سعودی عسکری اتحاد نے یمن کے ڈرون کنٹرول سسٹم کو نشانہ بنایا
14 فروری 2022
سعودی عسکری اتحاد نے یمن کے دارالحکومت صنعا میں حوثی باغیوں کو نشانہ بنایا ہے۔ اس اتحاد نے حملے سے قبل شہریوں کو خبردار کر دیا تھا کہ وہ شہر سے نکل جائیں۔
تصویر: Ansarullah media center/AFP
اشتہار
سعودی عسکری اتحاد کی طرف سے بتایا ہے کہ ایران نواز باغیوں کی طرف سے ایک سعودی ایئر پورٹ پرڈرون حملے کے جواب میں سعودی عسکری اتحاد نے صنعا میں فضائی کارروائی کی ہے۔
سعودی عسکری اتحاد نے پیر کو بتایا کہ اس فضائی کارروائی میں مواصلات کے ذرائع کو تباہ کر دیا گیا ہے۔ الزام عائد کیا گیا ہے کہ حوثی باغی اس نطام کو ڈرون کنٹرول کرنے کی خاطر استعمال کر رہے تھے۔
سعودی نیوز ایجنسی ایس پی اے نے حکام کے حوالے سے بتایا، ''حوثی باغی ٹیلی کمیونیکشن اینڈ انفارمیشن ٹیکنالوجی کی وزارت کو نقصان پہنچانے کی خاطر استعمال کر رہے تھے۔‘‘
حوثی باغیوں کے ایک نیوز چینل نے اس حملے کی تصدیق کرتے ہوئے کہا ہے کہ ٹیلی یمن، ٹیلی کامز کمپنی کی عمارت تباہ کر دی گئی ہے، جس کے ساتھ دیگر قریبی عمارتوں کو بھی نقصان پہنچا ہے۔
مقامی رہائشیوں کے مطابق اس فضائی کارروائی میں صنعا میں سیٹیلائٹ اسٹیشن کو نشانہ بنایا گیا۔ ہلاکتوں کی تعداد ابھی معلوم نہیں ہو سکی ہے۔
سعودی عسکری اتحاد کا الزام ہے کہ حوثی باغی شہری علاقوں کو جنگی مقاصد کے لیے استعمال کر رہے ہیں اس لیے فضائی کارروائی سے قبل ہی شہریوں کو وارننگ دی گئی تھی کہ وہ وہاں سے نکل جائیں۔
یمنی خانہ جنگی شدید سے شدید تر ہوتی ہوئی
یمنی خانہ جنگی کے باعث یہ عرب ملک تباہی کے دہانے پر پہنچ چکا ہے۔ اس بحران سے شہری آبادی سب سے زیادہ متاثر ہو رہی ہے۔
تصویر: picture-alliance/AP Photo/H. Mohammed
یمنی بحران کا آغاز
حوثی اور صنعاء حکومت کے مابین تنازعہ اگرچہ پرانا ہے تاہم سن دو ہزار چار میں حوثی سیاسی اور جنگجو رہنما حسین بدرالدین الحوثی کے حامیوں اور حکومتی فورسز کے مابین مسلح تنازعات کے باعث ملک کے شمالی علاقوں میں سینکڑوں افراد مارے گئے تھے۔ ان جھڑپوں کے نتیجے میں اس تنازعے میں شدت پیدا ہو گئی تھی۔ حوثی رہنما سیاسی اصلاحات کا مطالبہ کر رہے تھے۔
تصویر: picture-alliance/AP Photo/H. Mohammed
مصالحت کی کوششیں
سن دو ہزار چار تا سن دو ہزار دس شمالی یمن میں حوثی باغیوں اور حکومتی دستوں کے مابین جھڑپوں کا سلسلہ جاری رہا۔ عالمی کوششوں کے باعث فروری سن دو ہزار دس میں فریقن کے مابین سیز فائر کی ایک ڈیل طے پائی تاہم دسمبر سن دو ہزار دس میں معاہدہ دم توڑ گیا۔ اسی برس حکومتی فورسز نے شبوہ صوبے میں حوثیوں کے خلاف ایک بڑی کارروائی شروع کر دی۔
تصویر: picture-alliance/AP Photo/H. Mohammed
عرب اسپرنگ اور یمن
دیگر عرب ممالک کی طرح یمن میں بھی حکومت مخالف مظاہرے شروع ہوئے اور اس کے نتیجے میں صدر علی عبداللہ صالح سن دو ہزار گیارہ میں اقتدار سے الگ ہو گئے اور اس کے ایک برس بعد ان کے نائب منصور ہادی ملک کے نئے صدر منتخب کر لیے گئے۔ یمن میں سیاسی خلا کے باعث اسی دوران وہاں القاعدہ مزید مضبوط ہو گئی۔
تصویر: Getty Images/AFP/M. Huwais
قومی مذاکرات کا آغاز
جنوری سن دو ہزار چودہ میں یمن حکومت نے ایک ایسی دستاویز کو حتمی شکل دے دی، جس کے تحت ملک کے نئے آئین کو تخلیق کرنا تھا۔ اسی برس فروری میں ایک صدارتی پینل نے سیاسی اصلاحات کے تحت ملک کو چھ ریجنز میں تقسیم کرنے پر بھی اتفاق کر لیا۔ تاہم حوثی باغی ان منصوبوں سے خوش نہیں تھے۔ تب سابق صدر صالح کے حامی بھی حوثیوں کے ساتھ مل گئے۔
تصویر: picture alliance/dpa/Str
حوثی باغیوں کی صںعاء پر چڑھائی
ستمبر سن دو ہزار چودہ میں حوثیوں نے دارالحکومت پر چڑھائی کر دی اور اس شہر کے کئی حصوں پر قبضہ کر لیا۔ جنوری سن دو ہزارپندرہ میں ایران نواز ان شیعہ باغیوں نے مجوزہ آئین کو مسترد کر دیا۔ اسی برس مارچ میں دوہرا خودکش حملہ ہوا، جس کے نتیجے میں 137 افراد مارے گئے۔ یمن میں داعش کی یہ پہلی کارروائی قرار دی جاتی ہے۔ کہا جاتا ہے کہ ایران حوثی باغیوں کی مدد کر رہا ہے۔
تصویر: picture-alliance/ZUMAPRESS.com
سعودی عسکری اتحاد کی مداخلت
مارچ سن دو ہزار پندرہ میں سعودی عسکری اتحاد نے یمن میں حوثی باغیوں اور جہادی گروپوں کے خلاف باقاعدہ کارروائی کا آغاز کیا۔ انسانی حقوق کے اداروں نے سعودی اتحاد کی عسکری کارروائی کو تنقید کا نشانہ بنایا، جس کے باعث شہری ہلاکتوں میں اضافہ ہوا ہے۔ نو رکنی اس اتحاد کی کارروائیوں کے باوجود بھی حوثی باغیوں کو شکست نہیں ہو سکی ہے۔
تصویر: Getty Images/AFP/F. Nureldine
اقوام متحدہ کی کوششیں
اقوام متحدہ اس تنازعے کے آغاز سے ہی فریقین کے مابین مصالحت کی کوشش میں سرگرداں رہا تاہم اس سلسلے میں کوئی کامیابی نہ ہو سکی۔ اپریل سن دو ہزار سولہ میں اقوام متحدہ کی کوششوں کے باعث ہی حوثی باغیوں اور صنعاء حکومت کے نمائندوں کے مابین مذاکرات کا آغاز ہوا۔ تاہم عالمی ادارے کی یہ کوشش بھی کارگر ثابت نہ ہو سکی۔
تصویر: Getty Images/AFP/M. Huwais
شہری آبادی کی مشکلات
یمنی خانہ جنگی کے نتیجے میں ملکی انفرااسٹریکچر بری طرح تباہ ہو گیا ہے۔ سن دو ہزار چودہ سے اب تک اس بحران کے باعث دس ہزار افراد ہلاک جبکہ لاکھوں بے گھر ہو چکے ہیں۔ امدادی اداروں نے خبردار کیا ہے کہ خوراک کی قلت کے باعث بالخصوص بچوں کی ہلاکتوں میں اضافہ ہو سکتا ہے۔ مجموعی طور پر ملک کی ساٹھ فیصد آبادی کو خوارک کی قلت کا سامنا ہے۔
تصویر: picture-alliance/AP Photo/H. Mohammed
طبی سہولیات کی عدم دستیابی
یمن میں 2.2 ملین بچے کم خوارکی کا شکار ہیں۔ حفظان صحت کی ناقص سہولیات کے باعث اس عرب ملک میں ہیضے کی وبا بھی شدت اختیار کرتی جا رہی ہے۔ عالمی ادارہ صحت کے مطابق اس ملک میں ہیضے کے مشتبہ مریضوں کی تعداد ساٹھے سات لاکھ سے زائد ہو چکی ہے۔ سن دو ہزار سترہ میں آلودہ پانی کی وجہ سے دو ہزار ایک سو 35 افراد لقمہ اجل بن چکے ہیں۔
تصویر: picture-alliance/AP Photo/H. Mohammed
قیام امن کی امید نہیں
اقوام متحدہ کی متعدد کوششوں کے باوجود یمن کا بحران حل ہوتا نظر نہیں آ رہا۔ سعودی عرب بضد ہے کہ وہ بین الاقوامی سطح پر تسلیم شدہ یمنی صدر منصور ہادی کی حمایت کا سلسلہ جاری رکھے گا۔ دوسری طرف حوثی باغی اپنے اس مطالبے پر قائم ہیں کہ یونٹی حکومت تشکیل دی جائے، جو واحد سیاسی حل ہو سکتا ہے۔ اطراف اپنے موقف میں لچک ظاہر کرنے کو تیار نہیں ہیں۔
تصویر: picture-alliance/AP Photo/H.Mohammed
10 تصاویر1 | 10
سعودی ہوائی اڈے پر ڈرون حملہ
یمنی خانہ جنگی سن دو ہزار چودہ میں اس وقت شروع ہوئی تھی، جب وسیع تر خودمختاری کا مطالبہ کرنے والے حوثی باغیوں نے حکومت کا تختہ الٹ کر دارالحکومت پر قبضہ کر لیا تھا۔
اس وقت یہ باغی ملک کےتقریباً تمام شمالی علاقوں کا کنٹرول سنبھال چکے ہیں۔ یمن کی بین الاقوامی حمایت یافتہ حکومت اس وقت ملک کے جنوب میں قائم ہے۔
ان باغیوں کو شکست دینے کی خاطر سعودی عسکری اتحاد نے مارچ سن دو ہزار پندرہ میں کارروائی شروع کی تھی۔
اگرچہ اتحادی فورسز تب سے ہی باغیوں کے ٹھکانوں کو نشانہ بناتی رہی ہیں لیکن ایسا پہلی بار ہوا ہے کہ ان فورسز نے صنعا میں واقع کسی سویلین منسٹری کو نشانہ بنایا ہو۔
یمنی باغی سعودی عرب اور متحدہ عرب امارات میں مسلسل حملے جاری رکھے ہوئے ہیں۔ گزشتہ ہفتے ہی ان باغیوں نے ایک ڈرون کے ذریعے سعودی عرب کے ایک ہوائی اڈے کو بھی نشانہ بنایا تھا۔
اشتہار
باغیوں کا نیا محاذ
گذشتہ ہفتے جمعرات کو یمنی باغیوں کی طرف سے سعودی عرب کے ابھا انٹرنیشنل ایئر پورٹ پر ڈرون حملہ کیا گیا تھا، جس کی وجہ سے کم ازکم بارہ افراد زخمی ہو گئے تھے۔
اس سات سالہ جنگ میں اب حوثی باغیوں نے سعودی عرب پر حملوں کے علاوہ سعودی عسکری اتحاد کے ایک اہم رکن ملک متحدہ عرب امارات پر حملے شروع کر کےایک نیا محاذ کھول دیا ہے۔
سعودی عسکری اتحاد یمنی باغیوں کی پرتشدد کارروائیوں کو روکنے کی خاطر کارروائیاں بدستور جاری رکھے ہوئے ہے لیکن ابھی تک اسے کوئی خاطر خواہ کامیابی حاصل نہیں ہو سکی ہے۔
یمن کی جنگ کی وجہ سے ہزاروں افراد ہلاک جبکہ لاکھوں ملک سے فرار ہونے پر مجبور ہو چکے ہیں۔ یمن میں انسانی بحران کا المیہ خطرناک شکل اختیار کر چکا ہے۔ عالمی طاقتوں کی کوشش ہے کہ اس تنازعہ کو مذاکرات سے حل کیا جائے لیکن مستقبل قریب تک ایسا کوئیامکان دیکھائی نہیں دے رہا ہے۔