معاشی ماہرین کا الزام عائد کرتے ہوئے کہنا ہے کہ ملکی وزیر خزانہ کا یہ بیان جاگیرداروں اور رئیل اسٹیٹ مافیاز کو نوازنے کے مترادف ہے، جن کے مضبوط روابط سیاست دانوں اور طاقتور حلقوں کے ساتھ ہیں۔

وزیر خزانہ اسحاق ڈار نے یہ بیان قومی اسمبلی میں ان افواہوں کے ردعمل میں دیا تھا، جن کے مطابق حکومت نے آئی ایم ایف کو یقین دلایا ہے کہ زراعت اور تعمیرات پر نئے ٹیکس عائد کیے جائیں گے۔

جاگیردار، سیاسی جماعتیں اور ٹیکس 

لاہور سے تعلق رکھنے والے معاشی امور کے ماہر ڈاکٹر قیس اسلم کا کہنا ہے کہ سیاسی پارٹیوں میں جاگیرداروں کی ایک بہت بڑی تعداد ہے۔ انہوں نے ڈی ڈبلیو کو بتایا،”یہ جاگیردار تقریبا ہر حکومت کا حصہ ہوتے ہیں اور زرعی ٹیکس لگنے نہیں دیتے۔‘‘

قومی خزانے کا ضیاع اور حکومتی پالیسیاں

 قیس اسلم کا کہنا تھا کہ یہ تصور غلط ہے کہ زرعی ٹیکس سے آمدنی نہیں بڑھے گی، ”برصغیر میں مغل اور برطانوی حکومتیں اپنی آمدنی کے لئے بڑی حد تک زرعی ٹیکس پر انحصار کرتی تھیں۔ تو یہ کیسے کہا جا سکتا ہے کہ زرعی ٹیکس کو لگا کر محصولات کو بڑھایا نہیں جا سکتا۔‘‘

تعمیرات اور رئیل اسٹیٹ کی طاقت

پاکستان میں رئیل اسٹیٹ کے شعبے کو بھی بہت طاقتور سمجھا جاتا ہے اور تعمیرات کے شعبے کے لوگ پاکستانی سیاست پر بہت اثر انداز ہوتے ہیں۔ اسلام آباد سے تعلق رکھنے والے معاشی امور کے ماہر شاہد محمود کا کہنا ہے کہ رئیل اسٹیٹ کا شعبہ پاکستان میں ایک مافیا کی شکل اختیار کر چکا ہے۔ شاہد محمود نے ڈی ڈبلیو کو بتایا، '' پاکستان میں رئیل اسٹیٹ بہت طاقتور مافیا ہے، جس میں ڈی ایچ اے اور بحریہ ٹاؤن سمیت بہت سارے تعمیراتی ادارے شامل ہیں۔ طاقت اتنی زیادہ ہے کہ ریاست بھی ان کے سامنے بے بس نظر آتی ہے اور حکومت ان کے سامنے ڈھیلی پڑ جاتی ہے۔‘‘

پاکستان پر اشرافیہ کا تسلط اور آئی ایم ایف کی سربراہ کا مطالبہ

 لاہور سے تعلق رکھنے والے ٹیکس امور کے ماہر ڈاکٹر اکرام الحق کا کہنا ہے کہ سیاسی جماعتوں میں بہت سارے لوگ رئیل اسٹیٹ کا کاروبار کرتے ہیں، اسی لیے حکومت ان پر ٹیکس نہیں لگا سکتی۔ انہوں نے ڈی ڈبلیو کو بتایا، ''کسی بھی سیاسی جماعت کا جائزہ لے لیں، اس میں سب سے آگے آگے رئیل اسٹیٹ والے نظر آئیں گے، جو سیاسی جماعتوں کو چندہ دیتے ہیں اور بعد میں اقتدار میں آ کر وہ تعمیرات کے شعبے پہ ٹیکس لگنے نہیں دیتے۔‘‘

حکومت کی حجت ’غیر منطقی‘ ہے

حکومتوں کی طرف سے رئیل اسٹیٹ یا تعمیرات پر ٹیکس نہ لگانے کی ایک وجہ یہ بھی بیان کی جاتی ہے کہ جب تعمیرات کی انڈسٹری حرکت میں آتی ہے، تو اس سے دوسری صنعتوں کو فائدہ ہوتا ہے، جس سے معاشی گروتھ بڑھتی ہے۔ تاہم شاہد محمود اس دلیل کو غلط قرار دیتے ہیں،” صرف تعمیرات کا معاملہ نہیں ہے، ہر صنعت مختلف صنعتوں سے جڑی ہوئی ہوتی ہے، تو اس دلیل کی بنیاد پر دوسری صنعتوں پر بھی ٹیکس لگنا نہیں چاہیے۔‘‘

شاہد محمود کے مطابق ساری حکومتوں نے ہمیشہ تعمیرات اور رئیل اسٹیٹ کو ٹیکس ایمنسٹی دی ہے، ''اس سے معاشی گروتھ تو نہیں بڑھی ہاں کالا دھن سفید ضرور ہوا ہے۔‘‘

حکومتی ذرائع آمدن بڑھائے جا سکتے ہیں

معاشی امور کے ماہرین کا خیال ہے کہ پاکستان ویسے ہی ایک بہت خطرناک معاشی صورتحال سے گزر رہا ہے، ایسے میں رئیل اسٹیٹ یا تعمیرات کو ٹیکسوں میں چھوٹ دینے سے ملک کے وسائل مزید کم ہوں گے۔

 اکرام الحق کا کہنا ہے کہ پاکستان میں دو ہزار کثیر القومی کمپنیاں اور سرکاری ادارے ٹیکس دیتے ہیں جبکہ سرمایہ داروں کی ایک بڑی تعداد صحیح معنوں میں ٹیکس ادا نہیں کرتی۔ 

شاہد محمود کے مطابق رئیل اسٹیٹ میں روزانہ کروڑوں یا بعض اوقات اربوں کا کام ہوتا ہے، ”لیکن یہ سارا کاروبار انڈر دی ٹیبل ہوتا ہے اور اس میں بہت ساری بے ایمانی ہوتی ہے۔ اسی طرح رئیل اسٹیٹ کے لیے کالے دھن کو سفید کیا جاتا ہے اور اس کے لیے ٹیکس چھوٹ دی جاتی ہے۔ اگر چھوٹ نہ دی جائے اور اس پر صحیح معنوں میں ٹیکس لگایا جائے تو پاکستان کے ریوینیو میں بہت زیادہ اضافہ ہو سکتا ہے۔‘‘