دوسرا ون ڈے، سری لنکا کے خلاف پاکستان کا برا آغاز
14 نومبر 2011![](https://static.dw.com/image/6452618_800.webp)
اس سے قبل بیٹنگ کے لیے خاصی بہتر سمجھی جانے والی پچ پر سری لنکا نے ٹاس جیت کر پہلے بیٹنگ کرنے کا فیصلہ کیا تھا، تاہم پاکستانی بولروں نے اسے تیزی سے رنز نہیں بننے دیے۔
سری لنکا کی جانب سے سب سے کامیاب بلے باز اوپنر تھارنگا رہے، جو نہایت ذمہ داری سے بیٹنگ کرتے ہوئے 41 ویں اوور تک کریز پر موجود رہے۔ تھارنگا نے 120 گیندوں کا سامنا کیا اور 77 رنز بنائے۔ تاہم دوسرے اینڈ پر کوئی بھی بلے باز ان کا زیادہ دیر تک ساتھ نہ دے سکا۔ صرف جے وردھنے نے آ کر تیزی سے گرتی ہوئی وکٹوں کو روکا اور 57 گیندوں پر 50 رنز کی ایک تیز اننگز کھیل کر اپنی ٹیم کے مجوعی اسکور میں اضافہ کیا۔ جے وردھنے کے آؤٹ ہوتے ہی باقی کھلاڑی زیادہ دیر تک پاکستانی بولروں کا مقابلہ نہ کر سکے اور رن ریٹ نیچے کی طرف جاتا چلا گیا۔
سری لنکا کی طرف سے تھارنگا کے 77 رنز کے علاوہ دلشان نے چالیس گیندوں پر 28 رنز بنائے اور وہ شاہد آفریدی کی ایک تیز گیند پر اپنی وکٹ گنوا بیٹھے۔ سنگاکارا 13 گیندوں پر صرف پانچ رنز بنا کر پویلین لوٹ گئے۔ چاندیمال کو سعید اجمل نے 15 کے اسکور پر آؤٹ کیا۔
میتھیو صرف تین رنز بنا سکے جبکہ مینڈس اور ملینگا مقررہ اوورز کے اختتام تک بالترتیب 17 اور دو رنز پر ناٹ آؤٹ رہے۔
پاکستان کی طرف سے سب سے کامیاب بولر سعید اجمل رہے، جنہوں نے دس اوورز میں 35 رنز دے کر تین کھلاڑیوں کو آؤٹ کیا۔ شاہد آفریدی نے دو جبکہ اعزاز چیمہ اور عبدالرزاق نے ایک ایک کھلاڑی کو آؤٹ کیا۔
رپورٹ: عاطف توقیر
ادارت: مقبول ملک