دنیا کی فربہ ترین خاتون ابوظہبی میں انتقال کر گئیں
صائمہ حیدر
25 ستمبر 2017
مصر سے تعلق رکھنے والی دنیا کی فربہ ترین خاتون متحدہ عرب امارات کے ایک ہسپتال میں انتقال کر گئی ہیں۔ سینتیس سالہ ایمان عبدل العطی کا وزن بڑھتے بڑھتے پانچ سو کلو گرام تک پہنچ گیا تھا۔
اشتہار
ابو ظہبی میں برجیل ہسپتال کے ذرائع کا کہنا ہے کہ ایمان کا انتقال آج بروز پیر صبح چار بج کر پینتیس منٹ پر ہوا۔ ڈاکٹروں نے ایمان عبدل العطی کی موت کا سبب اُن کے حد سے زیادہ بڑھے ہوئے وزن کو قرار دیا ہے جس کی وجہ سے انہیں دل کی بیماری ہوئی اور گردوں نے بھی کام کرنا چھوڑ دیا تھا۔ ہسپتال کے طبی عملے نے ایمان کے گھر والوں کو تعزیت کا پیغام دیا ہے۔
ڈاکٹروں کا کہنا تھا کہ ایمان کو موٹاپے کی بیماری اُن کے گلے کے غدود یا تھائیرائڈ کے عمل میں خلل کے سبب ہوئی۔ برجیل ہسپتال میں ایمان کی دیکھ بھال اور علاج بیس ڈاکٹروں پر مشتمل ایک ٹیم کر رہی تھی۔ مصر کے بندرگاہی شہر اسکندریہ سے تعلق رکھنے والی ایمان احمد کو رواں برس 11 فروری کو علاج کے لیے بھارت کے اقتصادی مرکز ممبئی لایا گیا تھا، جہاں سیفی ہسپتال میں ان کا علاج کیا گیا۔
خیال رہے کہ اُس وقت دنیا کی فربہ ترین خاتون سمجھی جانے والی ایمان احمد العاطی کو بھارت لانے کے لیے ایئربس کے ہوائی جہاز میں خصوصی طور پر رد وبدل کیا گیا تھا۔ ایمان بچپن سے ہی ایلیفنٹیاسس (elephantiasis) نامی ایک بیماری کا شکار تھیں، جس میں جسم کے اعضاء سوزش کا شکار ہو جاتے ہیں اور اسی باعث وہ بہت ہی کم حرکت کر سکتی تھیں۔ اپنے مسلسل بڑھتے وزن کے سبب وہ بہت سی دیگر طبی پیچیدگیوں کا بھی شکار تھیں۔ ایمان کی بہن نے گزشتہ برس اکتوبر میں وزن میں کمی لانے والی سرجری کے ماہر بھارتی ڈاکٹر مفضل لکڑ والا سے رابطہ کیا تھا اور بتایا تھا کہ ان کی بہن کو فوری طور پر علاج کی ضرورت ہے۔
سست الوجود لوگوں کے لیے وزن میں کمی کی 7 تجاویز
آپ اپنا وزن کم کرنا چاہتے ہیں لیکن نہ تو آپ کے پاس ورزش کرنے کی فرصت ہے اور نہ ہی ڈائٹنگ کرنے کی خواہش تو پڑھیں یہ سات قیمتی مشورے ...
تصویر: Fotolia/runzelkorn
چيوئنگ گم چبائیں
زیادہ تر لوگ بسکٹ یا چھوٹی موٹی نمکین اور میٹھی چیزیں اس لیے نہیں کھاتے کہ اُنہیں بھوک لگتی ہے بلکہ اس لیے کہ وہ ہر وقت کچھ نہ کچھ چباتے رہنا چاہتے ہیں۔ چيوئنگ گم سے ایسا کرنے کی عادت کم ہو سکتی ہے۔
تصویر: picture-alliance/dpa
کافی پئیں
کافی پینے سے کھانا جلدی ہضم ہوتا ہے اور اس سے زیادہ کیلوریز جلتی ہیں۔ تین گھنٹے کے لیے تو کافی مدد کر ہی سکتی ہے۔ اگر کافی پسند نہیں تو چائے پئیں۔
تصویر: Colourbox
ذہنی تناؤ سے بچیں
تحقیق سے پتہ چلتا ہے کہ ذہنی دباؤ میں رہنے والی خواتین کو موٹاپے کے مسئلے کا زیادہ سامنا کرنا پڑتا ہے۔ ایک تحقیق کے مطابق پُرسکون مزاج والی خواتین دیگر کے مقابلے میں روزانہ 104 کیلوریز زیادہ جلا پاتی ہیں۔
تصویر: Fotolia/The Photos
پاؤں تھركانا ...
... بھی فائدہ مند ہوتا ہے۔ جب موسیقی سنیں تو گیت کی دُھن پر پاؤں تھركانا نہ بھولیں۔ اس سے جسم میں ورزش کرنے جتنی تو نہیں لیکن کچھ کیلوریز تو ضرور جلیں گی۔
تصویر: colourbox
بس 10 منٹ
سستی کی وجہ سے اگر آپ ہر روز ورزش کے لیے ایک گھنٹہ نہیں دے سکتے تو دَس منٹ تو نکال ہی سکتے ہیں۔ محض دس منٹ کی سیر ایک گھنٹے تک کے لیے کیلوریز جلانے میں مدد دیتی ہے۔
تصویر: Fotolia/blas
گیند پر بیٹھیں
اگر آپ دن بھر دفتر میں کمپیوٹر کے سامنے بیٹھے رہتے ہیں، تو ایک سٹیبلٹی بال خرید لیں۔ کرسی پر بیٹھنے کی مقابلے میں اس طرح کی گیند پر بیٹھنے سے دن بھر میں 260 تک کیلوریز جلائی جا سکتی ہیں۔
تصویر: picture-alliance/dpa/M. Schönherr
مصالحے دار کھانا
مصالحے نہ صرف کھانے کے ذائقے کو بڑھاتے ہیں بلکہ ایک طرح سے وزن میں کمی کا بھی سبب بن سکتے ہیں۔ مصالحے دار کھانا کھانے سے کیلوریز بھی جلتی ہیں اور بہت جلد ایسا بھی لگنے لگتا ہے کہ پیٹ بھر گیا ہے اور تب آپ کھانے سے ہاتھ کھینچ لیتے ہیں۔