برسلز میں ارمانڈو نامی تیز رفتار کبوتر کی نیلامی خاصی دلچسپ رہی۔ چین کے دو شہریوں کے درمیان سخت مقابلہ دیکھا گیا۔ بالآخر ارمانڈو ایک  اعشاریہ پانچ ملین ڈالر میں فروخت ہوا۔ کسی کبوتر کی خریداری کے لیے یہ اب تک کی سب سے بڑی اور تین گنا زیادہ لگائے جانے والی بولی تھی۔  

پِجن پیراڈائز نامی کمپنی کے جارج  فراری نے خبر رساں ادارے روئٹرز کو بتایا کہ،’’کسی نے بھی اتنی بڑی نیلامی کا نہیں سوچا تھا۔‘‘

 چین کے لوگوں کی پرندوں کے ساتھ محبت جتنی پرانی ہے، مغربی یورپ کے ملک بیلجیم میں پرندوں کی نیلامی کا یہ کھیل بھی اتنا ہی قدیم ہے۔

 اتوار سترہ مارچ کی شب ارمانڈو کی نیلامی میں شائقین کے درمیان مقابلہ دیکھنے کے لائق تھا۔ تیز اڑان بھرنے میں ارمانڈو اپنی مثال آپ ہے۔ ارمانڈو نے ابھی تک کے کبوتروں کے تیز رفتاری اور طویل وقت تک اڑنے کے تمام ریکارڈ توڑ ڈالے ہیں اور یہی اس کی انفرادیت کی وجہ ہے۔ اس تیز رفتار کبوتر  کے مالک جویل ورشوٹ تھے۔ چین کے جس شخص نے یہ کبوتر خریدا ہے،اس کا نام ظاہر نہیں کیا گیا۔