یورپی کونسل کے صدر ہیرمن فان رومپوئے نے پیر آٹھ ستمبر کو کہا کہ یورپی یونین روس پر مزید پابندیاں عائد کرنے پر متفق ہو گئی ہے لیکن ان پر عملدرآمد کچھ دنوں میں کیا جائے گا۔ ان کا کہنا تھا کہ یورپی رہنما انتظار کریں گے اور دیکھیں گے کہ مشرقی یوکرائن میں فائر بندی کے معاہدے کی کیا صورتحال ہے۔ فان رومپوئے کی طرف سے جاری کیے گئے اس بیان میں مزید کہا گیا کہ یورپی رہنما مشرقی یوکرائن کی بدلتی ہوئی صورتحال کے تناطر میں پابندیوں کے اس مسودے میں ترامیم کر سکتے ہیں۔

یہ امر اہم ہے کہ کییف حکومت اور مغربی ممالک کا الزام ہے کہ ماسکو حکومت مشرقی یوکرائن میں باغیوں کی پشت پناہی کر رہی ہے، جس کی وجہ سے یہ تنازعہ شدت اختیار کرتا جا رہا ہے۔ امریکا سمیت متعدد یورپی ممالک نے بھی روس کو خبردار کیا ہے کہ وہ اس تنازعے کا فریق نہ بنے۔ اگرچہ کریملن نے مشرقی یوکرائن میں مداخلت کے الزامات کو ہمشیہ ہی مسترد کیا ہے لیکن مغربی دفاعی اتحاد نیٹو کے مطابق ایسے شواہد موجود ہیں کہ روسی افواج باغیوں کی معاونت کر رہی ہیں۔

کچھ یورپی ریاستوں نے ایسے خدشات ظاہر کیے ہیں کہ یونین کی طرف سے روس پر فوری طور پر پابندیاں عائد کرنے کے نتیجے میں مشرقی یوکرائن میں قیام امن کی کوششوں کو نقصان پہنچ سکتا ہے۔ ان ممالک کے بقول روس پر اسی صورت میں مزید سخت پابندیاں عائد کی جانا چاہییں، جب یہ ناگزیر ہو جائیں۔

پیر کو روسی وزیر اعظم دیمتری میدویدف نے خبردار کیا ہے کہ اگر روس پر مزید پابندیاں عائد کی جاتی ہیں تو اس کا جواب ضرور دیا جائے گا۔ انہوں نے کہا کہ دیگر اقدامات کے علاوہ جوابی طور پر روسی کی فضائی حدود میں یورپی پروازوں کا داخلہ بند کیا جا سکتا ہے۔

دوسری طرف کییف حکومت اور مشرقی یوکرائن میں فعال روس نواز باغیوں کے مابین جمعے کے دن طے پانے والے فائر بندی کے معاہدے پر پیر کے دن عملدرآمد ہوتا نظر آیا ہے۔ تاہم اطراف نے ایک دوسرے پر شیلنگ کے الزامات عائد کیے ہیں۔ اسی دوران یوکرائنی صدر پیٹرو پوروشینکو نے پیر کو مشرقی یوکرائن کے نئے میدان جنگ میروپول کا دورہ کیا ہے۔ فائر بندی کے باوجود اس بندرگاہی شہر میں گزشتہ کئی دنوں سے یوکرائنی فوجیوں اور باغیوں کے مابین جھڑپوں کی اطلاع ملی ہیں۔

میروپول میں صحافیوں سے گفتگو کرتے ہوئے پوروشینکو کا کہنا تھا کہ یہ شہر یوکرائن کا حصہ ہے اور یوکرائن کا ہی حصہ رہے گا۔ انہوں نے خبردار کیا کہ اگر باغیوں نے اس شہر پر چڑھائی کی کوشش کی تو ان کے حملے کو بری طرح ناکام بنا دیا جائے گا۔ دریں اثناء یوکرائنی صدر نے اپنے روسی ہم منصب ولادیمیر پوٹن سے ٹیلی فون پر گفتگو میں فائر بندی کو برقرار رکھنے کا عزم ظاہر کیا ہے۔ بتایا گیا ہے کہ دونوں رہنماؤں نے مشرقی یوکرائن میں تناؤ کی کیفیت کو کم کرنے پر بھی اتفاق کیا تاہم اس بارے میں مزید تفصیلات ظاہر نہیں کی گئی ہیں۔