راجر فیڈرر کی فتوحات کا سلسلہ جاری
29 جنوری 2009![](https://static.dw.com/image/3981320_800.webp)
سیمی فائنل میں بھی راجر فیڈرر پوری فارم میں نظر آئے اور تین سیٹس کے کھیل میں اینڈی روڈک کو چھ دو، سات پانچ اور سات پانچ سے شکست دینے میں کامیاب ہو گئے۔
تین مرتبہ کے آسٹریلین اوپن ٹینس چیمپئن راجر فیڈرر کوارٹر فائنل میں سربیا کے نوواک جوکووچ اور سیمی فائنل میں امریکہ کے اینڈی روڈک کو شکست دینے کے بعد پیٹ سمپراس کا چودہ گرینڈ سلیم جیتنے کا عالمی ریکارڈ برابر کرنے کے لئے صرف ایک میچ کے فاصلے پر ہیں۔
سیمی فائنل میں راجر فیڈرر کھیل پر مکمل گرفت لئے ہوئے تھے اور اینڈی روڈک طاقتور شاٹس کے باوجود فیڈرر کی حکمت عملی کے سامنے خاصے بے بس دکھائی دئے۔
دوسری جانب عالمی نمبر ایک ہسپانوی کھلاڑی رافائل نادال بھی اپنی کارکردگی کا تسلسل قائم رکھے ہوئے ہیں۔ نادال نے کوارٹر فائنل میں فرانس کے Gilles Simon کو شکست دے کر سیمی فائنل کے لئے کوالیفائی کر لیا ہے جہاں ان کا مقابلہ ان کے ہم وطن فرنانڈو وارداسکو سے ہو گا۔
خواتین کے انفرادی مقابلوں کے فائنل میں امریکہ کی سیرینا ولیمز اور روس کی دینارا سافینا آمنے سامنے ہوں گی۔ عالمی نمبر دو سیرینا ولیمز نے عالمی نمبر چار Elena Dementieva کو دو سیٹ کے مقابلے میں باآسانی چھ تین اور چھ چار سے شکست دے کر فائنل کھیلنے کا اعزاز حاصل کر لیا۔ آسٹریلین اوپن میں 9 بار شرکت کرنے والی سیرینا اس سے قبل تین مرتبہ یہ ٹائٹل اپنے نام کر چکی ہیں۔
آسٹریلین اوپن کے فائنل کے لئے کوالیفائی کرنے والی عالمی نمبر تین روسی کھلاڑی دینارا سافینا نے سیمی فائنل میں اپنی ہم وطن Vera Zvonareva کو بآسانی چھ تین اور سات چھ سے شکست دے دی۔ چھ بار آسٹریلین اوپن مقابلوں میں شرکت کرنے والی دینارا سافینا اب تک ایک بار بھی آسٹریلین اوپن کا ٹائٹل حاصل نہیں کر پائیں تاہم گزشتہ کچھ عرصے سے ان کی کارکردگی غیر معمولی حد تک بہتر ہوئی ہے اور توقع کی جارہی ہے کہ فائنل میں عالمی نمبر دو سیرینا ویلیمز اور عالمی نمبر تین دینارا سافیا کے درمیان ایک زبردست اور دلچسپ مقابلہ دیکھنے میں آئے گا۔