جنوبی دہلی کے ایک امیر علاقے ساکیت کے ایک مال میں صاف ہوا فروخت کرنے کا دعوی کرنے والی ’آکسی پیور‘ کے نام سے یہ دکان دہلی میں اپنی نوعیت کی پہلی دکان ہے۔ یہاں چند منٹ صاف ستھری ہوا میں سانس لینے کے لیے لوگ اپنی باری کے منتظردکھائی دیتے ہیں۔

فضائی آلودگی سے پریشان صاف ہوا میں سانس لینے کے لیے آئی نشیکا واگھیلا کا کہنا تھا کہ انہیں کچھ نیا لگا تو انہوں نے تجربہ کرنے کا سوچا۔ آکسیجن میں لینے کے بعد انہیں تازگی محسوس ہوئی۔ بہر حال ا ن کا تجربہ اچھا رہا۔

فضائی آلودگی کو مانیٹر کرنے والی دو نجی ایجنسیوں ایر ویزوول(Air Visual) اور اسکائی میٹ کی رپورٹ کے مطابق 15اور 16نومبر کو چند گھنٹے کے لیے دہلی دنیا میں سب سے زیادہ آلودہ شہر بن گیا تھا۔ جب اس کا اے کیو آئی یعنی ایئر کوالٹی انڈکس بالترتیب 527 اور 500 درج کیا گیا۔ 100سے زیادہ اے کیو آئی کو صحت کے لیے نقصان دہ سمجھا جاتا ہے۔

نیچر نامی رسالہ میں شائع ایک رپورٹ کے مطابق دہلی میں پی ایم 2.5 کی سطح میں اضافہ کی وجہ سے ہر سال سات ہزار سے سولہ ہزار افراد کی قبل از وقت موت ہوجاتی ہے جب کہ چھ ملین افراد دمہ کے مریض بن جاتے ہیں۔ پی ایم 2.5 کی سطح دہلی میں عام طورپر 87 سے 123 کے درمیان رہتی ہے جب کہ معیاری سطح 60 ہونی چاہیے۔ 16نومبرکو یہ سطح 204تک پہنچ گئی تھی۔یہ دوپہر گیارہ بجے کی ہے۔

آکسی پیور کے ہیڈ اسٹاف بونی ارنگ بام کا کہنا تھا کہ یہاں آکسیجن کئی طرح کے فلیور میں دستیاب ہے۔ مثلاً پودینہ، دار چینی، سنترہ، لیمن گراس، یوکلپٹس اور لیونڈر وغیرہ۔ اسی لحاظ سے ان کی قیمت 299 روپے سے لے کر 499 روپے تک ہے۔ بونی کا دعوی ہے کہ آکسیجن لینے سے خون میں زہریلے مواد کا خاتمہ ہوتا ہے اور ڈپریشن کا مقابلہ کرنے میں مدد ملتی ہے۔

کولمبیا ایشیا اسپتال کے سینیئر کنسلٹنٹ ڈاکٹر امیتابھ گھوش کا کہنا ہے، ”بار میں لوگوں کوآکسیجن بیچنے کا کانسیپٹ سمجھ سے باہر ہے۔ کسی مریض کو اگر آکسیجن کی ضرورت ہے تو اسے ہسپتال میں ماہرین کی نگرانی میں دی جاتی ہے۔ آکسیجن کوئی ایسی چیز نہیں جو کوئی بھی کہے کے مجھے آکسیجن چاہیے اور اسے دے دی جائے۔ فلیورڈ آکسیجن میں یہ دیکھنا ضروری ہوتا ہے کہ کس فلیور میں کون سے اجزاء ہیں اور ان کی مقدار کتنی ہے۔ ‘‘

آکسی پیورکے مالک 26 سالہ انٹرپرینیور آریہ ویر کمار کہتے ہیں کہ 2015میں امریکا کے دورہ کے دوران انہوں نے اس طرح کا آکسیجن بار دیکھا جس کے بعد بھارت میں بھی اسی طرح کا بار کھولنے کا خیال آیا۔ لیکن یہا ں لوگ کئی طرح کے خدشات کا اظہار کرتے ہیں اسی لیے وہ صرف پندرہ منٹ تک ہی آکسیجن دیتے ہیں۔

اتنی سنگین صورت حال کے باوجود سیاسی رہنما اور سرکاری اعلی حکام فکر مند نظر نہیں آتے۔ اس کا ثبوت 15نومبر کو پارلیمانی کمیٹی کی میٹنگ میں دیکھنے کو ملا جب 29 ممبران پارلیمان اور اعلی افسران پر مشتمل اس کمیٹی کے صرف چار اراکین حاضر ہوئے جس کی وجہ سے میٹنگ ملتوی کردی گئی۔

فضائی آلودگی کی وجہ سے ہر سال 14نومبر کو منایا جانے والا یوم اطفال پہلی مرتبہ منسوخ کرنا پڑا۔ دہلی میں فضائی آلودگی کے سبب لوگوں کو سانس لینے میں پریشانی، گلے میں تکلیف، آنکھوں میں جلن اور سردرد جیسی پریشانیوں کا سامنا کرنا پڑ رہا ہے۔ سب سے زیادہ پریشانی چھوٹے بچوں اور عمر دراز لوگوں کو ہورہی ہے۔

دہلی میں فضائی آلودگی خطرناک حد تک پہنچ جانے کے باوجود سیاسی جماعتیں ایک دوسرے کو مورد الزام ٹھہرانے میں مصروف ہیں۔ سپریم کورٹ نے دہلی حکومت کی ٹریفک کی جفت اور طاق اسکیم کو ادھوری کوشش قرار دیا۔ سپریم کورٹ نے فصلوں کے باقیات نہ جلانے کا اس کا حکم نہیں ماننے پر پنجاب، ہریانہ، اترپردیش اور دہلی کے چیف سکریٹریوں کو 25 نومبر کو طلب کرلیا ہے۔

PM2.5 معیار میں فضا میں موجود ایسے چھوٹے ذرات کا جائزہ لیا جاتا ہے، جو سانس کے ذریعے پھیپھڑوں اور خون تک میں شامل ہو جاتے ہیں۔ بنگلہ دیش فضائی آلودگی کے حوالے سے سرفہرست ہے، جہاں گزشتہ برس PM2.5 کی اوسط 97.10 ریکارڈ کی گئی۔

ایئر ویژؤل نے حالیہ دنوں میں لاہور کا ’ایئر کوالٹی انڈیکس‘ چار سو سے زائد تک ریکارڈ کیا۔ انڈیکس کے مطابق گزشتہ برس پاکستان میں PM2.5 کی سالانہ اوسط 74.27 رہی تھی۔ یوں پاکستان فضائی آلودگی کے حوالے سے دوسرے نمبر پر رہا۔ فیصل آباد اور لاہور آلودہ ترین شہروں کی ٹاپ ٹین فہرست میں بھی شامل ہیں۔

دنیا کا تیسرا آلودہ ترین ملک بھی جنوبی ایشیا ہی سے ہے۔ بھارت میں گزشتہ برس کے دوران PM2.5 کی اوسط 72.54 ریکارڈ کی گئی۔ دنیا کے دس آلودہ ترین شہروں کی فہرست میں بھی نئی دہلی سمیت بھارت کے سات شہر شامل ہیں۔

پاکستان کا پڑوسی ملک افغانستان فضائی آلودگی کے حوالے سے دنیا کا چوتھا آلودہ ترین ملک رہا۔ گزشتہ برس افغانستان میں PM2.5 کی اوسط 61.80 ریکارڈ کی گئی۔

ڈیڑھ ملین نفوس پر مشتمل خلیجی ریاست بحرین آلودہ فضا کے حامل بد ترین ممالک کی عالمی فہرست میں پانچویں نمبر پر ہے۔ وہاں PM2.5 کی اوسط 59.60 رہی۔

تین ملین سے زائد کی آبادی والا مشرقی ایشیائی ملک منگولیا اس فہرست میں چھٹے نمبر پر ہے۔ ایئر ویژؤل کے مطابق وہاں سن 2018 میں PM2.5 کی اوسط 58.50 ریکارڈ کی گئی۔

چار ملین کی آبادی والا خلیجی ملک کویت ساتویں نمبر پر ہے، جہاں سن 2018 میں PM2.5 کی سالانہ اوسط 56 رہی تھی۔

آٹھویں نمبر پر بھی جنوبی ایشیا ہی کا ایک ملک نیپال رہا۔ PM2.5 کی خطرناک ترین سطح 55 سے زائد شمار کی جاتی ہے۔ نیپال میں اس کی سالانہ اوسط 54.15 ریکارڈ کی گئی۔

متحدہ عرب امارات میں PM2.5 کی سالانہ اوسط 49.93 ریکارڈ کی گئی اور یوں فضائی آلودگی کے اعتبار سے یہ نواں خطرناک ترین ملک قرار پایا۔

خطرناک فضا کے حامل دس ممالک کی فہرست میں واحد افریقی ملک نائجیریا ہے۔ سن 2018 کے پورے سال کے دوران نائجیریا میں PM2.5 کی اوسط 44.84 رہی۔

نئی دہلی کی ہوا میں آلودگی کی شرح میں ’خطرناک حد‘ تک اضافے کے باعث پبلک ہیلتھ کے شعبے میں ایمرجنسی کا نفاذ کر دیا گیا ہے۔ محمکہ صحت سے وابستہ ماہرین نے شہریوں کو تاکید کی ہے کہ وہ غیر ضروری طور پر گھروں سے باہر نہ نکلیں۔

اس دھند میں کاربن مونو آکسائیڈ ، سلفر اور نائٹروجن جیسے زہریلے ذروں کی مقدار بہت زیادہ ہے۔ اس لیے اس دھند کو تکنیکی طور پر ’سموگ‘ کہا جاتا ہے۔

بھارتی سینٹرل پولوشن کنٹرول بورڈ کے مطابق یہ صورتحال اس وقت پیدا ہوتی ہے، جب ہوا میں نمی کی مقدار میں اضافہ ہو جائے اور چلنے والی ہواؤں کی رفتار انتہائی سست ہو جائے۔

شہر کے ڈاکٹروں نے اسے ’پبلک ہيلتھ ايمرجنسی‘ قرار ديا ہے جبکہ کئی متعلقہ ايجنسيوں نے خبردار کيا ہے کہ آنے والے دنوں ميں صورتحال مزيد بگڑ سکتی ہے۔

بھارتی دارالحکومت ميں پرائمری اسکول کے طلباء کی تعداد لگ بھگ دو ملين ہے۔ علاوہ ازيں شہر بھر کے کُل چھ ہزار اسکولوں ميں باہر کی تمام تر سرگرمياں بھی بند رکھنے کا اعلان کيا گيا ہے۔

انڈین میڈیکل ایسوسی ایشن نے پیر کے دن ہی مطالبہ کیا تھا کہ فضا میں ضرر رساں ذرات میں اضافے میں کمی کی خاطر فوری طور پر اقدامات اٹھائے جائیں۔

ڈاکٹروں کی تنظیم انڈین میڈیکل ایسوسی ایشن نے بتایا نئی دہلی کے باسیوں کو آنکھوں میں جلن اور حلق میں تکلیف کی شکایت کا سامنا ہے۔

گزشتہ برس عالمی ادارہ صحت کی جانب سے جاری کیے جانے والے ایک جائزہ کے مطابق نئی دہلی دنیا کے آلودہ ترین شہروں مں سے ایک ہے۔

نئی دہلی میں ہر سال بڑھتی ہوئی فضائی آلودگی کی وجہ سے ماسک اور فلٹرز کا کاروبار بھی عروج پکڑ رہا ہے۔ لیکن ہر کوئی ایسے ماسک خریدنے کی سکت نہیں رکھتا۔ غریب عوام زیادہ تر بغیر ماسک یا فلٹر کے ہی گزارا کرتے ہیں۔

مختلف ماحولیاتی تنظمیوں کی طرف سے عوام میں سموگ سے بچاو کے لیے آگاہی مہم بھی چلائی گئی ہے۔ نجی سطح پر اسکولوں میں بھی بچوں کو اس حوالے سے معلومات فراہم کی جا رہی ہیں۔

جنوبی ایشیا میں ماحولیاتی آلودگی کی یہ شرح ایک ایسے وقت میں زیادہ ہوئی ہے، جب جرمن شہر بون میں عالمی ماحولیاتی کانفرنس COP 23 کا آغاز ہو چکا ہے۔

ایئر ویژول نے حالیہ دنوں میں لاہور کا ’ایئر کوالٹی انڈکس‘ پانچ سو سے زائد تک ریکارڈ کیا۔ PM2.5 معیار میں فضا میں موجود ایسے چھوٹے ذرات کا جائزہ لیا جاتا ہے جو سانس کے ذریعے پھیپھڑوں اور خون تک میں شامل ہو جاتے ہیں۔ ورلڈ ہیلتھ آرگنائزیشن کے 2012 کے ڈیٹا کے مطابق لاہور میں PM2.5 کی سالانہ اوسط 68 رہی تھی۔

ایئر کوالٹی انڈکس میں لاہور کے بعد آلودہ ترین ہوا بھارتی دارالحکومت نئی دہلی میں ریکارڈ کی گئی جہاں PM2.5 ساڑھے تین سو تک ریکارڈ کیا گیا۔ ورلڈ ہیلتھ آرگنائزیشن کے 2012 کے ڈیٹا کے مطابق نئی دہلی میں PM2.5 کی سالانہ اوسط 122 رہی تھی۔

منگولیا کا دارالحکومت اولان باتور ایئر ویژول کی اس فہرست میں تیسرے نمبر پر ہے جہاں PM2.5 ایک سو ساٹھ سے زیادہ رہا۔ ورلڈ ہیلتھ آرگنائزیشن کے ڈیٹا کے مطابق اولان باتور میں PM2.5 کی سالانہ اوسط 75 رہی تھی۔

بھارتی شہر کلکتہ بھی آلودہ ترین ہوا والے شہروں کی اس فہرست میں چوتھے نمبر پر ہے جہاں PM2.5 حالیہ دنوں میں ڈیڑھ سو سے زیادہ ریکارڈ کی گئی۔ ورلڈ ہیلتھ آرگنائزیشن کے 2014 کے ڈیٹا کے مطابق کلکتہ میں PM2.5 کی سالانہ اوسط 61 رہی تھی۔

اسرائیلی شہر تل ابیب میں بھی PM2.5 کی حد ڈیڑھ سو کے قریب رہی۔ ورلڈ ہیلتھ آرگنائزیشن کے 2014 میں جمع کیے گئے ڈیٹا کے مطابق تل ابیب میں PM2.5 کی سالانہ اوسط بیس رہی تھی جب کہ قابل قبول حد پچاس سمجھی جاتی ہے۔

ایک ملین سے زائد آبادی والا نائجیرین شہر پورٹ ہارکورٹ اس فہرست میں چھٹے نمبر پر ہے جہاں ایئر کوالٹی انڈکس ایک سو چالیس ریکارڈ کیا گیا۔

بھارتی شہر ممبئی آلودہ ترین ہوا کے حامل شہروں کی اس فہرست میں شامل تیسرا بھارتی شہر ہے جہاں ایئر کوالٹی انڈیکس ایک سو تینتیس رہا۔

چینی شہر شنگھائی میں بھی بڑے لیکن آلودہ ہوا والے شہروں کی اس فہرست میں شامل ہے جہاں PM2.5 ایک سو انتیس ریکارڈ کیا گیا۔

چین کے شینگدو نامی شہر میں بسنے والے ایک ملین سے زائد انسان آلودہ ہوا میں سانس لینے پر مجبور ہیں۔ ایئر ویژول کے مطابق اس شہر میں چھوٹے خطرناک ذرات ماپنے کا معیار ایک سو چودہ رہا۔

ویت نام کے دارالحکومت ہنوئی میں بھی ایئر کوالٹی انڈیکس کا درجہ ایک سو بارہ رہا جو قابل قبول معیار سے دوگنا سے بھی زائد ہے۔