چینی دارالحکومت بیجنگ سے منگل ستائیس ستمبر کو ملنے والی رپورٹوں کے مطابق یہ کارروائی جنوبی چینی صوبے ہُونان میں کی گئی۔ اس صوبے کے شہر ہَینگ یانگ میں پبلک سکیورٹی کے محکمے کی طرف سے بتایا گیا کہ اس نے منی لانڈرنگ کر کے غیر قانونی رقوم کو قانونی سرمائے کی شکل دینے والے ایک بہت بڑے گروہ کا پتہ چلا کر درجنوں ملزموں کو حراست میں لے لیا۔

جرمنی کا منی لانڈرنگ کے خلاف کریک ڈاؤن کا اعلان

ہُونان کے پبلک سکیورٹی بیورو کے جاری کردہ اعلامیے کے مطابق اس گروہ پر شبہ ہے کہ اس کے ارکان نے کرپٹو کرنسیوں کی منتقلی کے ذریعے تقریباﹰ 40 بلین یوآن کے برابر رقوم کی منی لانڈرنگ کی۔ یہ رقوم 5.61 بلین امریکی ڈالر کے برابر بنتی ہیں۔

اعلامیے میں یہ بھی بتایا گیا کہ مالیاتی جراائم کے مرتکب اس گروہ کے بارے میں شبہ ہے کہ اس کے ارکان ٹیلی مواصلاتی ذرائع سے فراڈ کے 300 سے زائد زیر تفتیش واقعات میں بھی ملوث رہے ہیں۔

یورپی یونین کا منی لانڈرنگ کے خلاف اعلان جنگ

چینی حکام کے مطابق اب تک اس گروہ کے 93 ارکان گرفتار کیے جا چکے ہیں اور ان کے قبضے سے نقدی کی صورت میں 300 ملین یوآن برآمد ہوئے، جو تقریباﹰ 42 ملین امریکی ڈالر کے برابر بنتے ہیں۔

اس کے علاوہ اس گروہ کے ارکان کی ملکیت یا ان کے زیر استعمال رہنے والے 100 سے زائد اسمارٹ فون اور کمپیوٹرز بھی حکام نے اپنے قبضے میں لے لیے ہیں۔

م م / ش ر (روئٹرز)