دیوار برلن کی جگہ اجنبیت کی دیواریں کھڑی ہو گئیں، جرمن صدر
مقبول ملک ڈی پی اے
3 اکتوبر 2017
یومِ اتحاد جرمنی کی ستائیسویں سالگرہ کی مرکزی تقریب سے خطاب کرتے ہوئے وفاقی جرمن صدر شٹائن مائر نے منگل تین اکتوبر کے روز کہا کہ جرمنی میں آج ماضی کی دیوار برلن کی جگہ اجنبیت اور ناامیدی کی دیواریں کھڑی ہو چکی ہیں۔
جرمن صدر شٹائن مائر یومِ اتحاد جرمنی کی ستائیسویں سالگرہ کی مرکزی تقریب سے خطاب کرتے ہوئےتصویر: picture-alliance/dpa/A. Dedert
اشتہار
شہر مائنز میں آج منگل کے دن منعقدہ اس مرکزی سرکاری سے اپنے خطاب میں صدر فرانک والٹر شٹائن مائر نے کہا کہ ماضی میں برلن کے منقسم شہر میں 1989 تک جغرافیائی طور پر جس دیوار نے جرمن ریاست کو مشرقی اور مغربی حصوں میں تقسیم کر رکھا تھا، آج اس کی جگہ معاشرے میں ’اجنبیت، ناامیدی اور غصے کی دیواریں‘ کھڑی ہو چکی ہیں، جن کا گرایا جانا انتہائی ضروری ہے۔
صدر شٹائن مائر نے تقریب کے شرکاء سے اپنے خطاب میں کہا کہ ماضی میں دیوار برلن، جو تقسیم کی ایک تکلیف دہ علامت تھی، ہر کسی کو نظر آتی تھی، لیکن آج کے جرمن معاشرے میں بہت سی ایسی نئی دیواریں کھڑی ہو چکی ہیں، جو بہت واضح طور پر تو نظر نہیں آتیں لیکن جن کا خاتمہ انتہائی ضروری ہے۔
اس موقع پر یورپ میں مہاجرین کے بحران کے دوران لاکھوں تارکین وطن کی جرمنی آمد کے پس منظر میں وفاقی جرمن صدر نے کہا کہ جرمنی مصائب کے شکار انسانوں کے بارے میں لاتعلقی کا مظاہرہ نہیں کر سکتا۔ انہوں نے کہا کہ جرمنی اپنے ہاں مہاجرین کو پناہ دے سکتا ہے اور اس حوالے سے عالمی حقائق اور جرمن معاشرے کی سماجی اہلیت پر کوئی سمجھوتہ نہیں کیا جانا چاہیے۔
اپنے خطاب کے بعد جرمن صدر عام شہریوں میں کھل مل گئے۔ تقریب میں وفاقی چانسلر انگیلا میرکل بھی شریک ہوئیںتصویر: picture-alliance/dpa/B. Roessler
یومِ اتحاد جرمنی پر عام تعطیل
انیس سو نوے کے موسم خزاں میں سابقہ مشرقی اور مغربی جرمن ریاستوں کے دوبارہ اتحاد کو آج منگل تین اکتوبر کے روز ٹھیک ستائیس برس ہو گئے۔ جرمن یونیفیکیشن ڈے کہلانے والے اس دن ہر سال پورے ملک میں عام تعطیل ہوتی ہے۔ دیوار برلن نومبر انیس سو نواسی میں گرائی گئی تھی، جس کے بعد ایک سال سے بھی کم عرصے میں دونوں جرمن ریاستوں کو اتحاد عمل میں آ گیا تھا۔
یومِ اتحاد جرمنی کے موقع پر ملک بھر میں ہر سال سینکڑوں دیگر تقریبات کے علاوہ ایک مرکزی تقریب کُل سولہ میں سے کسی نہ کسی وفاقی جرمن ریاست میں منعقد کی جاتی ہے۔ آج کی مرکزی تقریب ریاست رائن لینڈ پلاٹینیٹ کے دارالحکومت مائنز میں منعقد ہوئی، جس میں وفاقی چانسلر انگیلا میرکل نے بھی شرکت کی جبکہ مرکزی خطاب وفاقی جرمن صدر فرانک والٹر شٹائن مائر نے کیا۔
اس سال یومِ اتحاد جرمنی کی اس مرکزی تقریب کا موٹو تھا: ’ہم سب مل کر ہی جرمنی ہیں۔‘ مائنز کے اس مرکزی اجتماع میں مقامی کے علاوہ ملک بھر سے سرکردہ سیاسی اور سماجی شخصیات کے ساتھ ساتھ ہزارہا جرمن شہریوں نے بھی شرکت کی۔ مائنز میں اسی تقریب کے سلسلے میں کل پیر دو اکتوبر کے روز وہاں ایک ایسے شہری میلے کا آغاز بھی ہو گیا تھا، جس میں بہت سی شہری تنظیموں کے علاوہ تمام وفاقی جرمن صوبوں نے بھی اپنے اپنے سٹال لگا رکھے ہیں۔
جرمنی میں مساجد کے دروازے سب کے لیے کھل گئے
جرمنی میں قریب ایک ہزار مساجد کے دروازے تین اکتوبر کو تمام افراد کے لیے کھول دیے گئے ہیں۔ یہی دن سابقہ مشرقی اور مغربی جرمن ریاستوں کے اتحاد کی سال گرہ کا دن بھی ہے۔
تصویر: Ditib
جرمن مساجد، جرمن اتحاد
جرمنی میں مساجد کے دوازے سب کے لیے کھول دینے کا دن سن 1997 سے منایا جا رہا ہے۔ یہ ٹھیک اس روز منایا جاتا ہے، جس روز جرمنی بھر میں یوم اتحاد کی چھٹی ہوتی ہے۔ اس دن کا تعین جان بوجھ کر مسلمانوں اور جرمن عوام کے درمیان ربط کی ایک علامت کے تناظر میں کیا گیا تھا۔ جرمنی میں مسلمانوں کی مرکزی کونسل کے مطابق آج کے دن قریب ایک لاکھ افراد مختلف مساجد کا دورہ کریں گے۔
تصویر: Henning Kaiser/dpa/picture-alliance
مساجد سب کے لیے
آج کے دن مسلم برادری مساجد میں آنے والوں کو اسلام سے متعلق بتاتی ہے۔ مساجد کو کسی عبادت گاہ سے آگے کے کردار کے ساتھ پیش کیا جاتا ہے، کیوں کہ یہ مسلم برادری کے میل ملاپ اور سماجی رابط کی جگہ بھی ہے۔
تصویر: Henning Kaiser/dpa/picture-alliance
بندگی اور ضوابط
اسلام کو بہتر انداز سے سمجھنے کے لیے بندگی کے طریقے اور ضوابط بتائے جاتے ہیں۔ انہی ضوابط میں سے ایک یہ ہے کہ مسجد میں داخل ہونے سے پہلے جوتے اتار دیے جائیں۔ یہ عمل صفائی اور پاکیزگی کا عکاس بھی ہے کیوں کہ نمازی نماز کے دوران اپنا ماتھا قالین پر ٹیکتے ہیں، اس لیے یہ جگہ ہر صورت میں صاف ہونا چاہیے۔
تصویر: picture-alliance/dpa/U. Baumgarten
تعمیرات اور تاریخ
زیادہ تر مساجد میں آنے والے غیرمسلموں کو مسجد بھر کا دورہ کرایا جاتا ہے۔ اس تصویر میں کولون کے نواحی علاقے ہیُورتھ کی ایک مسجد ہے، جہاں آنے والے افراد مسلم طرز تعمیر کی تصاویر لے سکتے ہیں۔ اس طرح ان افراد کو یہ بھی بتایا جاتا ہے کہ جرمنی میں مسلمان کس طرح ملتے اور ایک برادری بنتے ہیں۔
تصویر: picture-alliance/dpa/U. Baumgarten
روحانیت کو سمجھنے کی کوشش
ڈوئسبرگ کی یہ مرکزی مسجد سن 2008ء میں تعمیر کی گئی تھی۔ اس مسجد کا رخ کرنے والوں کو نہ صرف مسجد کے مختلف حصے دکھائے جاتے ہیں، بلکہ یہاں آنے والے ظہر اور عصر کی نماز ادا کرنے والے افراد کو دوران عبادت دیکھ بھی سکتے ہیں۔ اس کے بعد مہمانوں کو چائے بھی پیش کی جاتی ہے۔
تصویر: picture-alliance/dpa/M. Skolimowska
عبادات کی وضاحت
مسلمانوں کے عبادت کے طریقہ کار کو متعارف کرانا تین اکتوبر کو منائے جانے والے اس دن کا ایک اور خاصا ہے۔ تاہم مسجد کا نماز کے لیے مخصوص حصہ یہاں آنے والے غیرمسلموں کے لیے نہیں ہوتا۔ اس تصویر میں یہی کچھ دیکھا جا سکتا ہے۔
تصویر: picture-alliance/dpa/H. Hanschke
تحفے میں تسبیح
اس بچے کے پاس ایک تسبیح ہے، جو اسے فرینکفرٹ کی ایک مسجد میں دی گئی۔ نمازی اس پر ورد کرتے ہیں۔ تسبیح کو اسلام میں مسبحہ بھی کہتے ہیں۔
تصویر: picture-alliance/dpa/F. Rumpenhorst
بین الثقافتی مکالمت
جرمن مساجد اپنے دروازے مختلف دیگر مواقع پر بھی کھولتی ہیں۔ مثال کے طور پر جرمن کیتھولک کنوینشن کی طرف سے کیتھولک راہبوں اور راہباؤں کو مساجد دکھائی جاتی ہیں۔ اس تصویر میں جرمن شہر من ہائم کی ایک مسجد میں یہی کچھ دیکھا جا سکتا ہے۔ اس طرح کے مواقع مسیحیت اور اسلام کے درمیان بہتر تعلقات کی راہ ہوار کرتے ہیں۔
تصویر: picture-alliance/dpa
غلط فہمیوں کا خاتمہ
ڈریسڈن شہر کی مساجد ثقافتی اقدار کی نمائش بھی کرتی ہیں۔ المصطفیٰ مسجد نے اس دن کے موقع پر منعقدہ تقریبات کی فہرست شائع کی ہے۔ ان میں اسلام، پیغمبر اسلام اور قرآن سے متعلق لیکچرز شامل ہیں۔ اس کے علاوہ لوگ یہاں مسجد میں قالینوں پر بیٹھ کر مختلف موضوعات پر بات چیت بھی کرتے ہیں۔