امریکی فلیٹ یا بیڑے میں اس وقت 15 فوجی آئل ٹینکرز اور صرف طیارہ بردار جنگی بحری جہاز اور چند جوہری توانائی سے چلنے والے آبدوزیں شامل ہیں۔ اب تک امریکا کے تمام بحری جہازوں کو کافی کم وقفے کے بعد اپنے مشن کے دوران ایندھن بھرنے کے لیے آئل ٹینکرز کا سہارا لینا پڑتا تھا۔ یہ عمل کافی حساس خیال کیا جاتا ہے اور خاص طور پر خراب موسم میں۔

اس طریقہ کار کی ایجاد کا امریکی سائنسدانوں کا حتمی مقصد دراصل تیل پر بحری جہازوں کے انحصار کو ختم کرنا ہے۔ امریکی وائس ایڈمیرل فلپ کلوم نے سمندری پانی کو بطور ایندھن استعمال کرنے کے طریقہٴ کار کو ایجاد کرنے کے عمل کو امریکا کے لیے ایک اہم ’سنگ میل‘ قرار دیا ہے۔ انہوں نے کہا، " ہم بڑے چیلنجز کے دور سے گزر رہے ہیں، ہمیں توانائی کے حصول کے لیے بہت ہی اختراعی سوچ سے کام لینا ہوگا۔ ہمیں دیکھنا ہوگا کہ ہم توانائی کی کتنی قدر کرتے ہیں اور ہم توانائی کا کیسا استعمال کرتے ہیں" ۔ امریکی وائس ایڈمیرل فلپ کلوم نے مزید کہا، " ہمیں گزشتہ چھ دہائیوں سے تیل کی مسلسل سستی اور لامحدود رسائی کے بارے میں پائے جانے والے مفروضات کے نتائج کو چیلنج کرنا ہوگا۔ ہم نے بنیادی طور پر توانائی کو ہوا کی طرح جانا اور یہ ہی سمجھتے رہے کہ توانائی ہمیشہ سے ہے اور ہمیشہ موجود رہے گی لیکن حقیقت میں ہمیں اس کا بہت زیادہ خیال رکھنا چاہیے۔"

امریکی ماہرین نے اب سمندری پانی سے ہائیڈروجن اور کاربن ڈائی اُکسائیڈ گیس نکالنے کا طریقہ کار ایجاد کر لیا ہے۔ اسے ایک کیٹیلیٹک کنورٹر کی مدد سے ایندھن کی شکل میں منتقل کیا گیا، اس عمل میں گیس کو مائع میں تبدیل کرنے کا طریقہ کار بروئے کار لایا گیا۔ سائنسدان امید ظاہر کر رہے ہیں کہ یہ ایندھن پانی کے جہازوں کے ساتھ ساتھ ہوائی جہاز کو بھی توانائی فراہم کر سکے گا۔ امکاناً اب مستقبل میں پانی میں چلنے والے بحری جہازوں کا ماضی کی طرح اب توانائی کے حصول کے لیے آئل ٹینکرز پر انحصار ختم ہو جائے گا اور یہ بحری جہاز سمندر ہی سے ایندھن حاصل کر لیا کریں گے۔

امریکی نیول ریسرچ لیبارٹری کے ماہرین کے مطابق اس نئی ٹیکنالوجی کے ذریعے حاصل کردہ فضائی طیاروں کے ایندھن کی قیمت اندازاً تین سے چھ ڈالر فی گیلن ہوگی۔ یاد رہے کہ یہ سائنسدان سمندری پانی سے تیار شدھ ایندھن کے استعمال کا ایک تجربہ ایک ماڈل ہوائی جہاز پر کر چُکے ہیں۔