یہ نظام کسی سمارٹ فون اَیپ کی شکل میں ہو سکتا ہے یا پھر کسی ایسے خفیہ وائر لیس نظام کی صورت میں، جو بظاہر بے ضرر معلوم ہوتا ہو لیکن جس کی مدد سے لوگ حکومتی سنسرشپ کی زَد میں آئے بغیر آپس میں روابط اُستوار کر سکتے ہوں۔

امریکی حکومت کے فراہم کردہ مالی وسائل کی مدد سے واشنگٹن کے ایک تھنک ٹینک کے تیار کردہ اس منصوبے کو ’کموشن وائرلیس‘ کا نام دیا گیا ہے۔ کہا جا رہا ہے کہ آئندہ سال کے اوائل تک اس نظام کی تیاری کا عمل تکمیل کو پہنچ جائے گا۔

ان کوششوں کا مقصد اظہارِ رائے کی آن لائن آزادی کو فروغ دینا ہے۔ اس منصوبے کے سلسلے میں اس اہم حقیقت کو بھی پیشِ نظر رکھا گیا ہے کہ وقت کے ساتھ ساتھ زیادہ سے زیادہ لوگ موبائل آلات استعمال کرنے لگے ہیں۔

نیو امریکا فاؤنڈیشن میں اس منصوبے کے سربراہ ساشا مینراتھ نے بتایا کہ اس طرح کا نظام ’اُن افراد کے لیے سود مند ثابت ہو گا، جو ایسے حالات میں ایک دوسرے کے ساتھ رابطہ رکھنا چاہتے ہیں، جن میں حکومتیں نہیں چاہتیں کہ اُن کے درمیان رابطہ ہو‘۔

واضح رہے کہ عرب دُنیا میں گزشتہ کچھ عرصے کے دوران ابھرنے والی جمہوری تحریکوں کے دوران وہاں کے عوام خود کو منظم کرنے کے لیے فیس بُک اور ٹویٹر جیسے پروگراموں سے استفادہ کرتے رہے تاہم ان پروگراموں کو وہاں کی حکومتوں نے بھی منحرفین کی سرگرمیوں کا پتہ چلانے یا اُنہیں ہراساں کرنے کے لیے استعمال کیا۔

کموشن (Commotion)کو رابطے کے ایک ایسے محفوظ اور قابل اعتبار ذریعے کے طور پر ڈیزائن کیا جا رہا ہے جس میں حکومتیں عوام کے باہمی روابط کی نہ تو نگرانی کر سکیں اور نہ ہی اُن روابط کو منقطع کر سکیں۔ اس نظام کو ’سوٹ کیس میں انٹرنیٹ‘ کا نام بھی دیا جا رہا ہے۔

آن لائن آزادی کو یقینی بنانے کے لیے امریکا نے مختلف منصوبے شروع کر رکھے ہیں اور کموشن وائرلیس اُنہی میں سے ایک ہے۔ امریکی حکومت نے گزشتہ چار برسوں کے دوران اس طرح کے منصوبوں کے لیے مجموعی طور پر 76 ملین ڈالر فراہم کیے ہیں۔

اس پروگرام سے استفادہ کرنے والوں میں ریڈیو فری ایشیا سمیت امریکی مالی وسائل سے چلنے والے دیگر نشریاتی ادارے بھی شامل ہیں، جو اپنے ذرائع اور اپنے نامہ نگاروں کو تحفظ فراہم کرنا چاہتے ہیں۔ اس طرح کے کمپیوٹر پروگراموں کو ممکنہ طور پر ایران، شام یا پھر چین جیسے ملکوں میں منحرفین کی مدد کے لیے استعمال کیا جا سکتا ہے۔

aa/mm/afp