دو ہفتوں میں نو حملے، کابل پوليس چيف مستعفی
30 نومبر 2014![](https://static.dw.com/image/18102319_800.webp)
نيوز ايجنسی اے ايف پی کی کابل سے موصولہ رپورٹوں کے مطابق کابل پوليس کے ترجمان حشمت استانک زئی نے بتايا کہ جنرل ظہير ظہير نے وزارت داخلہ کو مطلع کر ديا ہے کہ وہ پوليس سربراہ کے طور پر ذمہ دارياں جاری نہيں رکھ سکتے اور وزير داخلہ نے ان کا استعفی منظور بھی کر ليا ہے۔
جنرل ظہير نے اپنے استعفے کی کوئی باقاعدہ وجہ بيان نہيں کی ہے۔ تاہم انہوں نے اپنے عہدے سے مستعفی ہونے کا يہ فيصلہ ايک ايسے وقت کيا ہے کہ جب کابل ميں پچھلے دو ہفتوں کے دوران جنگجوؤں کی طرف سے نو مختلف حملے کيے جا چکے ہيں۔ ان حملوں ميں غير ملکيوں کے زير انتظام کمپاؤنڈز اور سفارت خانوں کی گاڑيوں کے علاوہ وہاں تعينات امريکی فوج کے اہلکاروں کو بھی نشانہ بنايا گيا۔
جنرل ظہير ظہير کی طرف سے مستعفی ہونے کا فيصلہ آج اُس وقت سامنے آيا، جب کچھ ہی دير پہلے اُنہوں نے کابل ميں گزشتہ روز ہونے والے ايک حملے ميں تين غير ملکيوں کی ہلاکت کی تصديق کی تھی۔ کابل ہی ميں آج منعقدہ ايک پريس کانفرنس سے خطاب کرتے ہوئے اُنہوں نے بتايا، ’’انتيس نومبر کے روز ہونے والے حملے ميں کُل چار افراد مارے گئے، جن ميں ايک افغان شہری کے علاوہ تين غير ملکی بھی شامل تھے۔ غير ملکی شخص ايک بين الاقوامی تنظيم کا سربراہ تھا اور وہ اپنے ايک بيٹے اور ايک بيٹی کے ہمراہ مارا گيا۔‘‘ جنرل ظہير نے مزيد بتايا کہ مقتولين کا تعلق جنوبی افريقہ سے تھا۔
دريں اثناء افغان طالبان کے ترجمان ذبيع اللہ مجاہد نے آج جاری کردہ اپنے ايک ٹوئٹر پيغام ميں دعوی کيا ہے کہ ہفتے کے روز کابل ميں جس غير ملکی کمپاؤنڈ کو نشانہ بنايا گيا، وہ ايک خفيہ مسيحی تبليغی گروپ کا تھا اور حملے ميں وہاں کا دورہ کرنے والے آسٹريلوی شہريوں کو ہدف بنايا گيا تھا۔
اس کے برعکس ’پارٹنرشپ ان ايکيڈمکس اينڈ ڈيولپمنٹ‘ نامی تعليم کے شعبے ميں امداد کرنے والے اايک امريکی گروپ نے اپنی ويب سائٹ پر پيغام جاری کيا ہے کہ اس کے عملے کے تين ارکان کابل حملے ميں لقمہ اجل بن گئے۔ ويب سائٹ کے مطابق متعدد حملہ آوروں نے ان کے دفتر پر دھاوا بول ديا جبکہ فائرنگ اور ايک خود کش دھماکے کے نتيجے ميں ان کے تين ارکان ہلاک اور کئی ديگر زخمی ہو گئے۔ ادارے کے مطابق افغانستان ميں تعليم کے فروغ کے ليے کوششيں جاری رہيں گی۔
افغانستان سے اکثريتی غير ملکی افواج کے انخلاء کا مرحلہ اکتس دسمبر تک پايہ تکميل تک پہنچ رہا ہے۔ بعد ازاں امريکا اور چند ديگر ممالک کے قريب آٹھ تا بارہ ہزار فوجی ايک چھوٹے مشن کا حصہ بن کر افغانستان ميں تعينات رہيں گے، جن کا مقصد مقامی افغان سکيورٹی دستوں کو تربيت و مشاورت فراہم کرنا ہو گا۔ افغانستان ميں طالبان جنگجوؤں کے خلاف کارروائی کرنے کی مرکزی ذمہ داری اب ملکی دستوں کے ہی سپرد ہے۔