نواجون کشتی ران لارا نے اپنے سفر کا آغاز ایک سال قبل کیا تھا۔ ہفتے کے روز اس نے بحیرہء کریبیئن کے ایک جزیرے پر سہ پہر تین بجے اپنے سفر کا اختتام کیا۔ یوں لارا نے کشتی پر اکیلے دنیا کا چکر کاٹنے کا پچھلا ریکارڈ آٹھ ماہ قبل ہی مکمل کر دیا۔ اس سے قبل یہ ریکارڈ ایک سترہ سالہ کشتی ران نے بنایا تھا۔ لارا اس سال 20 ستمبر کو سترہ سال کی ہو گی۔

جزیرے پر لارا کے والدین اور چار سو کے لگ بھگ افراد نے اس تاریخ ساز کشتی ران کا استقبال کیا۔

لارا کو ہالینڈ کی ایک عدالت سے اس سفر پر جانے کی اجازت لینا پڑی تھی۔ وہ اس سفر پر ایک برس قبل جانا چاہتی تھی تاہم عدالت نے اسے ایسا کرنے کی اجازت نہیں دی تھی۔ عدالت کا کہنا تھا کہ اس مہم پر جانے کے لیے لارا کی عمر انتہائی کم ہے۔ ایک موقع پر لارا نے بھاگ کر اس سفر کا آغاز کرنا چاہا تھا مگر تب پولیس نے اسے پکڑ کر واپس گھر پہنچا دیا تھا۔

لارا نے قانونی جنگ جولائی دو ہزار دس میں جیتی تھی۔ اس دوران اس کو دس ماہ لگے۔ لارا کی کشتی کا نام ’گپی‘ ہے۔

لارا نیوزی لینڈ میں ایک کشتی پر پیدا ہوئی تھی۔ اس مہم پر نکلنے سے قبل بھی وہ اپنے والد اور کتے کے ساتھ کشتی پر ہی رہ رہی تھی۔

لارا سے قبل یہ ریکارڈ آسٹریلیا کی جیسیکا واٹسن کے پاس تھا جس نے یہ غیر معمولی کام مئی 2010ء میں سترہ برس کی عمر کو پہنچنے سے تین دن پہلے کر لیا تھا۔

رپورٹ: شامل شمس ⁄ خبر رساں ادارے

ادارت: مقبول ملک