زندگی سے محبت کیجے، پلاسٹک سے نہیں
14 مئی 2022
یہ وہ زمانہ تھا جب پہلی اور آخری تفریح پی ٹی وی ہوا کرتا تھا۔ عینک والا جن دیکھ کر خوش ہونے والا ہمارا بچپن اور بہت سی معصوم تفریحات کا مزہ لیا کرتا تھا۔ پنجاب میں چونکہ گرمیوں میں آم کے موسم کے آغاز ہی کے ساتھ تیز ہوائیں جنہیں "اندھیری یا اندھی " کہا جاتا تھا کا زور شروع ہو جاتا تھا اور وہ تیز ہوائیں ماوں کے لیے اس لحاظ سے مصیبت ہوتی تھیں کیونکہ وہ مٹی کا طوفان ہوا کرتی تھیں ۔ مگر ہم اس تیز ہوا میں گلی یا علاقے کے گراونڈ میں پلاسٹک کے شاپروں کو دھاگے باندھ کر مقابلہ کرتے تھے کہ کس کا لفافہ سب سے زیادہ اونچا ہے۔ طوفان تھمنے کے بعد یہی لفافے درختوں کی ٹہنیوں، کھلے گٹروں اور نالیوں وغیرہ میں پھنسے ملتے تھے جس کے بعد گٹر بند ہونا گھروں میں ایک عام بات سمجھی جاتی تھی۔
اور آج اکیسویں صدی میں آپ کراچی کے ساحل پر جائیں تو دور تک یہی پلاسٹک کے شاپر ، بوتلیں، ٹن اور کچرا ملے گا ۔ پلاسٹک نے یہ طوفان صرف پاکستان میں ہی نہیں بلکہ دنیا بھر میں مچایا ہوا ہے۔
ڈبلیو ڈبلیو ایف کی رپورٹ کے مطابق پاکستان میں سالانہ تقریبا آٹھ ملین ٹن پلاسٹک سمندر کی نذر ہو رہا ہے۔ نہ صرف یہ بلکہ پاکستان میں کچرے کا 65 فیصد حصہ پلاسٹک ہے۔
پاکستان میں پلاسٹک انڈسٹری کی بات کی جائے تو رجسٹرڈ اور غیر رجسٹرڈ دو کیٹیگریز بنانا پڑیں گی۔ صرف شہر اقتدار میں اس وقت پلاسٹک بنانے کی تین فیکٹریاں کام کر رہی ہیں ۔ ان میں سے ابھی صرف ایک فیکٹری رجسٹر ہے جبکہ باقی دو فیکٹریاں رجسڑیشن کے مراحل کو طے کرنے کی تگ و دو میں لگی ہوئی ہیں۔ مگر پروڈکشن کا کام شروع کر چکی ہیں۔ سوال یہ ہے کہ شہر اقتدار میں پلاسٹک فری شہر کی کیمپین کے بعد ان فیکٹریز کی پلاسٹک پروڈکشن کو حکومت کی جانب سے کتنا کنٹرول کیا گیا؟
منسڑی آف کلائمینٹ چینچ کے جاری کردہ اعداد کے مطابق پاکستان میں پلاسٹک بنانے والی ساٹھ فیصد فیکٹریاں پنجاب ، تیس فیصد سندھ، سات فیصد خیبر پختونخوا جبکہ تین فیصد بلوچستان میں ہیں۔ ایک سال میں ملک میں امپورٹ پلاسٹک چونیس اعشاریہ اکاون ملین ٹن ہے جس کی مالیت تین اعشاریہ چھ بلین بنتی ہے۔
سن دو ہزار انیس میں پاکستان ان ایک سو ستائیس ممالک میں شامل ہوا جنہوں نے عہد کیا کہ وہ پلاسٹک بیگز کو اپنے ممالک میں بین کریں گے۔ اس عہد کے بعد منسٹری آف کلائمینٹ چینج اور پاکستان انوائرمینٹل پروٹیکشن ا یجینسی کی مدد سے سالانہ چھ لاکھ کلوگرام پلاسٹک بیگز کو بننے سے روکا گیا۔ اس حوالے سے بہت سی کیمپینز بھی چلائی گئیں ، مفت کاغذ کے بیگز بھی بانٹے گئے اور جرمانے بھی کیے گئے۔ دو سو چھپن چالان اس ضمن میں اب تک جاری کیے گئے اور وصول شدہ جرمانے کی مالیت 2880000 روپے ہے۔
چوبیس فروری سن دو ہزار بائیس کو فیض آباد سے ایک بس سروس میں ساہیوال تک سفر کے لیے سوار ہوئی تو کینٹین سے کچھ کھانے پینے کی اشیاء خریدیں۔ جو ایک پلاسٹک کے شاپر میں ملیں۔ کلر کہار سروس ایریا پہنچنے پر مجھے اندازہ ہوا کہ چونتیس نشستوں پر مشتمل یہ بس مکمل بھری ہوئی ہے اور ہر مسافر کے پاس کم از کم تین پلاسٹک ریپرز اور ایک پلاسٹک کی بوتل موجود ہے۔ یہ ایک بس کا احوال ہے جس نے فیصل آباد پہنچ کر مسافر بدلے تو پلاسٹک بھی نیا سوار ہوا ۔
ماحولیاتی تبدیلیوں نے جہاں موسموں کی شدت میں اضافہ کیا وہیں رہن سہن ، رہائش اور خوارک کو بھی متاثر کیا ہے۔ گرمی کی شدت نے جلدی امراض کے ساتھ ساتھ پانی اور بجلی کی ضرورت میں اضافہ کیا۔ طرز تعمیر اسی موسمی شدت کی وجہ سے بہت بدل گیا۔ شدید سردی اور شدید گرمی نے پودوں ، جانوروں اور آبی حیات کو بہت متاثر کیا۔ ڈبلیو ڈبلیو ایف کے مطابق اگر سمندر میں پلاسٹک کے کچرے پر قابو نا پایا گیا تو سن دو ہزار چالیس تک پاکستان کے سمندر میں مچھلی نہیں صرف پلاسٹک ملے گا ۔
پلاسٹک کو طبعی طور پر کینسر کا بہت بڑا ذریعہ سمجھا جاتا ہے۔ ایک اندازے کے مطابق ایک پلاسٹک بیگ کو تلف ہونے میں تقریبا پانچ سو سال جبکہ پلاسٹک بوتل کو تین سو سال لگتے ہیں۔ پاکستان میں سالانہ تقریبا پچپن بلین پلاسٹک بیگز ا ستعمال کیے جاتے ہیں۔
پاکستان میں غربت کی لکیر سے نیچے زندگی گزار انے والوں کے لیے یہ سب باتیں اہم ہیں؟ وہ جھگیاں جن کو لکڑی اور کانوں کے ساتھ جوڑ کر بچے ہوئے کپڑوں کی صورت ایک چھت تعمیر کر کے اس پر موٹا پلاسٹک ڈالا جاتا ہے تاکہ بارش سے بچا جائے، کیا وہ لوگ پلاسٹک کو برا یا مضر زندگی سمجھ سکتے ہیں؟
سبزی والے سے سبزی لینے پر وہ شاپر کے پیسے نہیں مانگتا ۔ ایسا ہی ہر بازار میں دوکاندار بھی کرتا ہے۔ تو وہ عام شہری جو مشکل سے اپنا گزر بسر کر رہا ہے کیا وہ پلاسٹک بیگ کی جگہ کاغذ کے بنے بیگ کے لیے الگ سے پیسے دے گا؟
زندگی مٹی کے برتن سے پیتل اور پھر سٹیل کے برتنوں میں نسل در نسل سفر کرتے کرتے آج پلاسٹک کے خوبصورت ڈنر سیٹ پر رک گئی ہے کیونکہ وہ دیکھنے میں خوشنما اور قیمتی بھی لگتے ہیں اور دیر پا بھی ہوتے ہیں۔ تو کیا یہی خوبصورتی پیتل یا سٹیل کے برتنوں میں نہیں لائی جا سکتی؟
پلاسٹک بیگز روزمرہ کا اتنا ہی اہم جزو بن چکے ہیں جتنا انٹرنیٹ۔ پاکستانی معیشت میں جہاں پلاسٹک انڈسڑی اپنا حصہ ڈال رہی ہے ، وہیں عام انسان کی زندگی میں بہت سی آسائشیں، خوبصورتی اور عیاشی اسی سستے پلاسٹک کی اشیاء کی بدولت ہے جس میں کافی اہم کردار چین کی بنی ہوئی پلاسٹک کی سستی اشیاء ہیں۔ اس لیے اسے عام انسان کی زندگی سے نکالنے کے لیے پہلے اس کا متبادل لانا بہت اہم ہے۔ اور دوسری اہم چیز حکومتی سطح پر پلاسٹک کے کچرے کو ری سائیکل یا تلف کرنے کے لیے اقدامات کا کرنا ہے۔
شہر اقتدار میں پلاسٹک سے ری سائیکلڈ اتاترک ایونیو اس کی بہترین مثال ہے۔ اس سڑک کی تعمیر کے لیے تقریبا دس ٹن پلاسٹک ویسٹ استعمال کیا گیا۔ اس پراجیکٹ کو اکیس ملین کی لاگت کے ساتھ کوکا کولا اور اسلام آباد کیپیٹل ڈویلپمنٹ اتھارٹی نے مل کر تعمیر کیا۔
بس تھوڑا سا شعور و آگہی بانٹنے کی بات ہے۔ بس یہ سمجھنے اور سمجھانے کی بات ہے کہ کس طرح پلاسٹک بیگز سے گٹر اور نالیاں بند ہو جاتی ہیں بالکل ایسے ہی یہ پلاسٹک کسی بھی آبی حیات کے گلے میں پھنس کر اس کے لیے موت کا سبب بنتا ہے۔ ہوا میں اڑتا یہ لفافہ اسی پتنگ کی ڈور کی طرح ہے جو انسانی جان کے لیے خطرہ ہے۔
لوٹنے کی کوشش کرتے ہیں اس پرانے دور میں اور ورلڈ بینک کے سن دو ہزار انیس میں پاکستان میں اپنی ٹیم کے ساتھ اٹھائے۔ اس اقدام کو ملکی تحریک بناتے ہیں کہ گھر سے باہر کچھ بھی خریدنے جائیں تو اپنا کپڑے کا بنا " بیگ" لے کر جائیں۔ پانی کے لیے وہ بوتل استعمال کریں جسے با آسانی پھر سے بھریں اور استعمال میں لائیں۔ سفر مشکل ہے مگر ناممکن کچھ نہیں۔
نوٹ: ڈی ڈبلیو اُردو کے کسی بھی بلاگ، تبصرے یا کالم میں ظاہر کی گئی رائے مصنف یا مصنفہ کی ذاتی رائے ہوتی ہے، جس سے متفق ہونا ڈی ڈبلیو کے لیے قطعاﹰ ضروری نہیں ہے۔