افغانستان میں چودہ جون کو منعقد ہوئے صدارتی انتخابات کے دوسرے مرحلے میں ڈالے گئے ووٹوں کی دوبارہ گنتی کا عمل جاری ہے تاہم پیر کے دن صدارتی امیدوار عبداللہ عبداللہ نے ایک مرتبہ پھر کہا کہ انہوں نے اس الیکشن میں کامیابی حاصل کی ہے اور وہ دھاندلی پر مبنی انتخابی نتائج کو تسلیم نہیں کریں گے۔ سابق وزیر خارجہ عبداللہ عبداللہ کی طرف سے دیے گئے اس تازہ بیان سے ایک مرتبہ پھر ایسے خدشات پیدا ہو گئے ہیں کہ افغانستان میں شراکت اقتدار کا معاہدہ ناکام ہو سکتا ہے۔

یہ امر اہم ہے کہ امریکی وزیر خارجہ جان کیری کی کوششوں سے افغان صدارتی انتخابات کے دونوں امیدواروں یعنی عبداللہ عبداللہ اور اشرف غنی نے ایک ڈیل کے تحت ملکی سیاسی بحران کے خاتمے کی یقین دہانی کرائی تھی۔ افغانستان کے مستقبل کے لیے یہ انتخابات اس لیے بھی اہم قرار دیے جا رہے ہیں کیونکہ تیرہ سالہ جنگ کے بعد غیر ملکی فوجی رواں برس کے اختتام تک اس شورش زدہ ملک سے واپس جا رہے ہیں اور ملک میں سکیورٹٰی کی ذمہ داری افغان سیاسی انتظامیہ اور سکیورٹی حکام کے سپرد کرنے کی تیاری جاری ہے۔

پیر آٹھ ستمبر کو عبداللہ عبداللہ نے کابل میں اپنے ایک نشریاتی انٹرویو کے دوران جذباتی انداز میں کہا، ’’عوام کے حقیقی اور شفاف ووٹوں کی بنیاد پر ہم اس الیکشن کے فاتح ہیں۔‘‘ ان کا مزید کہنا تھا، ’’ہم نہ تو دھاندلی پر مبنی نتائج تسلیم کریں گے اور نہ ہی دھاندلی کے نتیجے میں قیام میں آنے والی حکومت کو۔‘‘

عبداللہ عبداللہ کے اس تازہ بیان پر امریکی اسٹیٹ ڈپارٹمنٹ کی ترجمان جین ساکی نے پیر کی شب کہا کہ واشنگٹن حکومت توقع کرتی ہے کہ دونوں افغان صدارتی امیدوار شراکت اقتدار کی ڈیل کا احترام کریں گے۔ ان کا کہنا تھا، ’’ڈاکٹر عبداللہ نے بارہا کہا ہے کہ وہ آئین کی پاسداری کریں گے۔‘‘ تاہم ابتدائی نتائج کے مطابق اشرف غنی سے کافی پیچھے عبداللہ عبداللہ نے ووٹوں کے آڈٹ سے الگ ہونے کا اعلان کر دیا ہے۔

عبداللہ عبداللہ نے کہا ہے کہ ملک کا آزاد الیکشن کمیشن دھاندلی کے پتہ چلانے میں دلچسپی نہیں رکھتا کیونکہ وہ خود اس فراڈ کا حصہ ہے۔ تاہم جین ساکی کے بقول اقوام متحدہ کے مبصرین کی نگرانی میں ووٹوں کے آڈٹ کا عمل جاری رہے گا اور واشنگٹن صدارتی امیدواروں کے مابین اختلافات کو دور کرنے کی کوشش جاری رکھے گا۔

اقوام متحدہ نے کہا تھا کہ افغان صدارتی انتخابات کے آڈٹ کا عمل آئندہ ہفتے تک مکمل کر لیا جائے گا لیکن اب اس تازہ پیشرفت سے افغان سیاسی بحران ایک مرتبہ پھر شدید ہونے کا امکان پیدا ہوگیا ہے۔