سلیم شہزاد کا قتل: منظوری حکومت نے دی، ایڈمرل مولن
8 جولائی 2011![](https://static.dw.com/image/15111355_800.webp)
واشنگٹن سے خبر ایجنسی روئٹرز کی رپورٹوں میں بتایا گیا ہے کہ امریکی فوج کے چیئر مین جوائنٹ چیفس آف سٹاف ایڈمرل مائیک مولن نے کہا ہے کہ ان کے پاس اس بارے میں تو کوئی ثبوت نہیں کہ پاکستانی صحافی سلیم شہزاد کی ہلاکت میں ملکی فوج کا خفیہ ادارہ آئی ایس آئی بھی ملوث رہا ہے، تاہم ایڈمرل مولن نے کہا کہ انہوں نے اب تک ایسی کوئی بھی بات نہیں سنی، جو ’اس رپورٹ کی تردید کر سکے کہ اس صحافی کی ہلاکت کا پاکستانی حکومت کو علم تھا۔‘
ایڈمرل مائیک مولن نے واشنگٹن میں پینٹاگون پریس ایسوسی ایشن کے رکن نامہ نگاروں سے خطاب کرتے ہوئے کہا، ’’ہاں، اس قتل کی منظوری حکومت نے دی تھی۔‘‘ مختلف خبر ایجنسیوں نے اپنی رپورٹوں میں لکھا ہے کہ پاکستان میں سلیم شہزاد کے قتل کے سلسلے میں مبینہ طور پر اسلام آباد حکومت کے ملوث ہونے کے حوالے سے ایڈمرل مائیک مولن کا یہ بیان کسی بہت سینئر امریکی عہدیدار کا وہ پہلا بیان ہے، جس میں عوامی سطح پر اور بہت کھل کر اس ہلاکت کا ذمہ دار پاکستانی حکومت کو قرار دیا گیا ہے۔
ہانگ کانگ کے ایک جریدے ایشیا ٹائمز آن لائن کے لیے کام کرنے والے پاکستانی صحافی سلیم شہزاد 29 مئی کو اسلام آباد سے اچانک غائب ہو گئے تھے اور دو روز بعد ان کی لاش ایک نہر سے ملی تھی، جس پر پولیس کے مطابق تشدد کے نشانات بھی تھے۔
پاکستان میں فوج کے خفیہ ادارے آئی ایس آئی کے مبینہ طور پر اس واقعے میں ملوث ہونے کے بارے میں قیاس آرائیاں بھی کی جانے لگی تھیں تاہم آئی ایس آئی کی طرف سے ایسے تمام دعوے رد کر دیے گئے تھے کہ شہزاد کی ہلاکت میں اس کا کسی بھی طرح سے کوئی ہاتھ رہا ہے۔
سلیم شہزاد اپنی ہلاکت سے پہلے اس بارے میں حقائق تک پہنچنے کی کوشش کر رہے تھے کہ پاکستان میں عسکریت پسند گروپوں کے مبینہ طور پر آئی ایس آئی کے ساتھ رابطے تھے۔ اس صحافتی چھان بین سے قبل انہوں نے اس بارے میں بھی ایک رپورٹ لکھی تھی کہ کراچی میں پاکستانی بحریہ کے پی این ایس مہران نامی اڈے پر دہشت گرد نیٹ ورک القاعدہ کے شدت پسندوں نے اس لیے حملہ کیا تھا کہ عسکریت پسندوں کی وہ بات چیت ناکام ہو گئی تھی، جس کے ذریعے پاکستانی بحریہ کے دو ایسے اہلکاروں کی رہائی کے لیے کوششیں کی جا رہی تھی، جن کے مبینہ طور پر عسکریت پسندوں کے ساتھ تعلقات تھے۔
رپورٹ: مقبول ملک
ادارت: شادی خان سیف