جرمنی کا "اکٹوبرفیسٹ" بیئر پینے کا ایک ایسا بین الاقوامی میلہ ہے جہاں یورپ اور دنیا بھر کے شوقین حضرات اس میلے میں شرکت کے خواہشمند ہوتے ہیں۔ جرمن ریاست باویریا اس کلچرل فیسٹیول کی میزبانی کرتا ہے۔ جنوبی جرمن ریاست باویریا نے منگل اکیس اپریل کو اعلان کیا کہ کووڈ انیس کی وبا کے تناظر میں سن 2020 میں اس فیسٹیول کو منعقد نہیں کیا جائے گا۔

ہر سال میونخ شہر میں منعقد ہونے والے اس خاص میلے میں تقریباً ساٹھ لاکھ افراد شریک ہو کر اپنے بیئر پینے کے شوق کی تسکین کرتے ہیں۔ میلوں کے لیے خیموں کا ایک شہر بسا دیا جاتا ہے۔ ان خیموں کے اندر لکڑی کی بینچوں پر بیٹھ کر بیئر کے شوقین بیئر کے ساتھ موسیقی سے بھی لطف اٹھاتے ہیں۔ اس فیسٹیول سے میونخ شہر کی بلدیہ کے خزانے میں ایک ارب یورو سے زائد کی رقم جمع ہوتی ہے۔

رواں برس اکٹوبر فیسٹ کا انعقاد انیس ستمبر سے چار اکتوبر تک ہونا تھا۔ جرمنی میں چھوٹے کاروبار شروع کرنے کی اجازت حال ہی میں برلن حکومت نے دی ہے لیکن ہر قسم کی بڑی تقریبات اور میلوں ٹھیلوں پر رواں برس اکتیس اگست تک پہلے سے عائد پابندی برقرار رکھی گئی ہے۔

میونخ شہر کے میئر کا کہنا ہے کہ اکٹوبر فیسٹ کو منسوخ کرنے کے فیصلے پر انہیں بہت دکھ ہوا ہے کیونکہ یہ میلہ باویریا کی ثقافت کا ایک خاص روایتی نشان ہے۔ میئر نے رواں برس میلے میں شریک ہونے کی خواہش رکھنے والوں میں منسوخی کے اعلان سے پیدا ہونے والی مایوسی پر بھی افسوس کا اظہار کیا۔

لاک ڈاؤن میں نرمی کے باوجود جرمن چانسلر نے احتیاط اور نظم و ضبط اختیار کرنے کو اہم قرار دیا ہے۔ برلن میں میڈیا کے نمائندوں سے بات کرتے ہوئے واضح کیا کہ جرمنی میں سب کواحتیاط اور منظم طریقے سے آگے بڑھنے کی ضرورت ہے۔ انہوں نے یہ بھی کہا یہ افسوس کی بات ہو گی اگر سنبھلتے ہوئے دوبارہ خود کو مصیبت کے گڑھے میں گرا لیں۔ انہوں یہ بھی کہا کہ ایک لمحے کے لیے بھی غیرذمہ داری کا مظاہرہ نہیں کرنا ہو گا اور چوکنا اور منظم رہنا وقت کی ضرورت ہے۔

جرمنی میں کورونا وائرس کے تصدیق شدہ مریضوں کی تعداد ایک لاکھ سینتالیس ہزار پینسٹھ ہے جب کہ اس وائرس نے اب تک چار ہزار آٹھ سو زائد انسانی جانوں کو ہڑپ کر لیا ہے۔ جرمنی میں کووڈ انیس کی وبا سے ہونے والی ہلاکتیں دوسرے یورپی ممالک برطانیہ، فرانس، اسپین، بیلجیم، ہالینڈ اور اٹلی کے مقابلے میں بہت کم ہیں۔

ع ح /  ک م (روئٹرز)