ایک اندازے کے مطابق شام میں ہونے والی خانہ جنگی کے دوران اب تک ایک لاکھ سے زائد افراد ہلاک ہو چکے ہیں۔ شام میں حکومت کی جانب سے کیمیائی ہتھیاروں کے استعمال کے بعد امریکا اور دیگر اتحادی ممالک نے دمشق حکومت کے خلاف فوجی کارروائی کا فیصلہ کیا۔ تاہم اس عسکری کارروائی کے نتائج کیا نکلیں گے، اس کا کسی کو بھی اندازہ نہیں۔

شام میں فروری 2011ء میں خانہ جنگی کا آغاز اس وقت ہوا، جب عرب انقلاب سے متاثر ہو کر شامی اپوزیشن نے ملکی سربراہ صدر بشارالاسد کے خلاف مظاہرے شروع کر دیے۔ تاہم جیسے ہی حکومت نے مخالف رہنماؤں کو گرفتار کرنا شروع کیا، اس احتجاج نے شدت پکڑ لی۔ یہ لوگ جمہوریت کے نفاذ اور سیاسی قیدیوں کی رہائی کا مطالبہ کر رہے تھے۔

مظاہروں کی شدت کو دیکھتے ہوئے دمشق حکومت نے فوج اور ٹینک متعلقہ علاقوں میں بھیج دیے تاکہ بد امنی پر قابو پایا جا سکے۔ اس دوران ہونے والی جھڑپوں میں روزانہ عام شہری ہلاک ہوتے رہے اور اسی وجہ سے مظاہروں کا دائرہ مزید وسیع ہوتا چلا گیا۔ اس موقع پر امریکا اور یورپی یونین نے شامی حکام کے خلاف پابندیاں عائد کرنے کا اعلان کیا تھا۔

اسد حکومت کے خلاف ہونے والے مظاہروں میں معاشروں کے تمام طبقوں نے بڑھ چڑھ کر حصہ لیا۔ شام سے اپوزیشن رہنماؤں کی ایک بڑی تعداد نے فرار ہوکر پڑوسی ملک ترکی میں پناہ لی۔ وہاں جمع ہو کر ان تمام گروپوں نے بشارالاسد کے خلاف متحد ہوکر لڑنے کا فیصلہ کیا۔

شام میں ملکی افواج اور حکومت مخالفین کے مابین جھڑپوں کا سلسلسہ وقفے وقفے سے جاری رہا۔ دسمبر 2011ء میں عرب لیگ نے صورتحال کا جائزہ لینے کے لیے اپنے مبصرین شام روانہ کیے۔ اس دوران بمباری جاری رہی اور عرب لیگ نے مبصرین کو واپس بلا لیا۔ حکومتی دستوں کی پیش قدمی جاری رہنے کی بناء پر آہستہ آہستہ شام کے متعدد شہر خانہ جنگی کی لپیٹ میں آ گئے۔

مئی 2012ء میں باغیوں کے گڑھ حمص میں حکومتی افواج کے حملوں میں سینکڑوں شہری مارے گئے۔ پہلی مرتبہ اقوام متحدہ کی سلامتی کونسل نے متفقہ طور پر اس کارروائی کی مذمت کی۔ اقوام متحدہ کی جنرل اسمبلی نے اسد سے مستعفی ہونے کا مطالبہ کیا۔ امریکی صدر اوباما نے اعلان کیا کہ اگر اسد نے اپوزیشن کے خلاف کیمیائی ہتھیار استعمال کیے تو امریکا حملہ کرے گا۔

اسد حکومت کی طرف سے باغیوں کے مختلف گروپوں کے ٹھکانوں پر بمباری کی جاتی رہی۔ امریکا اور برطانیہ امدادی ساز و سامان کے ذریعے باغیوں کی مدد کرتے رہے اور یہ کہتے رہے کہ ہتھیاروں کی فراہمی پر عائد پابندی ختم کی جانی چاہیے۔ بالآخر اس پابندی میں مزید توسیع نہیں کی گئی، جس کے بعد باغیوں کو اسلحے کی فراہمی مزید غیر قانونی نہیں رہی۔ ترکی اور اسرائیل کی سرحد پر وقتاً فوقتاً جھڑپیں عمل میں آتی رہی ہیں۔

مختلف اپوزیشن گروپوں نے نومبر 2012ء میں ایک قومی اتحاد تشکیل دیا، جسے کچھ ہی عرصے بعد امریکا اور دیگر ملکوں نے شامی قوم کا جائز نمائندہ تسلیم کر لیا۔ انتہا پسند النصرۃ فرنٹ اس اتحاد میں شامل نہیں ہے۔ دریں اثناء کئی ملین شامی شہری پناہ کی تلاش میں گھر بار چھوڑنے پر مجبور ہو چکے ہیں۔ لاکھوں شہری شام کے ہمسایہ ممالک میں مہاجر کیمپوں میں پڑے ہوئے ہیں۔

جون 2013ء میں شامی فوج نے لبنانی حزب اللہ کے فوجیوں کی مدد سے دفاعی اعتبار سے اہم شہر قصیر کو باغیوں سے واپس چھین لیا۔ اگست میں غوطہ میں زہریلی گیس کے ایک مبینہ حملے میں سینکڑوں انسان ہلاک ہو گئے۔ امریکا اور دیگر ملکوں نے اس یقین کا اظہار کیا کہ اس حملے کے پیچھے اسد حکومت کا ہاتھ ہے۔ اوباما کے مطابق ایک سال پہلے اُنہوں نے جو سرخ لائن کھینچی تھی، اس حملے سے وہ لائن پار کر لی گئی ہے۔

ماہرین کے مطابق اس تنازعے کا کوئی بھی فریق فوجی اعتبار سے کامیاب نہیں ہو سکتا۔ اسد غالباً اس بات کا مکمل تہیہ کیے ہوئے ہیں کہ مغربی دنیا کی طرف سے تمام تر دھمکیوں کے باوجود وہ اقتدار نہیں چھوڑیں گے۔ باغیوں کو بھی یقین ہے کہ یہ تنازعہ پُر امن طریقے سے حل نہیں ہونے والا۔ اثر و رسوخ کے لیے ہونے والی کشمکش میں نہ تو عالمی طاقتیں اور نہ ہی علاقائی طاقتیں اپنے اپنے موقف سے پیچھے ہٹنے کو تیار ہیں۔

عالمی طبی تنظیم ’ڈاکٹرز ودآؤٹ بارڈرز‘ (MSF) نے پہلی مرتبہ تصدیق کی ہے کہ ان کے پاس مجموعی طور پر کیمیائی گیس سے متاثر 3600 مریض لائے گئے، جن میں سے 355 کو بچایا نہ جا سکا۔

شامی باغیوں نے الزام عائد کیا تھا کہ ان کے خلاف اسد حکومت نے کیمیائی ہتھیاروں کا استعمال کیا ہے، جس کے نتیجے میں عورتوں اور بچوں سمیت ہزاروں افراد مارے گئے۔ صدر بشار الاسد حکومت ان الزامات کی تردید کرتی ہے۔

کیمیائی ہتھیاروں کا استعمال دمشق کے مضافاتی علاقے غوطہ میں کیا گیا ہے اور وہاں جانور بھی ان سے متاثر ہوئے بغیر نہیں رہ سکے۔

ایم ایس ایف کا کہنا تھا کہ وہ نہ تو سائنسی طور پر ان ہتھیاروں کے کیمیائی ہونے کی تصدیق کر سکتے ہیں اور اور نہ اس کے ذمہ داروں کا تعین، ’’ تاہم جو مریض ہمارے پاس لائے گئے ان میں واضح طور پر نیوروٹاکسن کی علامات دیکھی جا سکتی تھیں۔‘‘

ابھی تک ایسا کوئی امکان نہیں ہے کہ اقوام متحدہ کے معائنہ کاروں کو جائے وقوعہ تک رسائی دی جائے گی۔ دوسری جانب باغیوں کی طرف سے شواہد اکھٹے کیے جا رہے ہیں۔

ان حملوں میں بچ جانے والوں کو مقامی سطح پر ہی ابتدائی طبی امداد فراہم کی جا رہی ہے۔ اقوام متحدہ کے سیکرٹری جنرل بان کی مُون نے کیمیائی ہتھیاروں کے اس مبینہ استعمال کو عالمی قوانین کی سنگین خلاف ورزی قرار دیا تھا۔

اُدھر ایرانی صدر حسن روحانی نے بھی شام میں کیمیائی ہتھیاروں کے ممکنہ استعمال کی خبریں سامنے آنے پر گہری تشویش کا اظہار کیا ہے۔ ایرانی صدر نے کہا کہ شام کی موجودہ صورت حال اور وہاں کیمیائی ہتھیاروں کے استعمال میں بڑے پیمانے پر معصوم لوگوں کی ہلاکت کی اطلاعات بہت ہی زیادہ پریشان کن ہیں۔

ہفتےکی شام دمشق حکومت نے الزام عائد کرتے ہوئے کہا ہے کہ کیمیائی ہتھیاروں کا استعمال باغیوں نے کیا تھا۔ شام کے سرکاری ٹیلی وژن کے مطابق حکومتی فورسز نے بڑی تعداد میں ایسے زہریلے مادے قبضے میں لیے ہیں جو باغیوں کے زیر استعمال علاقوں میں چھپائے گئے تھے۔ آزاد ذرائع سے ابھی تک ان حکومتی دعووں کی تصدیق نہیں ہو سکی ہے۔

ان حملوں میں بچوں اور خواتین کی ایک بڑی تعداد متاثر ہوئی ہے۔ دوسری جانب مبینہ طور پر شامی حکومت کی طرف سے کیمیائی ہتھیاروں کے استعمال کی خبروں کے بعد امریکی بحریہ کے یونٹوں نے شام کی طرف پیش قدمی شروع کر دی تھی۔