برطانيہ کا يورپی يونين سے اخراج کا تاريخی فيصلہ اور اس فيصلے کی ايک مرکزی وجہ بننے والا اميگريشن کا معاملہ، يہ وہ اہم ترين موضوعات ہيں، جو آئندہ دو دنوں تک برسلز ميں جاری سمٹ ميں يورپی سربراہان کی توجہ کا مرکز بنيں گے۔

يورپی يونين اور ترکی کے مابين رواں سال مارچ ميں طے پانے والے ايک متنازعہ معاہدے کے نتيجے ميں بلقان خطے کے ممالک سے گزرنے والے روٹ کے ذريعے اگرچہ غير قانونی ہجرت کافی حد تک محدود تو ہو گئی ہے تاہم بلاک پر کافی دباؤ ہے کہ مرکزی بحيرہ روم کے راستے شمالی افريقہ سے مہاجرين کی آمد کو بھی روکا جائے۔ ترک سرزمين سے يونانی جزائر پر مہاجرين کی آمد کی اوسط جنوری ميں لگ بھگ دو ہزار يوميہ تھی، جو مئی ميں صرف پچاس رہ گئی۔ تاہم اسی دوران شمالی افريقہ سے اٹلی پہنچنے والے پناہ گزينوں کی تعداد ميں قريب چار گنا کا نماياں اضافہ ريکارڈ کيا گيا ہے۔ جنوری ميں يوميہ بنيادوں پر 176 مہاجرين اطالوی ساحلوں تک پہنچ رہے تھے جبکہ گزشتہ ماہ مئی ميں يہ تعداد اوسطً 643 تھی۔

توقع ہے کہ منگل اٹھائيس اور بدھ انتيس جون کے دن جاری رہنے والی سمٹ ميں يورپی رہنما يورپی کميشن کے ان منصوبوں کی توثيق کريں گے، جن کے ذريعے شمالی افريقی رياستوں سے غير قانونی ہجرت کے روک تھام کے ليے ان ممالک کو اقتصادی مراعات دی جائيں گی۔ غير قانونی طور پر يورپی بر اعظم پہنچنے والے مہاجرين کی ملک بدری کی راہ ہموار کرنے کے ليے آبائی ممالک کے ساتھ ڈيل اور اس کے بدلے سرمايہ کاری کے حوالے سے منصوبوں کو آگے بڑھايا جائے گا۔ امکان ہے کہ ايسے منصوبوں کو اس سال کے اختتام سے قبل حتمی شکل دی جا سکتی ہے۔

دو روزہ يورپی سمٹ ميں اہم ترين موضوع البتہ برطانيہ ميں تيئس جون کو ہونے والے ريفرنڈم کے نتائج کے تحت برطانيہ کا يورپی يونين سے اخراج کا تاريخی فيصلہ ہے، آج کل ہر ايک کے ذہن ميں بس يہی سوال ہے کہ اب کيا ہو گا؟ سمٹ ميں بلاک کے رکن ممالک کے سربراہان اسی سوال کا جواب تلاش کرنے کی کوشش کريں گے۔

برسلز ميں ہونے والے اس اہم سربراہی اجلاس کے ديگر اہم موضوعات ميں يوکرائن کے حوالے سے ہالينڈ ميں ہونے والا ريفرنڈم ہے۔ يورپی يونين اور یوکرائن کے مابين تعاون کا ايک معاہدہ تو طے پا چکا ہے تاہم ہالينڈ ميں ہونے والے ايک ريفرنڈم کے نتيجے ميں اس پر عملدرآمد روک ديا گيا تھا۔ ايک يورپی سفارت کار کے بقول امکان ہے کہ ڈچ وزير اعظم مارک روٹے ديگر يورپی رہنماؤں سے يہ مطالبہ کريں کہ وہ کوئی ايسا حکم نامہ جاری کريں، جس سے يہ واضح ہو سکے کہ يہ معاہدہ يوکرائن کو يورپی بلاک کی رکنيت کے قريب نہيں لاتا۔

امريکا اور کينيڈا کا يورپی يونين کے ساتھ آزاد تجارت کا زير غور معاہدہ بھی سمٹ کے موضوعات ميں شامل ہے۔ ’بريگزٹ‘ کے بعد اب اس معاہدے ميں خاصی رد و بدل کا امکان ہے۔ يورپی کميشن بلاک کی تجارت سے متعلق امور کی نگران ہے اور اس سمٹ ميں کميشن کی جانب سے رہنماؤں کو اب تک کی پيش رفت کا خلاصہ پيش کيا جائے گا۔

آئندہ ماہ پولينڈ کے دارالحکومت وارسا ميں مغربی دفاعی اتحاد نيٹو کی ايک اہم سمٹ ہونے والی ہے، جس ميں اس عسکری اتحاد کے يورپی يونين کے ساتھ تعاون کے ايک معاہدے کو حتمی شکل دی جانا ہے۔ نيٹو کے سيکرٹری جنرل یينس اسٹولٹن برگ اس حوالے سے پيش رفت کے بارے ميں شرکاء کو آگاہ کريں گے۔

علاوہ ازيں يورپی يونين کی خارجہ پاليسی کی سربراہ فريڈريکا موگرينی بلاک کی آئندہ کی پاليسی کے حوالے سے بات چيت کريں گی۔ دو روزہ سمٹ ميں ڈيجيٹل سيکٹر کی ترقی کی راہ ميں موجود رکاوٹوں کو دور کرنے کے بارے ميں بھی تبادلہ خيال کيا جانا ہے۔