امریکی خلائی ادارے ناسا کا بغیر انسان کے تحقیقی خلائی جہاز نظام شمسی کے سرخ سیارے مریخ پر اتر گیا ہے۔ جہاز کے مریخ کی سطح پر اترنے پر ناسا کی تجربہ گاہ میں موجود سائنسدانوں اور تحقیقی ورکروں نے پرزور انداز میں تالیاں بجائیں۔ کنٹرول مشن میں موجود درجنوں سائنسدانوں کو خلائی جیٹ کی لینڈنگ کے وقت شدید دباؤ میں دیکھا گیا لیکن اس کے اترتے ہی وہ سبھی ہال میں پرمسرت آوازیں نکالنے کے علاوہ ایک دوسرے سے بغلگیر بھی ہوئے۔

اس جہاز کو تشکیل یعنی ڈیزائننگ سے تعمیر، روانہ کرنے اور انجام کار لینڈنگ تک کا عرصہ سات برسوں پر محیط ہے۔ یہ چھ ماہ کے مسلسل طویل سفر کے بعد مریخ کی سطح پر اترنے میں کامیاب ہوا ہے۔ یہ دو برس تک اس سیارے کی سطح پر تحقیقی مشن جاری رکھنے کی صلاحیت کا حامل ہے۔

ناسا کے کنٹرول ٹاور نے بھی خلائی جہاز ’اِن سائٹ‘ کے سرخ سیارے پر اترنے کی باضابطہ تصدیق کر دی ہے۔ یہ معلوماتی جہاز خاص طور پر مریخ کی سطح پر زلزلوں کی کیفیت کو ریکارڈ کر کے روانہ کرے گا تا کہ معلوم ہو سکے کہ آیا یہ بھی اپنی ہیئت میں زمینی زلزلوں جیسے ہیں۔

اس خلائی مشن پر فرانس کے سائنسی آلات بنانے والے ایک ادارے CNES نے خصوصی آلہ تیار کر کے نصب کیا جو مریخ کی سطح پر آنے والے زلزلوں کی کیفیات کو خصوصی طور پر ریکارڈ کر کے زمین پر روانہ کرے گا۔ یہ آلہ مریخ کی اندرونی ساخت کے بارے میں بھی کھوج لگانے میں کامیاب ہو سکتا ہے۔ اس مشن میں فرانسیسی ریسرچرز بھی شامل ہیں۔

خلائی جہاز ’ان سائٹ‘ نے اترنے کے فوری بعد جو چند تصاویر روانہ کی ہیں، اُن کے مطابق یہ جہاز جہاں اترا ہے، اُس کے سامنے چٹانیں نہیں ہیں اور اس طرح کیمرے کی آنکھ دور تک دیکھنے کے قابل ہے۔ اس کے ساتھ ساتھ خلائی جہاز کی بیٹریوں نے خود کو چارج کرنا بھی شروع کر دیا ہے، اسے ایک حوصلہ افزا پیشرفت قرار دیا گیا ہے۔

اس کے علاوہ یہ سرخ سیارے کی سطح کی تصاویر بھی روانہ کرے گا اور اُن سے یہ معلوم ہو سکے گا کہ اس کی سطح کس نوعیت کی ہے۔ مریخ کی سطح پر اترنے والا یہ آٹھواں امریکی تحقیقی خلائی مشن ہے۔ اس مناسبت سے ناسا نے مریخ کے لیے تینتالیس کوششیں کی ہیں اور ان میں سے صرف نو کو کامیابی حاصل ہوئی ہے۔ سن 1976 کے بعد مریخ پر لینڈنگ کی یہ نویں کامیاب کوشش ہے۔

امریکی خلائی ادارے کے ایڈمنسٹریٹر جم برائڈنسٹائن کے مطابق خلائی جیٹ کے مریخ پر اترنے کو صدر ٹرمپ اور نائب صدر پینس نے بھی ناسا ٹیلی وژن پر دیکھا۔ اس کامیابی پر ان دونوں نے ناسا کے سائنسدانوں کو مبارک باد بھی دی۔ اس خلائی جہاز کے مریخ پر اترنے کے مشن پر 993 ملین امریکی ڈالر کی لاگت آئی ہے۔