روہنگیا اقلیت کے افراد کے اس پہلے گروپ کو آج بھارتی سپریم کورٹ میں دائر اپیل کے آخری لمحوں میں رد کیے جانے کے بعد ڈی پورٹ کیا گیا۔ اس اپیل کو سات روہنگیا افراد کے وکیل کی جانب سے دائر کیا گیا تھا جس میں کہا گیا تھا کہ ان افراد کو میانمار واپسی پر انتقامی کارروائیوں کا خدشہ ہے۔ ان افراد کو سن 2012 میں غیر قانونی طور پر بھارتی حدود میں داخل ہونے کے الزام میں گرفتار کیا گیا تھا اور تب سے اب تک یہ جیل میں ہی تھے۔

ایک بھارتی پولیس افسر نے نام خفیہ رکھنے کی شرط پر بتایا کہ ان ساتوں روہنگیا افراد کو مانی پور ریاست میں موریح کی بارڈر کراسنگ پر میانمار حکام کے حوالے کیا گیا۔ ان افراد کے پاس اپنی ذاتی اشیاء کا ایک ایک بیگ بھی تھا۔

بھارتی سپریم کورٹ نے اپنے فیصلے میں کہا کہ وہ اس ملک بدری کا حکم اس لیے دے رہی ہے کیونکہ میانمار حکومت نے ان افراد کو اپنے شہریوں کے طور پر قبول کیا ہے۔ سرکاری وکیل تشار مہتا نے انڈین سپریم کورٹ کو بتایا کہ ینگون حکومت نے اس ڈی پورٹیشن میں معاونت کرتے ہوئے سات شناختی سرٹیفیکیٹ اور تمام سات افراد کو ایک ایک ماہ کا ویزہ بھی فراہم کیا ہے۔

یاد رہے کہ بدھ اکثریت والے ملک میانمار میں روہنگیا اقلیت سے تعلق رکھنے والے بیشتر افراد کو حکومت شہریت دینے سے انکار کر دیتی ہے۔ اس اقدام کو عالمی سطح پر تنقید کا نشانہ بنایا گیا ہے۔

وکیل دفاع پرشانت بھوشن کا کہنا ہے کہ روہنگیا افراد کے ساتھ غیر قانونی تارکین وطن کے طور پر نہیں بلکہ مہاجرین کی حیثیت سے سلوک کیا جانا چاہیے۔ بھوشن کے بقول واپسی کا عمل عالمی ادارہ مہاجرت کے ذریعے سے ہونا چاہیے۔

اگست سن 2017 سے قریب سات لاکھ روہنگیا افراد بنگلہ دیش میں پناہ لے چکے ہیں۔ اندازوں کے مطابق چالیس ہزار روہنگیا باشندے بھارت کے مختلف علاقوں میں کیمپوں میں پناہ لیے ہوئے ہیں۔ ان میں سے زیادہ تر کیمپ ہریانہ، راجھستان اور جموں کشمیر میں قائم ہیں۔ چالیس ہزار میں سے صرف پندرہ ہزار ہی یو این ایچ سی آر کے پاس رجسٹرڈ ہیں۔

ص ح / ع ا / نیوز ایجنسی