سنگاکارا نے ٹیسٹ کرکٹ میں 12 ہزار رنز مکمل کر لیے
3 جنوری 2015![](https://static.dw.com/image/15772448_800.webp)
سری لنکا کی جانب سے سنگاکارا کی شاندار اننگز اور فاسٹ بولر نووان پرادیپ کی 63 رنز کے عوض چار وکٹوں نے نیوزی لینڈ کی ٹیم کی پوزیشن کو کمزور کر دیا ہے۔ دوسرے ٹیسٹ میچ کے پہلے روز کیوی ٹیم صرف 221 رنز بنا کر آؤٹ ہو گئی۔
نیوزی لینڈ کی ٹیم پہلے ٹیسٹ میں شکست کا بدلہ لے کر دو ٹیسٹ میچوں کی یہ سیریز برابر کرنے کی خواہاں ہے۔ کرائسٹ چرچ میں جاری اس میچ میں سری لنکا نے میزبان ٹیم کو پہلے بیٹنگ کرنے کی دعوت دی اور پچ پر موجود گھاس کی وجہ سے بلے بازوں کو سخت پریشانی میں مبتلا کیے رکھا۔ نیوزی لینڈ کی آخری آٹھ وکٹیں صرف 81 کے مجموعی اسکور پر گریں۔
تاہم سری لنکا کی ٹیم بھی بلے بازی کے میدان میں جمع کر کھیل نہ پائی اور اس کی پہلی پانچ وکٹیں صرف 78 کے مجموعی اسکور پر گر گئیں۔ سری لنکا کی جانب سے سنگاکارا بدستور کریز پر موجود رہے، تاہم دوسرے اینڈ سے ووکٹیں مسلسل گرتی چلی گئیں۔ پہلے روز کا کھیل ختم ہونے پر سنگاکارا 33 کے انفرادی اسکور پر ناٹ آؤٹ تھے۔
انہوں نے اس ٹیسٹ سیریز کا آغاز 12 ہزار رنز کے لیے صرف 12 رنز کی کمی سے کیا تھا، تاہم پہلے ٹیسٹ میچ میں وہ دونوں اننگز میں صرف چھ اور ایک رن بنا کر آؤٹ ہو گئے۔
واضح رہے کہ ٹیسٹ کرکٹ میں 12 ہزار یا زائد رنز بنانے والوں کے کلب میں سچن ٹنڈولکر، رِکی پونٹنگ، جیک کیلس اور راہول ڈراوِڈ شامل ہیں، جب کہ سنگاکارا اب وہ پانچویں بلے باز بن گئے ہیں، جنہیں یہ اعزاز حاصل ہے۔