عموماً کینسر کے خلیے جسم کے اندر پھیلتے ہیں لیکن ’ٹسمانین ڈیول‘ یا شیطان تسمانیا کی پریشانی یہ ہے کہ اس کا کینسر منہ کے باہر اور اندر پھیلتا ہے۔ یہ ایک متعدی مرض ہے اور اِس میں صرف اِسی کی نسل مبتلا ہوتی ہے۔ انسان اور دوسرے جانور اس کینسر سے محفوظ ہیں۔ اس مرض کو ڈیول فیشئل ٹیومر ڈیزیز (DFTD) کہتے ہیں۔ اس جانور میں اس مہلک بیماری کا انکشاف بیس برس قبل ہوا تھا۔

جس شیطان تسمانیا کو یہ بیماری لاحق ہو جاتی ہے، یہ اس کے چہرے پر بڑے بڑے پھوڑوں کی طرح دکھائی دیتی ہے۔ اس بیماری سے اس کی کتے جیسی تھوتھنی اور مجموعی چہرہ انتہائی خراب دکھائی دینے لگتا ہے۔ اس بیماری سے اس کو ایک دردناک موت کا سامنا ہوتا ہے۔ اس کے مرنے کی بڑی وجہ بھوک ہے کیونکہ منہ کے اندر زخموں کی وجہ سے وہ کچھ بھی نہیں کھا سکتا۔

گزشتہ چھ سو برسوں سے شیطانِ تسمانیا آسٹریلوی علاقے تسمانیا کے جنگلات میں ہی بستے ہیں۔ انسانی بیزاری کی وجہ اس جانور کا غیر ضروری شور شرابہ اور چیخنا ہے۔ انگلش نوآبادیاتی دور میں انہیں زہر دینے کے علاوہ پکڑ کر ہلاک بھی کیا گیا۔

یہ جانور رات کا راہی ہے۔ سورج غروب ہونے کے بعد اس کی سرگرمیوں کا آغاز ہو جاتا ہے۔ اب انسانی بستیوں کے پھیلاؤ سے ٹسمانین ڈیول کی افزائش اور جینے کے علاقے محدود ہو کر رہ گئے ہیں۔ کئی مرتبہ کاروں کی زد میں آ کر بھی ان کی ہلاکت ہوئی ہے۔

شیطانِ تسمانیا کے لیے دو میں سے ایک ٹروونا پارک ہے۔ اس میں ان کی خاص نگہداشت کی جاتی ہے۔ اس پارک سے وابستہ آندرو کیلی کا خیال ہے کہ ماحولیاتی تبدیلیوں سے تسمانیا میں پیدا ہونے والی خشک سالی نے اس جانور کے اندر اسٹریس پیدا کیا اور اس کا مدافعتی نظام کمزور ہو کر رہ گیا اور یوں ٹیومر کے سیل پیدا ہونا شروع ہو گئے۔

آسٹریلوی جنگلاتی حیات کی دو پارکس ’ٹرووُونا‘ اور ’ڈیولز کریڈل‘ میں اس جانور میں پیدا ہونے والی بیماری پر توجہ مرکوز کی گئی ہے۔ ان پارکس میں شیطانِ تسمانیا کی افزائش کے علاوہ انہیں بڑا بھی کیا جاتا ہے اور پھر انہیں جنگل میں چھوڑ دیا جاتا ہے تا کہ وہ آزادی سے گھوم پھر سکیں۔ ان دونوں مقامات پر آٹھ سو جانور رکھے گئے ہیں۔ ان کی بیماری کے خلاف خصوصی ریسرچ بھی جاری ہے۔

کئی حیاتیاتی سائنسدان ان دنوں شیطانِ تسمانیا کے منہ کے کینسر کے خلاف ویکسین کی تیاری میں مصروف ہیں۔ اس کے لگانے سے شیطانِ تسمانیا میں کینسر کے خلاف مدافعت پیدا ہونے کا امکان ظاہر کیا گیا ہے۔ اس کے جینز نے ویکسین کی مدد سے کینسر کے خلاف مدافعت پیدا کی ہے، جسے حوصلہ افزا قرار دیا جا رہا ہے۔