جرمن نيوز ايجنسی ڈی پی اے کی برلن سے موصولہ رپورٹوں کے مطابق چانسلر ميرکل کی نائب ترجمان کرسٹيئن ورٹز نے رپورٹرز کو بتايا کہ صرف اِس بات کی تصديق کی جا سکتی ہے کہ سابق فرانسيسی صدر نے چانسلر ميرکل کے ساتھ ملاقات کی ہے تاہم اِس ملاقات ميں زير بحت آنے والے معاملات کو خفيہ رکھا جا رہا ہے۔ ترجمان سے جب يہ دريافت کيا گيا کہ آيا فرانس کے موجودہ صدر فرانسوا اولانڈ کو سارکوزی کے دورے کے بارے ميں مطلع کيا گيا ہے، تو اُنہوں نے کہا کہ چانسلر ميرکل نے اِس بارے ميں اولانڈ کو مطلع کر ديا ہے۔

بعد ازاں سابق فرانسيسی صدر سارکوزی نے جرمنی کے معروف ’کونراڈ اڈاناؤئر فاؤنڈيشن‘ ميں تقرير کرتے ہوئے کہا کہ اِس مخصوص وقت اُن کا ايسا کوئی ارادہ نہيں ہے کہ وہ ’سياسی سرگرميوں سے عليحدگی کے دور‘ کو ختم کريں۔ تاہم اُنہوں نے اِس حوالے سے بات نہيں کی کہ يہ دور کب تک جاری رہے گا۔ اپنی تقرير کے دوران سارکوزی نے يورو زون کی سب سے بڑی دو معيشتوں، جرمنی اور فرانس، کے باہمی تعلقات کے بارے ميں بھی بات چيت کی۔ اُن کے بقول برلن اور پيرس کی دوستی نہ صرف اِن دو ممالک کے ليے بلکہ پورپ کے ليے بھی لازمی ہے۔

ميرکل اور سارکوزی کے تعلقات، پس منظر

نکولا سارکوزی 2007ء سے 2012ء تک فرانس کے صدر رہ چکے ہيں۔ جِس وقت يورو زون کو درپيش اقتصادی بحران اپنے عروج پر تھا، اُس وقت سارکوزی اور ميرکل کے تعلقات کافی اچھے تھے اور دونوں کی سياسی جوڑی کو کافی اہم قرار ديا جاتا تھا۔ يہی وجہ ہے کہ فرانس ميں 2012ء ميں ہونے والے صدارتی انتخابات ميں ميرکل نے سوشلسٹ سياستدان اولانڈ پر قدامت پسند نکولا سارکوزی کو ترجيح دی تھی۔ يہاں يہ بات قابل ذکر ہے کہ ابتداء ميں اگرچہ موجودہ فرانسيسی صدر اولانڈ اور چانسلر ميرکل کے تعلقات کچھ زيادہ خاص نہ تھے تاہم وقت کے ساتھ دونوں ليڈران نے کافی اچھے تعلقات قائم کر ليے ہيں۔

قدامت پسند سياست دان سارکوزی نے 2012ء ميں ہونے والے اليکشن سے قبل يہ کہا تھا کہ وہ اپنی شکست کی صورت ميں سياست کو خير باد کہہ ديں گے تاہم اِن دنوں اُن کے بارے ميں ايسی قياس آرائياں کی جا رہی ہيں کہ وہ 2017ء ميں ہونے والے آئندہ صدارتی انتخابات ميں حصہ لے سکتے ہيں۔