان دہشت گرد گروہوں کے ساتھ مل کر لڑنے والے آسٹریلوی باشندوں کی تعداد میں کمی نہیں ہو رہی ہے۔

ایک اندازے کے مطابق آسٹریلیا سے تعلق رکھنے والے سو سے زائد شہری اس وقت عراق و شام میں فعال جہادی تنظیم اسلامک اسٹیٹ کی پرتشدد کارروائیوں میں معاونت فراہم کر رہے ہیں۔