کراچی قیام پاکستان کے بعد سے اب تک آبادی کے لحاظ سے ملک کا سب سے بڑا شہر ہے۔ سن 2018 میں کراچی کی آبادی ایک کروڑ چون لاکھ ہے جو سن 2030 تک دو کروڑ بتیس لاکھ ہو جائے گی۔ اقوام متحدہ کے مطابق تب کراچی آبادی کے اعتبار سے دنیا کا تیرہواں سب سے بڑا شہر بھی ہو گا۔

پاکستانی صوبہ پنجاب کا دارالحکومت لاہور ایک کروڑ سترہ لاکھ نفوس کے ساتھ ملک کا دوسرا بڑا شہر ہے۔ سن 2030 تک لاہور کی آبادی قریب دو کروڑ ہو جائے گی۔ پچاس کی دہائی میں لاہور کے شہریوں کی تعداد آٹھ لاکھ چھتیس ہزار تھی اور وہ تب بھی پاکستان کا دوسرا بڑا شہر تھا۔

فیصل آباد پاکستان کا تیسرا بڑا شہر ہے اور بارہ برس بعد بھی آبادی کے اعتبار سے یہ اسی نمبر پر رہے گا۔ تاہم فیصل آباد کی موجودہ آبادی 3.3 ملین ہے جو اقوام متحدہ کی رپورٹ کے مطابق سن 2030 تک قریب پانچ ملین ہو جائے گی۔

پاکستان کے صوبہ خیبر پختونخوا کے دارالحکومت پشاور کی موجودہ آبادی بھی دو ملین سے کچھ زائد ہے اور اس وقت یہ ملک کا چھٹا بڑا شہر بھی ہے۔ تاہم سن 2030 میں اس شہر کی آبادی قریب تینتیس لاکھ نفوس پر مشتمل ہو گی اور یہ ملک کا چوتھا بڑا شہر بن جائے گا۔

سن 1950 میں گوجرانوالہ ایک لاکھ اٹھارہ ہزار کی آبادی کے ساتھ پاکستان کا نواں سب سے بڑا شہر تھا تاہم اب یہاں دو ملین سے زائد لوگ بستے ہیں ۔ اقوام متحدہ کے اندازوں کے مطابق بارہ برس بعد اس شہر کی آبادی بتیس لاکھ چونسٹھ ہزار تک پہنچ جائے گی اور یہ ملک کا پانچواں بڑا شہر ہو گا۔

اکیس لاکھ چھپن ہزار کی آبادی کے ساتھ راولپنڈی پاکستان کا چوتھا بڑا شہر ہے۔ بارہ برس بعد راولپنڈی کی آبادی تین ملین سے زائد ہو جائے گی لیکن تب یہ ملک کا چھٹا بڑا شہر ہو گا۔ 1950ء میں راولپنڈی کی آبادی دو لاکھ تینتیس ہزار تھی اور تب آبادی کے اعتبار سے یہ ملک کا تیسرا بڑا شہر تھا۔

ملتان جنوبی پنجاب کا سب سے بڑا اور ملک کا ساتواں بڑا شہر ہے جس کی موجودہ آبادی قریب دو ملین ہے۔ اقوام متحدہ کی رپورٹ کے مطابق سن 2030 میں ملتان کی آبادی قریب انتیس لاکھ ہو جائے گی۔

صوبہ سندھ کا دوسرا بڑا شہر حیدر آباد سترہ لاکھ بیاسی ہزار نفوس کے ساتھ اس برس ملک کا آٹھواں بڑا شہر ہے۔ سن 2030 تک اس شہر کی آبادی چھبیس لاکھ تیس ہزار ہو جائے گی اور وہ تب بھی ملک کا آٹھواں بڑا شہر ہی ہو گا۔

وفاقی دارالحکومت اسلام آباد کی موجودہ آبادی ایک ملین سے زائد ہے تاہم اگلے بارہ برسوں میں سولہ لاکھ بہتر ہزار نفوس کے ساتھ یہ شہر ملک کا نواں بڑا شہر بن جائے گا۔ رواں صدی کے آغاز میں اسلام آباد کے شہریوں کی تعداد پانچ لاکھ انہتر ہزار تھی۔

بلوچستان کے دارالحکومت کوئٹہ کی آبادی رواں برس ہی ایک ملین سے تجاوز کر چکی ہے۔ بارہ برس بعد کوئٹہ کی آبادی سولہ لاکھ سے تجاوز کر جائے گی۔ جب کہ سن 1950 میں کوئٹہ کی آبادی 83 ہزار تھی۔

پاکستانی صوبہ پنجاب کے جنوبی شہر بہاولپور کی آبادی بھی اگلے چند برسوں میں ایک ملین سے زیادہ ہو جائے گی اور سن 2030 تک یہاں کی آبادی بارہ لاکھ چھیالیس ہزار نفوس تک پہنچ جائے گی۔ رواں برس کی آبادی سات لاکھ چھیانوے ہزار ہے جب کہ 1950 میں بہاولپور کی آبادی محض بیالیس ہزار تھی۔

صوبہ پنجاب ہی کے شہر سیالکوٹ کی آبادی بھی اگلے بارہ برسوں میں ایک ملین سے زائد ہو جائے گی۔ اس برس تک سیالکوٹ چھ لاکھ چھہتر ہزار نفوس کے ساتھ ملک کا تیرہواں بڑا شہر ہے۔ 1950ء میں سیالکوٹ کی آبادی ایک لاکھ پچپن ہزار تھی۔

اقوام متحدہ کی رپورٹ کے مطابق پاکستانی صوبہ پنجاب کی آبادی بھی سن 2030 میں ایک ملین سے کچھ کم (نو لاکھ نوے ہزار) تک پہنچ جائے گی۔ اس برس یعنی 2018ء میں سرگودھا کی آبادی چھ لاکھ 77 ہزار ہے اور یہ ملک کا بارہواں بڑا شہر ہے۔ سن 1950 میں یہاں صرف چوہتر ہزار شہری مقیم تھے۔

صوبہ سندھ ہی کے شہر لاڑکانہ کی موجودہ آبادی پانچ لاکھ چھ ہزار نفوس پر مشتمل ہے جو اب سے بارہ برس بعد سات لاکھ بیاسی ہزار تک پہنچ جائے گی۔ 1950 میں لاڑکانہ کی آبادی محض تینتیس ہزار تھی۔

سن 2030 میں پاکستان کے صوبہ سندھ میں واقع شہر سکھر کی آبادی سات لاکھ ساٹھ ہزار تک پہنچ جائے گی۔ سن 1950 میں اس شہر کی آبادی محض چھہتر ہزار نفوس پر مشتمل تھی جب کہ رواں برس سکھر کی آبادی پانچ لاکھ چودہ ہزار ہے۔

پیو ریسرچ سینٹر کے مطابق مسیحی باشندوں کی آبادی میں کمی کی ایک وجہ یورپ کے بعض ممالک میں شرحِ اموات کا شرحِ پیدائش سے زیادہ ہونا ہے۔ اس کی ایک مثال جرمنی ہے۔

پیو ریسرچ سینٹر کی تحقیقاتی رپورٹ کے مطابق اگر عالمی آبادی میں تبدیلی کا یہ رجحان اسی طرح جاری رہا تو رواں صدی کے آخر تک دنیا بھر میں مسلمانوں کی تعداد مسیحی عقیدے کے حامل انسانوں کی مجموعی تعداد سے زیادہ ہو جائے گی۔

پیو ریسرچ سینٹر کے اعداد و شمار کے مطابق ان دونوں مذاہب کی آبادیوں میں شرح پیدائش کے لحاظ سے سن 2055 اور سن 2060 کے دوران 60 لاکھ تک کا فرق دیکھنے میں آ سکتا ہے۔ سن 2060 تک مسلمان دنیا کی مجموعی آبادی کا 31 فیصد جبکہ مسیحی 32 فیصد ہوں گے۔

پیو ریسرچ سینٹر کا یہ جائزہ اس کے سن 2015 میں شائع کیے گئے ایک تحقیقی جائزے ہی کی طرز پر ہے۔ سن 2015 میں اس مرکز نے کہا تھا کہ آنے والے عشروں میں مسلم آبادی دنیا میں سب سے زیادہ تیزی سے بڑھنے والی بڑی مذہبی برادری بن جائے گی۔

سن 2010 سے سن 2015 کے درمیان دنیا بھر میں جتنے بچے پیدا ہوئے، اُن میں سے 31 فیصد بچوں نے مسلمان گھرانوں میں جنم لیا تھا۔ دو سال قبل پیو سینٹر کے ایک جائزے میں بتایا گیا تھا کہ سن 2050 تک مسلمانوں اور مسیحیوں تعداد تقریباﹰ برابر ہو جائے گی۔

ہندوؤں اور یہودیوں سمیت دیگر مذاہب کے پیروکار انسانوں کی کُل تعداد میں سن 2060 تک اضافہ تو ہو گا تاہم یہ عالمی آبادی میں تیزی سے پھیلنے والے مذاہب کے افراد کی تعداد میں اضافے کے تناسب سے کم ہو گا۔

دنیا بھر میں عمر رسیدہ افراد کی تعداد بڑھتی جا رہی ہے۔ 2010ء میں دنیا کی آبادی میں 65 سال سے زائد افراد کی شرح 7.7 فیصد تھی جبکہ اقوام متحدہ کی پیشگوئی کے مطابق 2050ء میں یہ دگنے اضافے کے ساتھ 15.6فیصد ہو جائے گی۔ اس کی بڑی وجوہات میں اوسط عمر میں اضافہ اور کم شرح پیدائش ہے۔

آج سے سو سال قبل بہت کم ہی لوگ زندگی کی 75 بہاریں دیکھ پاتے تھے۔ اس عمر کے لوگوں کو بوڑھا کہا جاتا تھا۔ آج کل اکثر پینشنر صحت مند زندگی سے لطف اندوز ہوتے ہوئے دکھائی دیتے ہیں۔ تیس برس پہلے کے مقابلے میں آج جرمنی میں سو سال سے زائد افراد کی تعداد پانچ گناہ زیادہ ہے۔

عمر رسیدہ افراد کی بہتر جسمانی فٹنس کا تعلق دواؤں اور بہتر طبی سہولیات کے ساتھ ساتھ بڑھتی ہوئی خوشحالی سے بھی ہے۔ یہ صورتحال ترقی پذیر ممالک میں بھی نظر آ رہی ہے۔ بزرگ افراد کی بڑی تعداد ترقی پذیر ممالک میں ہی رہ رہی ہو گی۔

نوجوان جوڑے کم بچے چاہتے ہیں اور آئندہ برسوں میں بھی یہ رجحان اسی طرح سے جاری رہے گا۔ اس کی ایک وجہ یہ بھی ہے کہ موجودہ دور میں خواتین معاشی اعتبار سے خود مختار ہونے کی خواہش رکھتی ہیں اور کیریئر کے ساتھ بچوں کی پرورش مشکلات میں اضافے کا باعث بنتی ہے۔

ترقی پذیر ممالک کی اکثر خواتین چاہتی ہیں کہ ان کی بچیاں گھروں میں بہن بھائیوں کی خدمت کرنے کی بجائے تعلیم حاصل کریں تاکہ وہ بہتر زندگی گزار سکیں اور آنے والی نسل کی اچھی تربیت کر سکیں۔

ترقی پذیر ممالک میں سماجی فلاحی سہولتوں اور پینشن کے نظام کا بھی فقدان دکھائی دیتا ہے۔ ان ممالک میں بڑھتی ہوئی شرح پیدائش کو دیکھتے ہوئے کہا جا سکتا ہے کہ اگلے برسوں کے دوران وہاں عمر رسیدہ افراد کی تعداد بھی زیادہ ہو گی۔ ان ممالک میں ایسے ڈھانچے تشکیل دیے جانے چاہییں، جن سے پینشن یافتہ طبقے کی زندگی آسان ہو سکے۔

جرمنی جیسے خوشحال ملک میں بھی بوڑھے افراد کی اچھے طریقے سے دیکھ بھال ہی کافی نہیں ہوتی۔ دیکھ بھال کے متعدد مراکز موجود ہیں اور وہ مہنگے بھی بہت ہیں۔ پینشن کی رقم میں مسلسل کمی کی وجہ سے بزرگ افراد میں غربت بھی بڑھ رہی ہے۔

دنیا کے غریب خطوں میں زیادہ تر عمر رسیدہ خواتین غربت کی وجہ سے کشکول اٹھانے پر مجبور ہو جاتی ہیں۔ ان میں سے زیادہ تر وہ افراد ہوتے ہیں، جنہوں نےکام کرنے کے دوران اپنے مستقبل کی فکر نہیں کی ہوتی اور آنے والے وقت کے لیے کچھ محفوظ نہیں کیا ہوتا۔

آج کل دنیا بھر میں بزرگ افراد بہتر پینشن کے لیے مظاہرےکر رہے ہیں۔ مثال کے طور پر نکاراگوا میں اسی طرح کے ایک مظاہرے میں لوگوں نے کم از کم نوے امریکی ڈالر ماہانہ پینشن کا مطالبہ کیا۔

اقوام متحدہ نے دنیا کے تمام ممالک سے مطالبہ کیا ہے کہ ہر عمر کے افراد کو روزگار کے مناسب مواقع مہیا کرنے کی کوشش کی جائے۔ اس کا مقصد پینشن کے حوالے سے موجودہ سوچ کو تبدیل کرنا ہے۔ آج بھی بڑی عمر کے افراد چھوٹے پیمانے پر اپنا کوئی کاروبار کرتے ہوئے گزارا کرتے ہیں۔