بھارت کی جیل میں قید سوات کے ایک نوجوان کی رہائی چار ماہ بعد بھی ممکن نہ ہوسکی ہے۔ بالی ووڈ کے اداکاروں سے ملنے کی خواہش میں عبداللہ نے واہگہ بارڈر کراس کیا تھا تاہم اسے گرفتار کر کے امرتسر کی ایک جیل میں قید کر دیا گیا۔
اشتہار
سوات سے تعلق رکھنے والے بیس سالہ نوجوان عبداللہ کو 24 مئی 2017 ء کو بی ایس ایف کے اہلکاروں نے اُس وقت گرفتار کر لیا تھا، جب اُس نے واہگہ بارڈر کی زیرو لائن کو کراس کیا تھا۔
عبداللہ کے بڑے بھائی سردار خان نے ڈی ڈبلیو سے گفتگو کرتے ہوئے کہا کہ اُس کے بھائی کا ذہنی توازن بھی ٹھیک نہیں تھا جبکہ ڈاکٹروں سے اُس کا علاج بھی جاری تھا۔ سردار خان نے بتایا کہ بالی ووڈ کے اداکاروں سے ملنے کا اُسے جنون کی حد تک شوق تھا، ’’وہ گھر سے پاسپورٹ کے بہانے نکلا اور ہمیں علم نہیں کہ وہ لاہور کیسے پہنچا، پھر ہمیں میڈیا کے ذریعے پتہ چلا کہ اُسے بی ایس ایف نے گرفتار کیا ہے۔‘‘
عبداللہ گیارہ بہن بھائیوں میں سب سے چھوٹا ہے۔ گرفتاری کے بعد عبداللہ کی ماں اور والد دل کے عارضے میں مبتلا ہو چکے ہیں۔ عبد اللہ کے والد زڑہ ور خان نے ڈوئچے ویلے کو بتایا، ’’جب ہمیں عبداللہ کی گرفتاری کی خبر ملی تو وہ شدت غم سے نڈھال ہوگئے۔ اُس کی ماں ہر روز اسے یاد کرتی ہے جبکہ سب عبداللہ کی رہائی کے لئے دعاگو ہیں۔‘‘
عبداللہ کی رہائی کے لیے کافی کوششیں کی گئیں لیکن ابھی تک اس کی رہائی ممکن نہ ہو سکی ہے۔ عبداللہ کے بھائی سردار کے مطابق، ’’ہم نے ممبران قومی و صوبائی اور وزارء سے لے کر سب سے امداد کی اپیل کی جبکہ انڈیا میں پاکستانی ایمبیسی کو بھی درخواست کی لیکن ابھی تک کوئی شنوائی نہ ہوسکی۔‘‘
سب سے زیادہ پیسہ کمانے والی بھارتی فلمیں
کیا آپ کو معلوم ہے کہ اب تک سب سے زیادہ کمائی کس بھارتی فلم نے کی ہے؟ سٹیٹسٹا Statista کے مطابق یہ رہیں اب تک کی سب سے زیادہ کمائی کرنے والی 10 فلمیں۔
تصویر: picture-alliance/dpa/Rapid Eye Movies
پی کے
عامر خان کی سن دو ہزار چودہ میں ریلیز ہونے والی فلم ’پی کے‘ پہلے نمبر پر ہے، جس نے بارہ کروڑ ڈالر کمائے۔ راج کمار ہیرانی کی ہدایتکاری میں بننے والی اس فلم میں انوشوکا شرما بھی جلوہ گر ہوئی تھیں۔
تصویر: Punit Paranjpe/AFP/Getty Images
بجرنگی بھائی جان
’بجرنگی بھائی جان‘ بالی ووڈ کی سب سے زیادہ پیسے کمانے والی فلموں کی فہرست میں دوسرے نمبر پر پے۔ اس فلم نے 93 ملین امریکی ڈالر کا بزنس کیا ۔ سن دو ہزار پندرہ میں ریلیز ہونے والی اس فلم کے ہیرو سلمان خان تھے۔
تصویر: Getty Images/AFP/D. Sarkar
دھوم 3
عامر خان کی فلم ’دھوم تھری‘ نے بھی دھوم مچائی اور مجموعی طور پر 81 ملین ڈالر کی کمائی کی۔ سن دو ہزار تیرہ میں نمائش کے لیے پیش کی جانے والی یہ فلم ادیتیہ چوپڑا نے پروڈیوس کی تھی۔
تصویر: Rapid Eye Movies
پریم رتن دھن پایو
سن دو ہزار پندرہ میں ریلیز ہونے والی سلمان خان کی یہ فلم بھی انتہائی کامیاب رہی۔ راچ شری کی پیشکش ’پریم رتن دھن پایو‘ نے 64 ملین ڈالر کمائے۔
تصویر: Getty Images/AFP/Str
چنئی ایکسپریس
شاہ رخ خان کی فلم ’چنئی ایکسپریس‘ نے 63 ملین ڈالر کا بزنس کیا۔ سن دو ہزار تیرہ میں ریلیز ہونے والی اس فلم میں دیپیکا پڈوکون بھی جلوہ افروز ہوئیں۔
تصویر: picture alliance/dpa/D. Solanki
تھری ایڈیٹس
سن دو ہزار نو میں ریلیز ہونے والی فلم ’تھری ایڈیٹیس‘ نے 59 ملین ڈالر کمائے۔ راج کمار ہیرانی کی ہدایتکاری میں بننے والی اس فلم میں عامر خان نے مرکزی کردار ادا کیا تھا۔
تصویر: AP
دل والے
سن دو ہزار پندرہ میں نمائش کے لیے پیش کی گئی فلم ’دل والے‘ میں شاہ رخ خان اور کاجل کی جوڑی ایک مرتبہ پھر نظر آئی۔ اس فلم نے بھی 59 ملین ڈالر کا بزنس کیا۔
تصویر: picture-alliance/dpa/Rapid Eye Movies
ہیپی نیو ایئر
شاہ رخ خان کی فلم ’ہیپی نیو ایئر‘ نے 57 ملین ڈالر کمائے۔ سن دو ہزار چودہ میں منظر عام پر آنے والی اس فلم کو فرح خان نے ڈائریکٹ کیا تھا۔
تصویر: Rapid Eye Movies
کِک
سلمان خان کی فلم ’کِک‘ سن دو ہزار چودہ میں ریلیز ہوئی۔ اس فلم نے 56 ملین ڈالر کمائے۔ اس ایکشن فلم میں نواز الدین صدیقی نے بھی عمدہ اداکاری کا مظاہرہ کیا۔
تصویر: STR/AFP/Getty Images
کِرش
سن دو ہزار تیرہ میں نمائش کے لیے پیش کی جانے والی فلم ’کِرش‘ بھارت میں سب سے زیادہ پیسہ کمانے والی فلموں کی فہرست میں دسویں نمبر پر ہے۔ اس فلم نے 56 ملین ڈالر کا بزنس کیا۔
تصویر: Getty Images/AFP/J. Samad
10 تصاویر1 | 10
انہوں نے مزید کہا، ’’ اِن چار مہینوں میں عبداللہ نے ایک مرتبہ فون کے ذریعے رابطہ کیا اور کہا کہ وہ امرتسر کی جیل میں قید ہے اور اُسے جج کے سامنے پیش کیا جا چکا ہے،جج نے دو مہینے کے اندر اندر عبداللہ کی رہائی کا بھی کہا تھا۔‘‘
عبداللہ کی رہائی اور معلومات کے لیے جب پاکستانی محکمہ خارجہ کے دفتر سے رابطہ کیا گیا تو بتایا گیا، ’’ہم اس حوالے سے کچھ کہنے یا کرنے سے قاصر ہے، انڈیا میں قائم پاکستانی سفارتخانہ ہی عبداللہ کی رہائی یا اس کے بارے میں معلومات فراہم کرسکتا ہے۔‘‘
سوات کا بیس سالہ نوجوان عبداللہ درزی تھا اور اپنے گھر کے اخراجات میں حصہ بھی ڈالتا تھا۔ سردار خان کے مطابق حکومتی سطح پر عبداللہ کی رہائی کے لیے اقدامات نہیں اُٹھائے گئے ہیں۔ عبداللہ کے گھروالوں نے حکومت پاکستان، بھارتی حکومت اور انسانی حقوق کی تنظیموں سے تعاون کی اپیل کر رکھی ہے۔