ایک طرف پاکستان کی جانب سے کرزئی حکومت کو سخت الفاظ میں وارننگ دی گئی ہے تو دوسری جانب جنوبی افغان شہر قندھار میں سرحد پر پائی جانی والی کشیدگی اور تازہ مسلح واقعے کے تناظر میں سینکڑوں افغانوں نے پاکستان کے خلاف ایک مظاہرے میں شرکت کرتے ہوئے پاکستان کے خلاف نعرے بازی کی۔ تازہ وارننگ میں پاکستان نے افغان حکومت کو تلقین کی ہے کہ وہ معاملات کو کنٹرول کرے بصورت دیگر سرحدی تنازعہ بڑھ سکتا ہے۔ پیر کے روز سرحدی مقام پر نصب گیٹ کی مرمت کو روکنے پر معاملات آگے بڑھے۔ پاکستان کا مؤقف ہے کہ یہ گیٹ سرحد پر نصب ہے جب کہ افغانستان انیسویں صدی میں قائم کی جانے والی سرحدی ڈیورنڈ لائن کو تسلیم نہیں کرتا۔

پاکستان کی جانب سے وارننگ افغان حکومت کے اُس احتجاج کے ایک دن بعد سامنے آئی ہے، جس میں اسلام آباد حکومت سے سرحد پر فائرنگ کے تازہ واقعے پر احتجاج کیا گیا تھا۔ پیر کے روز افغان حکومت نے اپنے احتجاج میں واضح کیا تھا کہ مشرقی صوبے ننگر ہار کے سرحدی ضلع گوشتا کے بارڈر پوائنٹ پر پاکستان کی جانب سے افغان فوج پر فائرنگ کی گئی تھی۔ اسی مقام پر گزشتہ ہفتے کے دوران دونوں ملکوں کی سکیورٹی فورسز کے درمیان فائرنگ کے تبادلے میں ایک افغان پولیس اہلکار ہلاک جبکہ دو پاکستانی اہلکار زخمی ہوئے تھے۔

یہ امر اہم ہے کہ پاکستان اور افغانستان کے درمیان تعلقات میں گزشتہ چند ماہ سے سرمہری بڑھتی جا رہی ہے۔ دونوں ملک ایک دوسرے کو مُؤرد الزام ٹھہراتے ہوئے ایک دوسرے کے سفارت کاروں کو احتجاجی مراسلے تھما رہے ہیں۔ منگل کے روز بھی بھی اسلام آباد میں افغان سفارت خانے کے ناظم الامور کو وزارتِ خارجہ میں طلب کر کے احتجاجی مراسلہ تھمایا گیا۔

پاکستان کی جانب سے افغان سفارت کار کو دیے جانے والے احتجاجی مراسلے میں بتایا گیا کہ پیر کے روز افغان فوج کی بلا اشتعال فائرنگ سے پانج پاکستانی فوجی زخمی ہوئے۔ اس مراسلے میں یہ بھی کہا گیا کہ مستقبل میں سرحدی تنازعے میں اضافے کی کُلی ذِمہ داری افغان حکومت پر عائد ہو گی۔ اس احتجاج میں یہ بھی واضح کیا گیا کہ پیر کے روز افغان سرحد سے ہونے والی فائرنگ کے دوران پاکستانی فوج نے انتہائی صبرو تحمل کا مظاہرہ کیا تھا۔ مراسلے میں اس کی بھی نشاندہی کی گئی کہ ایسے واقعات دونوں ملکوں کے دوستانہ تعلقات پر منفی اثرات مرتب ہو رہے ہیں۔

دوسری جانب منگل کے روز افغانستان کے شہر قندھار میں سینکڑوں افراد نے پاکستان کے خلاف ایک مظاہرے میں حصہ لیا۔ مظاہرہ میں شریک افغان لوگ پاکستان اور پاکستانی خفیہ ایجنسی آئی ایس آئی کے خلاف نعرہ بازی کرتے رہے۔ مظاہرین قندھار شہر میں نعرہ بازی کرنے کے بعد پرامن انداز میں منتشر ہو گئے۔

حالیہ ماہ و سال میں افغان فوج کا حجم خاصا بڑھ گیا ہے اور اس وقت اس کے فوجیوں کی تین لاکھ 52 ہزار کے قریب پہنچ گئی ہے۔ دوسری جانب پاکستان کی فوج دنیا کی دس بڑی افواج میں شمار کی جاتی ہے۔

(ah/aba(AP