روسی اقدار کے فروغ کے لیے پوٹن کی نئی بین الاقوامی مہم
18 اگست 2024![صدر ولادیمیر پوٹن کی کریملن میں اقتصادی ترقی کے عہدیداروں کے ساتھ میٹنگ کے لیے آمد](https://static.dw.com/image/69778088_800.webp)
روس اپنے روایتی اقدار کی عالمی سطح پر ترویج چاہتا ہے اور یہ موضوع حالیہ برسوں میں ماسکو حکومت کے لیے زیادہ اہمیت اختیار کرچکا ہے۔
ماسکو حکومت کی ویب سائٹ پر شائع کیے گئے حکم میں ملکی صدر ولادیمیر پوٹن نے قومی منصوبوں کے ذمہ دار اہلکاروں کو اس پروگرام کے لیے رقم مختص کرنے کی ہدایت دی ہے۔ تاہم اس کے حوالے سے مالی تفصیلات فراہم نہیں کی گئیں۔
پروگرام کا مقصد نوجوانوں کے تعاون کے ذریعے روسی روحانی اور اخلاقی اقدار کو بیرون ملک اجاگر کرنا ہے۔
متعلقہ آرڈر میں اس 'مخصوص اقدار‘ کی وضاحت نہیں کی گئی۔ البتہ ماسکو حکومت مغربی سماجی لبرل ازم بالخصوص غیر روایتی جنسی تعلقات اور متنوع صنفی شناخت کو قانونی حیثیت دینے کی مخالفت کا اظہار کرچکی ہے، جس کے تناظر میں روایتی اقدار کی ترویج کو مغربی نظریات کے خلاف ایک متبادل ماڈل کے طور پر دیکھا جاسکتا ہے۔
گزشتہ سال روسی سپریم کورٹ نے نام نہاد 'بین الاقوامی ایل جی بی ٹی تحریک' کو انتہاپسندانہ قرار دے دیا تھا۔ اس فیصلے کے بعد کچھ روسیوں کو اس تحریک کی علامت قوس قزح والے مواد کی نمائش کرنے پر مختصر مدت کے لیے جیل اور جرمانے کی سزائیں سنائی گئیں تھیں۔
سال 2022 میں یوکرین میں تنازع کے آغاز کے بعد سے، پوٹن نے عوامی طور پر مغرب کو 'شیطانی' قرار دیا اور اس پر الزام عائد کیا کہ وہ لبرل نظریات کو فروغ دے کر روس کو غیر مستحکم کرنے کی کوشش کر رہا ہے۔
ح ف / ر ب (اے پی)