منگل کے روز کوئی میلوں پر محیط یہ امدادی کارواں باغیوں کے زیرقبضہ علاقوں میں پھنسے شہریوں تک پہنچنے کے لیے یوکرائنی سرحد کی جانب بڑھا۔ یوکرائن اور مغربی ممالک کو خدشہ لاحق ہے کہ روس اس امدادی سامان کے ساتھ اپنے فوجی یوکرائن میں داخل کر سکتا ہے، تاہم روس ان خدشات کو رد کرتا ہے۔

روس کے مطابق اس امدادی کارواں میں دو سو میٹرک ٹن خوراک اور دیگر ضروری اشیاء شامل ہیں اور اس کا مقصد مشرقی یوکرائن میں باغیوں اور یوکرائنی فورسز کے درمیان جاری جنگ میں پھنس کر رہ جانے والے عام شہریوں کی امداد ہے۔

منگل کے روز یوکرائنی حکومت نے کہا کہ یہ قافلہ اگر بین الاقوامی تنظیم ریڈکراس کے ہمراہ یوکرائنی چیک پوسٹوں کے ذریعے ملک کے مشرقی علاقے میں داخل ہوا، تو اسے کوئی اعتراض نہیں ہو گا۔ یوکرائنی حکومت کے مطابق ان روسی ٹرکوں کو یوکرائنی چیک پوسٹ پر روسی ٹرکوں سے اتار کر ریڈ کراس کی گاڑیوں کے ذریعے مقررہ مقامات پر لے جایا جانا چاہیے۔

ادھر اس صورتحال میں روسی صدر ولادیمر پوٹن آج بدھ کے روز ممکنہ طور پر کریمیا پہنچ رہے ہیں۔ رواں برس مارچ میں یہ یوکرائنی علاقہ ایک متنازعہ ریفرنڈم کے بعد روس میں شامل ہو گیا تھا۔ اس دورے میں ولادیمر پوٹن کے ہمراہ ان کی کابینہ کے اعلیٰ ارکان اور دیگر قانون ساز شامل ہوں گے۔

پوٹن اب تک ملک میں موجود قوم پرستوں اور مشرقی یوکرائن کے باغیوں کی جانب سے یوکرائن میں فوجی مداخلت کی اپیلوں کو مسترد کرتے آئے ہیں۔ خبر رساں ادارے ایسوسی ایٹڈ پریس کے مطابق اس امدادی قافلے کے ذریعے پوٹن اندرون ملک قوم پرستوں کی جانب سے حکومت پر ہونے والی تنقید میں کمی چاہتے ہیں، کیوں کہ وہ جانتے ہیں کہ مشرقی یوکرائن میں براہ راست فوجی مداخلت مغربی ممالک کی جانب سے روس کے خلاف مزید سخت اقدامات کی صورت میں برآمد ہو سکتی ہے۔ واضح رہے کہ امریکا اور یورپی یونین درجنوں اہم روسی شخصیات اور اداروں کے خلاف پابندیاں عائد کر چکے ہیں، جس کی وجہ سے روسی معیشت پر خاصی ضرب پڑی ہے۔