سیٹلائٹ تصاویر سے پتہ چلتا ہے کہ روسی فوجی گاڑیوں کا تقریباً 60 کلومیٹر طویل ایک بہت بڑا قافلہ یوکرائن کے دارالحکومت کییف کی جانب پیش قدمی کر رہا ہے۔

سیٹلائٹ تصاویر فراہم کرنے والی امریکی کمپنی میکسار ٹیکنالوجیز کی طرف سے جاری کردہ تصاویر میں دیکھا جاسکتا ہے کہ روسی فوج کا 60 کلومیٹر سے زیادہ طویل ایک قافلہ کییف کی جانب بڑھ رہا ہے۔ ابتدا میں کمپنی نے کہا تھا کہ یہ قافلہ27 کلومیٹر تک پھیلا ہواہے لیکن یہ اطلاع غلط ثابت ہوئی۔ میکسار کے مطابق دراصل یہ قافلہ 60 کلومیٹر سے زیادہ طویل ہے۔

یوکرائنی خبر رساں ایجنسی یو این آئی اے این نے بھی منگل کی صبح کو اس قافلے کے حوالے سے تصدیق کی ہے۔

اس قافلے میں سینکڑوں توپیں، ٹرک، بکتر بند گاڑیاں اور فوجی امدادی گاڑیاں شامل ہیں۔ جو دھیرے دھیرے کییف کی جانب بڑھ رہی ہیں۔

کییف پر حملے دوبارہ شروع

یوکرائنی فوج کا کہنا ہے کہ روسی فوج نے دارالحکومت کییف پر دوبارہ حملہ شروع کردیا ہے۔ یوکرائن کی مسلح افواج کے جنرل اسٹاف نے فیس بک پوسٹ میں لکھا کہ کییف کے اطراف میں حالات بدستور کشیدہ ہیں۔ اور "دشمن فوجی اور سویلین اہداف پر گولہ باری جاری رکھے ہوئے ہے۔"

بیان میں دعویٰ کیا گیا ہے کہ روس بیلاروس کے اعلی تربیت یافتہ فوجی یونٹوں کو اپنے ساتھ شامل کرنے اور بیلاروس کی فضائی حدود کو یوکرائن پر فضائی حملوں کے لیے استعمال کرنے کا ارادہ رکھتا ہے۔

قبل ازیں یوکرائن کے صدر وولادومیر زیلنسکی نے کہا تھا، "روسیوں کے لیے کییف ایک اہم ہدف رہا ہے۔ وہ ہماری قومیت کو توڑنا چاہتے ہیں، یہی وجہ ہے کہ دارالحکومت کو مسلسل خطرہ ہے۔" انہوں نے مزید کہا، "پیر کو کییف کو تین میزائل حملوں سے نشانہ بنایا گیا اور سینکڑوں غنڈہ گردی کرنے والے شہر میں گھوم رہے تھے۔"

وولادومیر زیلنسکی نے ایک ویڈیو خطاب میں کہا، "مجھے یقین ہے کہ روس اس طریقے سے یوکرائن پر دباو ڈالنے کی کوشش کر رہا ہے۔"

 انہوں نے روس اور یوکرائن کے عہدیداروں کے درمیان ہونے والی بات چیت، جو کسی نتیجے کے بغیر ختم ہوگئی، کے حوالے سے کہا، "جب ایک فریق دوسرے کو راکٹوں سے نشانہ بنا رہا ہو، ایسے میں یوکرائن سودے بازی کے لیے تیار نہیں تھا۔"

'ہم خودسپردگی نہیں کریں گے'

یوکرائن کے وزیر خارجہ دمیتری کولیبا نے کہا ہے کہ ان کا ملک خودسپردگی نہیں کر ے گا۔

سی این بی سی ٹیلی ویژن کو دیے گئے ایک انٹرویو میں کولیبا نے کہا، "یوکرائن سفارتی حل کے لیے تیار ہے لیکن ہم نہ تو خودسپردگی کریں گے اور نہ ہی ان کی شرائط کے سامنے جھکیں گے۔ "

 روس کے خلاف مختلف ملکوں کی طرف سے عائد کی جانے والی اقتصادی پابندیوں کا ذکر کرتے ہوئے یوکرائن کے وزیر خارجہ نے کہا کہ صدر پوٹن کی وجہ سے روس کے عام شہریوں کوخمیازہ بھگتنا پڑ رہا ہے۔ کولیبا نے کہا کہ روس کے ہر روبل پر یوکرائن کا خون لگا ہوا ہے۔

دریں اثنا یوکرائنی صدر نے روسی بمباری کو روکنے کے لیے ملک کو' نو فلائی زون' قرار دینے کی اپیل کی۔ لیکن وائٹ ہاوس نے یوکرائن کی اپیل کو مسترد کرتے ہوئے کہا کہ 'نوفلائی زون' نافذ کرنے سے امریکا بھی روس کے ساتھ جنگ میں پھنس سکتا ہے۔

 ج ا/ ص ز (اے پی، روئٹرز، ڈی پی اے، اے ایف پی)