میانمار کی ایک عدالت نے آنگ سان سوچی کو انتخابات میں جعل سازی کے جرم میں تیس سال قید کی سزا سنائی ہے۔ اس فیصلے کے بعد اب سوچی کی سزا سترہ برس ہو گئی ہے۔ وہ پہلے ہی کئی مختلف الزامات کے تحت سزا کاٹ رہی ہیں، ان میں بدعنوانی اور اشتعال انگیزی پھیلانے جیسے مقدمات شامل ہیں۔

اس تازہ صورتحال نے آنگ سان سوچیکی جماعت نیشنل لیگ فار ڈیموکریسی ( این ایل ڈی) کے مستقبل کے حوالے سے کئی سوالات کھڑے کر دیے ہیں۔ فوجی سربراہی میں قائم حکومت نے اگلے برس ہونے والے انتخابات سے قبل این ایل ڈی پر پابندی عائد کرتے ہوئے اسے تحلیل کرنے کی دھمکی بھی دے رکھی ہے۔

میانمار میں سن 2020 میں ہونے والے انتخابات میں سوچی کی جماعت نے بھاری اکثریت سے کامیابی حاصل کی تھی تاہم اس کے اگلے برس فروری میں ایک فوجی بغاوت میں انہیں اقتدار سے بے دخل کر دیا گیا تھا۔ سوچی پر بڑے پیمانے پر انتخابی دھاندلیوں کے الزامات عائد کرتے ہوئے فوج نے این ایل ڈی کو نئی حکومت قائم نہیں کرنے دی تھی۔

خبر رساں ادارے روئٹرز نے اپنے ذرائع کے حوالے سے بتایا ہے کہ عدالت نے سابق صدر من ونٹ کو بھی سوچی کی طرح کی ہی سزا سنائی ہے۔ ستتر سالہ سوچی اپنے اوپر لگائے گئے تمام الزامات کو بے بنیاد قرار دیتے ہوئے انہیں مسترد کرتی ہیں۔ انسانی حقوق کی تنظیموں کے مطابق فوجی بغاوت کے بعد سے اب تک میانمار میں دو ہزار دو سو سے زائد افراد ہلاک ہو چکے ہیں اور گرفتار کیے جانے والے شہریوں کی تعداد پندرہ ہزار کے لگ بھگ ہے۔

ع ا / ا ا ( روئٹرز)